فۋتبولدان قازاقستان بىرىنشىلىگى: كلۋبتار ەكى ايعا ۇزىلىسكە شىقتى
اتالعان تۋرداعى سوڭعى كەزدەسۋدە «تاراز» ءوز الاڭىندا اقتاۋدىڭ «كاسپي» كومانداسىن قابىلدادى.
ەكى كوماندانىڭ دا جەڭىسكە جەتۋ مۇمكىندىگى بولدى. دەسە دە الاڭ يەلەرى ءۇش ۇپايدى ولجالاپ كەتتى. ونى 56-مينۋتتا پەدرو ەۋجەنيو ءوزىنىڭ ەنشىسىنە جازدى.
ايتا كەتەرلىگى، تارازدىقتار ون ويىنعا سوزىلعان ساتسىزدىكتەر سەرياسىن توقتاتىپ، جەڭىسكە جەتتى. ال اقتاۋلىق فۋتبولشىلار ءتورت كەزدەسۋدە نەبارى ءبىر ۇپايعا قولى جەتتى.
ايتا كەتسەك، اتالعان تۋردا 2- شىلدەدە ءۇش ويىن وتكىزىلىپ، «قايرات» «اتىراۋدى» 5:0، «استانا» «شاحتەردى» 4:3، «اقتوبە» «اقجايىقتى» 2:1 ەسەبىمەن جەڭدى.
ودان كەيىن 3- شىلدەدە «جەتىسۋ» مەن « قىزىلجار» 0:0 ەسەبىمەن تەڭ ءتۇسىپ، «قايسار» «ورداباسىنى» 1:0 ەسەبىمەن جەڭسە، «تۇران» «توبىلعا» 2:4 ەسەبىمەن ەسە جىبەردى.
اتالعان تۋردان كەيىن «توبىل» 35 ۇپايمەن كوش باستاپ تۇر.
ودان كەيىنگى ورىندارداعى «استانانىڭ» 41، «قايراتتىڭ» 37 ۇپايى بار.
ەسكە سالساق، ەل بىرىنشىلىگىندە 20- قىركۇيەككە دەيىن ءۇزىلىس جاريالاندى. بۇل ارالىقتا قازاقستان كۋبوگى ويىندارى وتكىزىلەدى.
