د د س ۇ باسشىسى جاڭا پاندەمياعا دايىندالۋعا ۇندەدى
بۇل تۋرالى دۇيسەنبىدە دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) باس ديرەكتورى تەدروس ادان گەبرەيەسۋس ءمالىم ەتتى، دەپ حابارلايدى قازاقپارات ت ا س س اگەنتتىگىنە سىلتەمە جاساپ.
«ءبىز ءبارىمىز پاندەميا ۇيرەتەتىن ساباقتاردى ۇيرەنۋىمىز كەرەك»، - دەدى. د د س ۇ باسشىسى اتاپ وتكەندەي، «جاڭا ەپيدەميالار مەن پاندەميالارعا دايىندىق، ولاردىڭ الدىن الۋ، انىقتاۋ جانە ولارعا جەدەل ارەكەت ەتۋ ءۇشىن دەنساۋلىق ساقتاۋ قىزمەتتەرىمەن جاپپاي قامتۋ جانە العاشقى مەديتسينالىق كومەك نەگىزىندە بارلىق مۇمكىندىكتى جاساۋ كەرەك»، - دەدى تەدروس ادان گەبرەيەسۋس شاعىن ارال مەملەكەتتەرىنىڭ دەنساۋلىق ساقتاۋ سامميتىنە قاتىسۋشىلارعا تەلەبايلانىس ارقىلى سويلەگەن سوزىندە.
COVID-19 پاندەمياسى تۋرالى ايتا وتىرىپ، گەبرەيەسۋس «ۆاكتسينالىق تەڭسىزدىك پەن ۆاكسينالىق ۇلتشىلدىققا» نازار اۋداردى، بۇل «تابىسى جوعارى جانە تومەن ەلدەر اراسىنداعى الشاقتىقتى» ارتتىردى. ونىڭ ايتۋىنشا، كوروناۆيرۋسقا قارسى بارلىق ەكپەنىڭ %77- ى قازىر الەمنىڭ 10 مەملەكەتىنە تيەسىلى «ەگەر ەلدەر ۆاكسينالاردى دەرەۋ COVAX مەحانيزمىمەن بولىسسە جانە وندىرۋشىلەر COVAX تاپسىرىستارىنا باسىمدىق بەرسە، وندا ءبىز قىركۇيەككە قاراي ءار ەلحالقىنىڭ كەم دەگەندە %10 ىن جانە جىلدىڭ سوڭىنا دەيىن كەم دەگەندە %40 ىن ۆاكسينالاي الامىز»، - دەدى باس ديرەكتور.
ول قىركۇيەككە دەيىن «ۆاكسينانىڭ قوسىمشا 250 ميلليون دوزاسىن» ىزدەۋ كەرەك ەكەنىن ەسكە سالدى. د د س ۇ COVAX مەحانيزمىنە ۇلكەن ءمان بەرەدى. باعدارلاما شارتتارىنا سايكەس، تابىسى جوعارى ەلدەر جان باسىنا شاققانداعى تابىسى تومەن مەملەكەتتەر ءۇشىن ۆاكسينالاردى ساتىپ الۋعا تولەم جاسايدى.
مەحانيزم اياسىندا 2021 -جىلدىڭ سوڭىنا قاراي بۇكىل الەمدە كوروناۆيرۋسقا قارسى ۆاكسينالاردىڭ 2 ميلليارد دوزاسى ءوندىرىلىپ، بىركەلكى تاراتىلۋى كەرەك دەپ جوسپارلانۋدا.
