نۇر-سۇلتاندا جاسىل جەلەك اپتاپ ىستىقتان قالاي قورعالادى؟

نۇر-سۇلتان. قازاقپارات - نۇر-سۇلتاندا شىلدە ايى اپتاپ ىستىقپەن باستالدى. سينوپتيكتەردىڭ ايتۋىنشا ءالى بىرنەشە كۇنگە سوزىلادى، دەپ حابارلايدى قازاقپارات قالا اكىمدىگىنە سىلتەمە جاساپ.

وسىعان وراي ەلوردا اكىمدىگى قالاداعى اعاشتار، بۇتالار، كوگالدار مەن گۇلزارلاردى سۋارۋ بويىنشا ارنايى توپتاردى جۇمىلدىردى.

«اۋا رايى كۇرت ىسىپ، تەمپەراتۋرا 36 جانە ودان جوعارى گرادۋسقا دەيىن كوتەرىلەدى. وسىعان بايلانىستى كوشە-جول جەلىسىن قارقىندى جۋۋ تۋرالى شەشىم قابىلداندى»، - دەدى «استانا- زەلەنستروي» ج ش س رەسمي وكىلى رۇستەم نۇرساعيتوۆ.

ەلوردانىڭ ءتورت اۋدانىندا ونداعان ارنايى تەحنيكا كۇندىز-ءتۇنى ەكى اۋىسىممەن جۇمىس ىستەيدى. تۇنگى سۋارۋ جۇمىسى كۇن سايىن كەشكى 7 دەن تاڭعى 5 كە دەيىن جۇرگىزىلەدى.

قالالىق كوممۋنالدىق قىزمەتتەر جاسىل جەلەكتەردەن بولەك، جولعا، تروتۋارلارعا، اۋلالار مەن اۆتوتۇراقتارعا سۋ سەبۋمەن دە اينالىسادى.

سۋارۋ ۋاقىتى سۋدىڭ از بۋلاناتىن، سونداي-اق ارنايى تەحنيكانىڭ كولىك قوزعالىسىنا كەدەرگى كەلتىرمەيتىن ۋاقىتىنا سايكەس كەلەدى.

ايتا كەتۋ كەرەك، ساياباقتاردا، گۇلزارلاردا جانە قالانىڭ باسقا دا قوعامدىق كەڭىستىكتەرىندە اعاشتار مەن جاسىل جەلەكتەردى سۋارۋ اۆتوماتتى جۇيە ارقىلى جۇزەگە اسىرىلادى.