قازاقستاندا مال باعاسى قالاي قۇبىلىپ تۇر

نارىقتاعى جاعدايعا قۋاڭشىلىقتىڭ قالاي اسەر ەتىپ جاتقانىن ءبىلۋ ءۇشىن بىرنەشە ءوڭىردىڭ تۇرعىندارىنا سۇراۋ سالىپ كورگەن ەدىك.

قازاقپارات ءتىلشىسى قۋاڭشىلىق جانە قۇربان ايت قارساڭىندا وڭىرلەردەگى مال باعاسىنا شولۋ جاساعان ەدى.

نۇر-سۇلتان قالاسىندا توقتىنىڭ ەڭ تومەنگى باعاسى 40 مىڭ تەڭگەدەن باستالاتىن كورىنەدى. ەت ساۋداسىمەن اينالىساتىندار قۇرباندىققا ارنالعان ەركەك قويلاردىڭ باعاسى جاسىنا قاراي 90 مىڭعا دەيىن بارادى دەپ وتىر.

جىل سايىن قۇربان ايت كەزىندە مال اكەلىپ، ساتىپ جۇرگەندەردىڭ كوبى مال باعاسى مەرەكەنىڭ العاشقى ەكى كۇنىندە اۋىتقيتىنىن، ءۇشىنشى كۇنى نەگىزگى نارىقتاعى باعاسىنا قايتاتىنىن ايتتى.

«قۇربان ايت باستالعان كۇنى قالتالىلار كەلىپ باعانى بەلگىلەپ كەتەدى دەۋگە بولادى. استانادا باعانى كوتەرەتىن سولار. اقشا مەن مالدىڭ بەت-جۇزىنە قاراماي، ايتىلعان باعاعا الا سالادى. قىمبات باعا سولاي قالىپتاسادى»، - دەيدى ەت ساتۋشىلاردىڭ ءبىرى.

ەلوردادا ازىرگە سيىر باعاسى 300-400 مىڭ ارالىعىندا. جىلقى باعاسى نەگىزىنەن جاسىنا قاراي 300-500 مىڭ اراسىندا قۇبىلىپ تۇر.

ەت ساۋداگەرلەرى توي-تومالاقتىڭ جيىلەپ، بۇكىل سالادا قىمباتشىلىق ورناۋىنا بايلانىستى قىلقۇيرىقتىڭ باعاسى 700 مىڭ تەڭگەگە دەيىن جەتكەنىن ايتادى.

شىعىس قازاقستاندا سيىر باعاسى جاسىنا قاراي 250 مىڭ تەڭگەدەن 350 مىڭ تەڭگەگە دەيىن بارادى. قۇرباندىققا ارنالعان ىسەك قويلاردىڭ باعاسى 60 مىڭنان باستالىپ تۇر.

توقتى باعاسى مۇندا دا 40 مىڭ تەڭگەدەن باستالادى. جىلقى باعاسى 350 مىڭ تەڭگەدەن 1 ميلليون تەڭگەگە دەيىن شارىقتاپ تۇر.

بىرنەشە اۋدانىندا جۇت بولىپ جاتقان ماڭعىستاۋ وبلىسىندا اسىرەسە جىلقىنىڭ باعاسى قۇلدىراپ كەتكەن. جەرگىلىكتى شارۋالار قۋاڭشىلىقتان ەڭ كوپ قىرىلىپ جاتقان دا وسى جىلقى دەپ وتىر.

ويتكەنى بۇل وڭىردە تەكتى جانۋارعا ازىق بولاتىن ءشوپ ەجەلدەن سيرەك وسەتىن كورىنەدى. قازىر الەۋمەتتىك جەلىدە قۇلىننىڭ ءبىر باسىنا 40-50 مىڭ تەڭگە سۇراپ تۇرعان حابارلاندىرۋلار كوپ تاراپ جاتىر.

ءبىز تەلەفون ارقىلى سويلەسكەن تۇرعىنداردىڭ ءبارى ول جارنامالاردىڭ شىن ەكەنىن راستادى.

قۇلىن ەنەسىن قاقتاپ ەمىپ، كۇيىن كەتىرەتىن بولعاندىقتان، مال يەلەرى تەزىرەك قۇتىلۋعا اسىعىپ وتىرعان كورىنەدى.

سونىمەن قۇلىن باعاسى 40 مىڭنان باستالسا، ەرەسەك جىلقى 300 مىڭ تەڭگەدەن اسپاي تۇر مۇندا.

سيىر باعاسى 300-400 مىڭ كولەمىندە بولسا، تۇيە باعاسى 500 مىڭ تەڭگەدەن باستالادى.

ساۋىن تۇيەلەردىڭ باعاسى 700 مىڭ تەڭگەنىڭ ماڭايىندا.

جەرگىلىكتى تۇرعىندار بەرگەن مالىمەت بويىنشا، پاۆلودار وبلىسىندا مال باعاسى مىناداي:

ءىرى قارا.

تايىنشا - 280 مىڭ تەڭگە، سيىر 330-400 مىڭ تەڭگە، ساۋىن سيىرلاردىڭ باعاسى - 500 مىڭ تەڭگە.

جىلقى.

تاي - 260-400 مىڭ تەڭگە، بايتالدار - 400-600 تەڭگە، دونەن، بەستىلەر - 500-600 مىڭ تەڭگە، بيە مەن ايعىر - 700 مىڭ - 1 ميلليون تەڭگە. قوي. قوي باعاسى اۋىلدا 50 مىڭ، توقتى 45 مىڭ تەڭگە. ال قالادا 70 مىڭ شاماسىندا.

سولتۇستىك قازاقستان تۇرعىندارىنىڭ بەرگەن دەرەگىنە سۇيەنسەك، بازاردا قوي ەتىنىڭ كەلىسى - 2,5 مىڭ تەڭگەگە جەتكەن. قۇربان ايت قارساڭىندا توقتىلاردى 35 مىڭ تەڭگەدەن باستاپ ساتىپ جاتىر.

جالپى ورتا باعا بىلتىرعىمەن بىردەي - 50 مىڭ تەڭگە شاماسىندا كورىنەدى. قىزىلجار ورتالىق مەشىتى قويدىڭ باعاسىن بيىل 65 مىڭ تەڭگە دەپ، قارا مالدى 350 مىڭ تەڭگە دەپ بەكىتكەن. ال قامبار اتا تۇلىگىنە كەلسەك، تايدىڭ ورتاشا باعاسى 400 مىڭ. ءبىراق 350، 380 مىڭ تەڭگەگە دە تابۋعا بولادى.

ال شىمكەنت بازارلارىنداعى باعا مىناداي:

قوي باعاسى 50 مىڭ تەڭگەدەن باستالادى. «ساۋدالاسۋعا يكەمىڭىز بولسا، ودان تۇسىرۋگە بولادى»، - دەيدى جەرگىلىكتى تۇرعىندار.

بۇل جاقتا مال ساۋداسىنىڭ دامىعانى سونشا، قۇربان ايتقا دەپ ارنايى سەمىرتىلگەن قوشقارلاردى الماتىدان اكەلىپ بەرەتىندەر بار. ونىڭ باعاسى 70 مىڭ تەڭگەدەن باستالىپ، 130 مىڭ تەڭگەگە دەيىن بارادى.

اسىرەسە ەدىلباي تۇقىمدى، تەگەنە قۇيرىق قويلاردىڭ باعاسى جوعارى.

ءىرى قاراعا كەلسەك، تورپاقتاردىڭ باعاسى 225 مىڭ تەڭگەدەن باستالادى. بۇزاۋلاردىڭ باعاسى 110 مىڭنان جوعارى. تايلار - 125 مىڭ تەڭگەدەن، ەرەسەك جىلقى 400-550 مىڭ تەگەدەن ساتىلىپ جاتىر. ەڭ جوعارى باعا 1,5 ميلليون تەڭگەگە دەيىن بارادى.

جامبىل وبلىسىندا سيىر باعاسى جاسىنا قاراي 150-250 مىڭ تەڭگەدەن باستالادى. قوي باعاسى بازاردا 35-50 مىڭنان باستالىپ تۇر. قىلقۇيرىق باعاسى 300 مىڭنان ءارى قاراي كەتەدى.

قىزىلوردا وبلىسىندا مال باعاسى تومەندەگىدەي:

جىلقى.

تايلار 230 مىڭنان جوعارى. بەستىدەن ۇلكەن جىلقى تۇلىگىنىڭ باعاسى 950 مىڭعا دەيىن بارادى. وگىز باعاسى 280-380 مىڭ اراسىندا.

قوي باعاسى 50 مىڭنان تومەن ەمەس. الماتى وبلىسىندا قوي - 50 مىڭنان باستالسا، جىلقى باعاسى 300 مىڭنان جوعارى. ءىرى قارانىڭ باعاسى جاسىنا قاراي 230 مىڭ تەڭگەدەن ءارى قاراي وسە بەرەدى.