ايەلدەردىڭ ماڭىزدى ونەرتابىستارى
نۇر-سۇلتان. قازاقپارات - ايەلدەر ونەرتابىس سالاسىندا ايتارلىقتاي جەتىستىككە جەتپەگەن دەسەڭىز قاتەلەسەسىز.
ولار عاسىرلار بويى عىلىمدا كەمسىتىلىپ كەلدى. كەيدە ايەلدەرگە پاتەنت الۋ، ونەرتابىسىن تانۋ ءۇشىن كۇرەسۋگە تۋرا كەلدى. مىسالى قاعاز قاپتاردى ويلاپ تاپقان مارگارەت نايتتىڭ يدەياسى ۇرلانىپ، ول سوتتا ونەرتابىسىن قورعاپ جەڭىسكە جەتتى.
بۇگىن ءبىز ايەلدەر ويلاپ تاۋىپ، ءالى دە قولدانىلاتىن ونەرتابىستار تۋرالى باياندايمىز.
كيەۆلار - ستەفاني كۆولەك
ستەفاني كۆولەك حيميك بولعان. 1965-جىلى ول بولاتتان 5 ەسە كۇشتى جەڭىل ماتەريال ويلاپ تاپتى. ونىڭ ونەرتابىسى وق وتپەيتىن جيلەتتە، قولعاپ، ۇيالى تەلەفون، اسپالى كوپىرلەر مەن ۇشاقتار سياقتى ءتۇرلى بۇيىمداردى جاساۋدا كەڭىنەن قولدانىلادى.
سىرتقى ءورت ساتىسى - اننا كوننەللي
اننا كوننەلليدىڭ ءومىرى تۋرالى كوپ نارسە بەلگىسىز، ءبىراق ونىڭ ءورت كەزىندە قولداناتىن ساتىسىن ويلاپ تابۋى سىرتقى ءورت باسپالداقتارىنىڭ باستاماسى بولدى. اننا 1887-جىلى قۇرىلعىنى پاتەنتتەدى، ال قازىر بۇل كوپتەگەن ءىرى قالالاردا ءورت قاۋىپسىزدىگىن قامتاماسىز ەتۋدىڭ ماڭىزدى تەحنيكاسى بولىپ ەسەپتەلەدى.
اۆتوكولىك پەشى - مارگارەت ا. ۋيلكوكس
مارگارەت ا. ۋيلكوكس 1838-جىلى يللينويس شتاتىنداعى چيكاگودا دۇنيەگە كەلگەن. ⅩⅨ عاسىر 90-جىلدارىنىڭ باسىندا ول ءبىرقاتار ونەرتابىستارىمەن، سونىڭ ىشىندە ارالاس ىدىس جۋعىش ماشينا جانە كىر جۋعىش ماشينانى ويلاپ تابۋى ارقىلى تانىمال بولدى.
اۆتوكولىك جىلىتقىشىنىڭ ونەرتابىسىنا پاتەنتتى مارگارەت 1893-جىلى 28- قاراشادا العان. قۇرىلعى سالوننان تىس ورناتىلعان سۋ كۇرتەسى بار قازاندىقتان جانە قىزدىرىلعان سۇيىقتىق اينالاتىن مەتالل قۇبىرلاردان قۇرالدى.
مارگارەت ۋيلكوكس پاتەنتتەگەن ونەرتابىستىڭ ماڭىزدى بولعانى سونشالىق، جوبالىق ديزاين ءالى كۇنگە دەيىن ۆەباستو نەمەسە ەبسپاحەر سياقتى اۆتونومدى جىلىتقىش جاساۋ ءۇشىن قولدانىلادى.
ورتالىق جىلۋ جۇيەسى - ەليس پاركەر
1919-جىلى ەليس پاركەر ورتالىقتاندىرىلعان گازدى جىلىتۋ جۇيەسىن جاسادى. ونىڭ جوباسى بويىنشا ەشتەڭە سالىنباعانىمەن، يدەيا شىنىندا دا جاڭاشىل ەدى. ەليستىڭ يدەياسى قازىرگى زامانعى ورتالىق جىلىتۋ جۇيەلەرىن جاساۋشىلارعا شابىت بەردى.
كومپيۋتەرلىك الگوريتم - ادا لاۆلەيس
لورد بايروننىڭ قىزى ادا كينگ نوەل-لاۆلەيس تاماشا ماتەماتيك بولعان. ول ماتەماتيكالىق الگوريتمدەردى پايدالانىپ ماشينانى باعدارلامالاۋ ءادىسىن ويلاپ تاپتى. باسقاشا ايتقاندا، ول العاشقى «كومپيۋتەرلىك باعدارلامانى» جاسادى.
عارىش ستانتسياسىنىڭ باتارەيالارى - ولگا د. گونسالەس- سانابريا
ولگا د. گونسالەس- سانابريا - پۋەرتو-ريكونىڭ ونەرتاپقىشى جانە عالىمى. ول 1980-جىلدارى نيكەل-سۋتەگى باتارەياسىن قۇرۋعا كومەكتەسەتىن تەحنولوگيانى جاسادى. بۇل اككۋمۋلياتورلار حالىقارالىق عارىش ستانتسياسىنا قۋات بەرۋگە قولدانىلدى.
دوڭگەلەك ارا - تابيتا بەببيت
تابيتا بەببيت العاشقى بولىپ ءداستۇرلى ەكى قولدى ارا ورنىنا دوڭگەلەك ارا قولدانۋدى ۇسىندى. 1813-جىلى ول دوڭگەلەك ءجۇزدىڭ ءپروتوتيپىن جاساپ، اينالمالى دوڭگەلەككە بەكىتكەن. وسىلايشا ءبىز بۇگىندە قولدانىلاتىن ەلەكترلى ارانىڭ نەگىزىن قالادى.
كۇنمەن جىلىتىلاتىن ۇيلەر - ماريا تەلكەس
دوكتور ماريا تەلكەس - فيزيك جانە كۇن ەنەرگياسىنڭ ينجەنەرى. 1948-جىلى ول ساۋلەتشى ەلەونورا رايموندپەن بىرلەسىپ دوۆەردەگى ءۇيدى جىلىتۋعا ارنالعان تەرموەلەكترلىك گەنەراتور ويلاپ تاپتى. جۇيە ءۇيدى 10 كۇن جىلى ۇستاۋعا ارنالعان ەدى. ال جاڭا تەحنولوگيانى تەكسەرۋ ءۇشىن ماريا ءوزىنىڭ بىرنەشە تۋىستارىن وسى ۇيگە ۋاقىتشا ورنالاستىرعان.
كوررەكتور سۇيىقتىعى - بەتت نەسميت گرەم
ⅩⅩ عاسىرداعى جازۋ ماشينكاسىندا بىرنەشە ءارىپ قاتەلەرى كەتەتىن. ونى قايتا ءوشىرۋ مۇمكىن ەمەس ەدى. وتكەن عاسىردىڭ 50-جىلدارىندا بانكتە قىزمەت ەتكەن گرەم، تەرەزە بوياپ جاتىپ، جازۋ ماشيناسى قاتە جىبەرگەن ءارىپتى بوياسا قالاي بولادى دەپ ويلادى. ول وسىلاي قاتە ارىپتەردى اق بوياۋمەن 5 جىل بويى بوياپ ءجۇردى. ول بىرنەشە جىل بويى فورمۋلاسىن جەتىلدىرىپ، Mistake Out (سۇيىق قاعازدى) پاتەنتتەدى.
1979-جىلى بەت نەسميت ءوزىنىڭ ونەرتابىسىن Gillette كورپوراتسياسىنا 47,5 ميلليون دوللارعا ساتتى.
massaget.kz
