د د س ۇ باسشىسى پاندەميانىڭ وتە قاۋىپتى كەزەڭى باستالعانىن مالىمدەدى

نۇر-سۇلتان. قازاقپارات – كوروناۆيرۋس پاندەمياسىنىڭ وتە قاۋىپتى كەزەڭى باستالدى.

بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادانوم گەبرەيەسۋس مالىمدەدى، - دەپ حابارلايدى ريا نوۆوستي پورتالى.

ونىڭ ايتۋىنشا، قازىر ۆيرۋسپەن كۇرەسۋگە ارنالعان قۇرالدارى بار، ياعني ەڭ الدىمەن ۆاكسينالارى بار مەملەكەتتەر، شەكتەۋلەردى جەڭىلدەتىپ جاتىر.

«وسى ۋاقىتتا ءتيىمدى قۇرالدارى جوق ەلدەر اۋرۋحاناعا ءتۇسۋ جاعدايلارى مەن ءولىم تولقىنىنا تاپ بولدى. جاعدايدى ۆيرۋستىڭ جاڭا شتامدارى كۇردەلەندىرىپ وتىر»، - دەدى د د س ۇ باسشىسى.

گەبرەيەسۋستىڭ پىكىرىنشە، مۇنداي جاعدايدان شىعۋدىڭ جالعىز جولى - ەلدەر اراسىندا تەست، ۆاكسينا، ءدارى-دارمەكتەر مەن قورعانىس قۇرالدارىن تەڭ ءبولۋ.

«بۇل زىمىران قۇراستىرۋ دا، قايىرىمدىلىق تا ەمەس. بۇل جالپىعا ورتاق مۇددەگە جاۋاپ بەرەتىن قوعامدىق دەنساۋلىقتى سانالى ساقتاۋ»، - دەپ قوستى ول.

ۇيىم باسشىسى جاعداي جاقساراتىنىنا ءۇمىت بار ەكەنىن ايتتى، اتاپ ايتقاندا، بۇل ۆاكسينالاردى تاراتاتىن COVAX باعدارلاماسى. ول ەلدەردى وسى باعىتتا كۇش- جىگەردى ارتتىرۋعا شاقىردى.

COVAX - دۇنيەجۇزىلىك دەنساۋلىق ساقتاۋ ۇيىمىنىڭ ۆاكسينالار مەن يممۋنداۋ جونىندەگى جاھاندىق اليانسپەن (GAVI) جانە ەپيدەمياعا دايىندىق سالاسىنداعى يننوۆاتسيالار كواليتسياسىمەن بىرلەسىپ ىسكە قوسقان حالىقارالىق مەحانيزم، ول ءوندىرىس ورىندارىن قۇرۋدى جانە ساتىپ الۋدى قولدايدى.

باعدارلاما شارتتارىنا سايكەس، تابىسى جوعارى ەلدەر ۆاكسينالاردى ساتىپ الادى، وسىلايشا قارجىلاندىرىلاتىن مەملەكەتتەردى سۋبسيديالايدى.

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، پاندەميا باستالعاننان بەرى بۇكىل الەمدە 184 ميلليونعا جۋىق كوروناۆيرۋس جۇقتىرۋ دەرەگى تىركەلگەن، ءتورت ميلليونعا جۋىق ناۋقاس قايتىس بولعان. سوڭعى تاۋلىكتە ينفەكسيا جۇقتىرعاندار سانى 326 مىڭعا، ءولىم سانى 6347 گە ارتتى.

بۇعان دەيىن د د س ۇ دەنساۋلىق ساقتاۋ سالاسىنداعى توتەنشە جاعدايلار باعدارلاماسىنىڭ ديرەكتورى مايكل رايان الەمدە كوروناۆيرۋستىڭ تارالۋى تۇراقتالدى دەپ مالىمدەگەن بولاتىن.