تۇركيانىڭ تانىمال جۋرنالى ءبىر ءنومىرىن تولىقتاي تۇركىستان قالاسىنا ارنادى
باسىلىمنىڭ سوڭعى ءنومىرى «ياسساۋي جولىنىڭ سىرى، تۇركى الەمىنىڭ جۇرەگى - تۇركىستان» اتىمەن جارىق كوردى.
128 بەتتەن تۇراتىن جۋرنالعا تۇركيا پرەزيدەنتىنىڭ باس كەڭەسشىسى يالچىن توپچىنىڭ، حالىقارالىق تۇركسوي ۇيىمىنىڭ باس حاتشىسى دۇيسەن قاسەيىنوۆتىڭ، قازاقستاننىڭ تۇركياداعى ەلشىسى ابزال ساپاربەك ۇلىنىڭ، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەبايەۆتىڭ جانە تۇركيالىق بەلگىلى عالىمداردىڭ ماقالالارى مەن سۇحباتتارى توپتاستىرىلعان.
تۇركى الەمىنىڭ زيالىلارى تۇركىستان قالاسىنىڭ وتكەنى مەن بۇگىنى جانە بولاشاعى جايىندا سىر شەرتكەن.
ق. ا. ياساۋي اتىنداعى قازاق-تۇرىك ۋنيۆەرسيتەتىنىڭ زەرتتەۋشىسى فاتما سونمەزدىڭ تۇركيادان ارنايى كيەلى تۇركىستانعا بارىپ، قاسيەتتى جەرلەرىن ارالاپ كولەمدى جازعان ماقالاسى دا جۋرنال بەتىندە جارىق كورگەن.
