قىتايدىڭ وڭتۇستىك-باتىسىندا «دەلتا» شتامىنىڭ تارالۋىنا بايلانىستى لوكداۋن ەنگىزىلدى

بەيجىڭ. قازاقپارات - قىتاي- ميانما شەكاراسىنا جاقىن ورنالاسقان جۋيلي قالاسىنىڭ بيلىگى كوروناۆيرۋستىڭ «دەلتا» شتاممى تارالۋىنا بايلانىستى لوكداۋن جاريالادى، دەپ حابارلايدى قازاقپارات مەنشىكتى ءتىلشىسى.

جۋيلي قالاسىنىڭ (يۋننان پروۆينتسياسى، وڭتۇستىك-باتىس قىتاي) اكىمشىلىگى وسى اپتادا قالاعا كىرىپ-شىعاتىن بارلىق جولدى جاۋىپ، ۇيدە وقشاۋلانۋ رەجيمىن ەنگىزدى.

قاتاڭ كارانتين شارالارى ەنگىزىلدى، كوممەرتسيالىق كاسىپورىندار مەن مەملەكەتتىك مەكەمەلەر، مەكتەپتەر مەن تەحنيكۋمدار جابىلدى. سۋپەرماركەتتەر مەن ءدارىحانالاردىڭ جۇمىسى توقتاتىلدى.

جەرگىلىكتى تۇرعىندارعا ۇيدە وقشاۋلانۋعا شەشىم قابىلداندى، ازىق-تۇلىكتەر ۇيگە جەتكىزىلەتىن بولادى. جۋيلي قالاسىندا جانە ونىڭ ماڭىنداعى ەلدىمەكەندەردە كوروناۆيرۋس جۇقتىرۋ جاعدايلارىنىڭ كوپشىلىگى «سىرتتان اكەلىنگەن».

جۋيليدە ميانمامەن ترانسشەكارالىق ساۋدا جۇرگىزىلەدى. وسىعان بايلانىستى بيلىك شەكارالىق باقىلاۋ شارالارىن كۇشەيتتى. ميانمامەن شەكارالاس قىتايدىڭ جۋيلي قالاسىندا كوروناۆيرۋستىڭ ءورشۋى وسىمەن ءتورتىنشى رەت بولىپ وتىر، سوڭعىسى وسى جىلدىڭ ناۋرىز ايىندا بولعان ەدى.

ءۇشىنشى رەت جۋيلي قالاسىندا كوروناۆيرۋستىڭ تارالۋىنا بايلانىستى تولىق لوكداۋن ەنگىزىلدى.

جۇما كۇنى قىتايدىڭ دەنساۋلىق ساقتاۋ ىستەرى جونىندەگى مەملەكەتتىك كوميتەتىنىڭ حابارلاۋىنشا، وتكەن تاۋلىكتە ماتەريكتىك قىتايدا كوروناۆيرۋستى جەرگىلىكتى جۇقتىرۋدىڭ 8 جاڭا جاعدايى انىقتالدى، بارلىعى يۋننان پروۆينتسياسىنان.