ءى ءى م: ۆاكسينادان قاشقاندار الاياقتارعا جەم بولا باستادى
نۇر-سۇلتان. قازاقپارات - ىشكى ىستەر ماماندارى ينتەرنەتتە ۆاكسينالاۋ پاسپورتى مەن پ ت ر- تەست انىقتاماسىن ساتاتىن 46 جارنامانى انىقتاپ، بىرنەشە شەتەلدىك رەسۋرستى بۇعاتتاۋعا جىبەرگەن، دەپ حابارلايدى قازاقپارات.
ىشكى ىستەر مينيسترلىگىنىڭ باسپا ءسوز وكىلى شۇعىلا تۇرلىبەكتىڭ ايتۋىنشا، پوليتسيانىڭ بارلىق بولىمشەلەرىندە ارنايى مونيتورينگتىك توپتار قۇرىلىپ، ولار ينتەرنەت جەلىسىندە، الەۋمەتتىك جەلىلەردە جانە مەسسەندجەرلەردە، جەرگىلىكتى پابليكتەردە، جارنامالىق سايتتاردا ورنالاستىرىلاتىن جالعان قۇجاتتاردى ساتۋ جونىندەگى حابارلاندىرۋلاردى انىقتاپ، پىسىقتاپ جاتىر.
«پوليتسيا وسىنداي 46 جارنامانى انىقتادى. وندا جالعان ۆاكسيناتسيا پاسپورتتارى، وڭ نەمەسە تەرىس تەست ناتيجەلەرى بار انىقتامالار اقشاعا ۇسىنىلادى. اتالعان رەسۋرستاردا رەسەي فەدەراتسياسىندا، ۋكراينادا، ءۇندىستاندا جانە ا ق ش-تا مەديتسينالىق انىقتامالار مەن ۆاكسيناتسيا سەرتيفيكاتتارىن ساتۋ تۋرالى حابارلاندىرۋلار بار»، - دەيدى ءى ءى م وكىلى.
شۇعىلا تۇرلىبەكتىڭ ايتۋىنشا، كيبەرقىلمىسپەن كۇرەس ورتالىعىنىڭ ماماندارى الدىن الا تولەم الۋعا باعىتتالعان الاياقتىق سحەمالاردىڭ قالاي ىسكە اساتىنىن انىقتاعان. الاياقتار قارماققا ىلىنگەن ازاماتتارعا ۆاكسينانىڭ ءبىرىنشى كومپونەنتىن العانى تۋرالى مەملەكەتتىك ورگانداردىڭ رەسمي رەسۋرستارىنا جاتپايتىن بوگدە پوشتا جاشىكتەرىنەن حابارلاما جىبەرەدى. وسىعان الدانعان ازاماتتار 2 كومپونەنتتىڭ انىقتاماسى ءۇشىن سۇراعان اقشانى اۋدارىپ جىبەرەدى. اقشا تۇسكەن بويدا جارناما يەسى بايلانىس اياسىنان جوعالادى.
«ءبىرقاتار جاريالانىمداردى تالداۋ الاياقتاردىڭ شەتەلدىك بانكتەردىڭ كارتالارىن قولدانعانىن انىقتادى، ال «ساتۋشىلار» ۇنەمى وزگەرىپ تۇراتىن ۆيرتۋالدى تەلەفون نومىرلەرىن ءجيى قولدانادى. الدانعان ادامدار قۇقىق قورعاۋ ورگاندارىنا جۇگىنبەيدى، ويتكەنى ولار جالعان قۇجاتتاردى ساتىپ الۋ ارقىلى زاڭدى بۇزعاندارىن تۇسىنەدى. انىقتالعان شەتەلدىك رەسۋرستاردى قازاقستان اۋماعىندا بۇعاتتاۋ ءۇشىن ۋاكىلەتتى ورگانعا جىبەرىلدى. ىشكى ىستەر مينيسترلىگى ازاماتتارعا قىلمىستىق پروتسەسكە قاتىسۋدان اۋلاق بولۋعا جانە قانىداردى مۇنداي ارەكەتتەردەن ساقتاندىرۋعا شاقىرادى»، - دەيدى ۆەودمستۆونىڭ باسپا ءسوز وكىلى.
اۆتور: ەسىمجان ناقتىباي
