بۇگىن - ديپلوماتيالىق قىزمەت كۇنى
ءدال وسى كۇنى پرەزيدەنت نۇرسۇلتان نازاربايەۆتىڭ «ق ر سىرتقى ىستەر مينيسترلىگى تۋرالى»، «قازاقستان رەسپۋبليكاسىنىڭ ەلشىلىگى تۋرالى» جانە «ق ر توتەنشە جانە وكىلەتتى ەلشىسىنىڭ نەگىزگى مىندەتتەرى مەن قۇقىقتارى تۋرالى» ەرەجەلەردى بەكىتۋ تۋرالى جارلىعى شىقتى. «ق ر پرەزيدەنتىنىڭ 1998 -جىلعى 20 قاڭتارداعى «قازاقستان رەسپۋبليكاسىنداعى كاسىبي جانە وزگە دە مەرەكەلەر تۋرالى» №3827 جارلىعىنا تولىقتىرۋلار ەنگىزۋ تۋرالى» ق ر پرەزيدەنتىنىڭ 2009 -جىلعى 1-شىلدەدەگى № 837 جارلىعىمەن كاسىبي جانە وزگە دە مەرەكەلەر تىزبەسىنە 2-شىلدە - ديپلوماتيالىق قىزمەت كۇنى دەپ تولىقتىرىلدى.
«ديپلوماتتار سويلەگەندە زەڭبىرەكتىڭ ءۇنى شىقپايدى» دەگەن قاناتتى ءسوز بار. وسىنىڭ وزىنەن- اق وتە ەجەلدەن كەلە جاتقان ديپلوماتيا قۇبىلىسىنىڭ ەڭ نەگىزگى مىندەتى ەلدەستىرۋ، ءبىتىستىرىپ، بەيبىتتەستىرۋ ەكەنىن ۇعىنامىز. قازاقستان دا ءوز تاۋەلسىزدىگىنىڭ العاشقى جىلدارىنان باستاپ بەيبىت دامۋ جولىن ۇستانعان ديپلوماتياسىن حالىقارالىق ساياسات ساحناسىنا الىپ شىقتى. ناتيجەسىندە ەلىمىز يادرولىق قارۋسىزدانۋ مەن يادرولىق قارۋدى تاراتپاۋدان باستاپ، داعدارىستاردى رەتتەۋ، قاۋىپسىزدىكتى نىعايتۋ، ەلدەرمەن ەكونوميكالىق ىنتىماقتاستىق ورناتۋ، ءىرى حالىقارالىق ۇيىمداردى باسقارۋ سەكىلدى قازاقستاندىق ديپلوماتيانىڭ فەنومەنىن قالىپتاستىردى. سىندارلى سىرتقى ساياساتتىڭ ارقاسىندا قازاقستان ەگەمەندىك مۇددەنى، قاۋىپسىزدىك پەن اۋماقتىق تۇتاستىقتى قورعاپ، مەملەكەتتەرمەن ءوزارا ءتيىمدى قارىم قاتىناستاردا جانە حالىقارالىق ارەنادا ەلىمىزدىڭ ساياسي، ساۋدا- ەكونوميكالىق مۇددەلەرىن قامتاماسىز ەتىپ كەلەدى.
قازاقستان ب ۇ ۇ مۇشە ەلدەرىمەن جان- جاقتى ديپلوماتيالىق بايلانىسىن جانداندىردى. 186 مەملەكەتپەن ديپلوماتيالىق قاتىناستار ورناتىلعان. شەت ەلدەردە قازاقستان رەسپۋبليكاسىنىڭ 66 ەلشىلىگى، 17 باس كونسۋلدىعى، 2 ديپلوماتيالىق ميسسياسى، 11 كونسۋلدىعى، حالىقارالىق ۇيىمدار جانىنداعى 5 تۇراقتى وكىلدىگى بار. 1992 -جىلى بىرىككەن ۇلتتار ۇيىمىنا مۇشە بولعان سوڭ، ەڭ ءىرى الەمدىك جانە ايماقتىق دەڭگەيدەگى ۇيىمدارعا مۇشە اتانا باستادى.
بۇگىندە قازاقستان ەۋرازيالىق ەكونوميكالىق وداق، شانحاي ىنتىماقتاستىق ۇيىمى، يسلام ىنتىماقتاستىق ۇيىمى، ازياداعى ءوزارا ءىس- قيمىل جانە سەنىم شارالارى كەڭەسى جانە باسقا دا حالىقارالىق ۇيىمداردىڭ بەلدى مۇشەسى. 2017-2018 -جىلدارعا ب ۇ ۇ- نىڭ قاۋىپسىزدىك كەڭەسىنە تۇراقتى ەمەس مۇشە بولىپ سايلاندى. قازاقستاننىڭ قاتىسۋىمەن 4163 حالىقارالىق كەلىسىمشارتتارعا قول قويىلعان.
