ۇكىمەت باسشىسىنىڭ ورىنباسارى قازاقستاندىقتارعا ۇندەۋ جاسادى

نۇر- سۇلتان. قازاقپارات - ق ر پرەمەر-ءمينيسترىنىڭ ورىنباسارى ەرالى توعجانوۆ قازاقستاندىقتاردى كوروناۆيرۋسقا قارسى ۆاكسينا الۋعا شاقىردى، دەپ حابارلايدى قازاقپارات ءتىلشىسى.

«ازاماتتاردىڭ دەنساۋلىعى مەن ءومىرىن ساقتاۋ ۇكىمەتتىڭ باستى مىندەتتەردىڭ ءبىرى. سوندىقتان ساقتىق ءىس- شارالارىن ۇستانۋعا شاقىرامىز. ۆيرۋس ەشقايدا كەتكەن جوق. ەپيدەميولوگيالىق جاعدايدىڭ ودان ارى قالاي وزگەرەتىندىگى وزىمىزگە، ءارقايسىمىزعا، ءار ازاماتتىڭ جاۋاپكەرشىلىگىنە تىكەلەي بايلانىستى ەكەندىگىن ايتقىم كەلەدى. وكىنىشكە وراي، ءبىز كۇن سايىن كوروناۆيرۋستىڭ سالدارىنان ازاماتتارىمىزدان ايىرىلۋدامىز. ونى دا ءبىلىپ وتىرعاندارىڭىز ارتىق بولمايدى. ەگەر حالىقتىڭ باسىم بولىگى ۆاكسيناتسيانى ۋاقىتىلى جاساعان بولسا، وندا بۇل جاعدايلاردىڭ الدىن الۋعا بولاتىندىعىنا ەشقانداي كۇمان جوق. حالقىمىز: «اۋىرىپ ەم ىزدەگەنشە، اۋىرمايتىن جول ىزدە» دەيدى. وسى جولمەن ءجۇرۋ كەرەكتىگىن 1 -جىلدىڭ ىشىندە ورىن العان جايت دالەدەپ وتىر»، - دەدى ۇكىمەت باسشىسىنىڭ ورىنباسارى ورتالىق كوممۋنيكاتسيالار قىزمەتىندەگى بريفينگتە.

ونىڭ ايتۋىنشا، ۆاكسينا ىندەتتەن ساقتانۋدىڭ نەگىزگى جولى. ودان باسقا ازىرشە الەمدە ەشقانداي جول جوق.

«سوندىقتان وسى ۆاكسينانى الىپ ۇلگەرمەگەن ءاربىر ازامات، قازاقستاندىق تەز ارادا ۆاكسينا قابىلداۋى كەرەك. ءارقايسىمىز قوعام الدىنداعى، وتباسىمىز بەن كۇندەلىكتى ارالاسىپ جۇرگەن جاقىندارىمىزدىڭ، ارىپتەستەرىمىزدىڭ، دوستارىمىزدىڭ الدىنداعى ازاماتتىق جاۋاپكەرشىلىگىمىزدى ءىس جۇزىندە كورسەتەتىن ۋاقىت جەتتى»، - دەدى ەرالى توعجانوۆ.