ماڭعىستاۋ وبلىسىندا اۋىل مەكتەبىنىڭ مۇعالىمى شيگە سۋرەت سالۋدى ۇيرەتۋدە - ۆيدەو

اقتاۋ. قازاقپارات - ماڭعىستاۋ وبلىسىنداعى سايوتەس ورتا مەكتەبى بەينەلەۋ ونەرى ءپانىنىڭ مۇعالىمى حيۋاز دەمەۋوۆا وقۋشىلارعا ارناپ شەبەرلىك ساباعىن وتكىزەدى، دەپ حابارلايدى قازاقپارات ءتىلشىسى.

ول سۋرەت ۇيىرمەسىنە جەتەكشىلىك ەتەدى. شەبەر ۇستاز بالالاردىڭ سۋرەت سالۋعا قىزىعۋشىلىعىن ارتتىرۋ ماقساتىندا «گوبەلەن» دەپ اتالاتىن ەرەكشە جوبانى قولعا العان.

«گوبەلەن ونەرى ۇزاق، قاجىرلى ەڭبەكتى تالاپ ەتەدى. ياعني ورنەكتى شي توقۋدىڭ ءبىر ءتۇرى. الدىمەن قاعازعا شىعارمانىڭ ەسكيزىن سالامىز. سودان سوڭ ولشەمىن، بوياۋ پاليتراسىن تاڭدايمىز. ەسكيز دايىن بولعاننان كەيىن ءتۇرلى- ءتۇستى جىپتەر مەن قاجەتتى قۇرالداردى دايىندايمىز. قۇرىلعى (ستانوك) سۇرگىلەنگەن اعاشتان جاسالىپ، ۋاق شەگەلەر قاعىلادى. گوبەلەندى توقۋ جۇمىسى اياقتالعاندا ارقاۋ جىپتەرى قيىلىپ، شاشاقتالادى. ونەردىڭ بۇل ءتۇرى بالالاردىڭ وي ءورىسىن، تانىم دەڭگەيىن اسەمدىككە تاربيەلەيدى»، - دەدى حيۋاز دەمەۋوۆا.

ونىڭ ايتۋىنشا، بۇل ىستە ءار بوياۋدىڭ ءتۇسى مەن ۇيلەسىمدىلىگىن ءتۇسىنۋ ماڭىزدى. تالانتتى ءمۇعالىم شەبەرلىك ساباقتارىن بالالاردى قولونەردىڭ سان تۇرىنە باۋلۋ ءۇشىن ۇيىمداستىرادى. ەندى وقۋشىلاردىڭ جازعى دەمالىسىن ءتيىمدى وتكىزۋ ماقساتىندا ۇرشىق ءيىرىپ، ءجۇن ءتۇتىپ، ەرمەكساز بەن كارتوننان جاڭا تۋىندىلاردى جاساۋدى جوسپارلاپ وتىر.

اۆتور: قاراكوز مارات