شارىندا وقۋشىلاردى قۇتقارۋ كەزىندە قازا تاپقان مۇعالىم «ەرلىگى ءۇشىن» مەدالىمەن ماراپاتتالدى

نۇر- سۇلتان. قازاقپارات - ق ر پرەزيدەنتى جارلىعىمەن شارىن شاتقالىندا وقۋشىلاردى قۇتقارۋ كەزىندە قازا تاپقان مۇعالىمدى «ەرلىگى ءۇشىن» مەدالىمەن ماراپاتتادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

«ادام ءومىرىن ساقتاپ قالۋعا بايلانىستى قيىن- قىستاۋ جاعدايدا كورسەتكەن ەرجۇرەكتىگى مەن جانقيارلىعى ءۇشىن الماتى قالاسى «№ 199 مامانداندىرىلعان گيمنازيا» ك م م مۇعالىمى مەرەي نۇرعازى ۇلى يبراگيموۆ «ەرلىگى ءۇشىن» مەدالىمەن ناگرادتالسىن (مارقۇم)»، دەلىنگەن قۇجاتتا.

الماتى قالاسى ءبىلىم باسقارماسىنىڭ مالىمەتىنشە، 26 جاستاعى مەرەي يبراگيموۆ كوركەمونەر پاندەرىنەن ساباق بەرگەن. ەڭبەك ءوتىلى - 5 جىل. كەيىنگى 3 جىلدا ول №199 گيمنازيادا جۇمىس ىستەگەن.

ەستەرىڭىزگە سالا كەتسەك، 29 -مامىر كۇنى الماتى وبلىسىنىڭ شارىن شاتقالىندا سەل ءجۇرىپ، 2 ادام مەرت بولعانى، تاعى بىرەۋىنىڭ ءىز- ءتۇزسىز جوعالعانى حابارلانعان بولاتىن. كەيىن ءبىلىم جانە عىلىم مينيسترلىگى اتالعان وقيعا سالدارىنان 1 وقۋشى مەن 1 مۇعالىمنىڭ قازا تاپقانىن، تاعى ءبىر وقۋشىنى ىزدەۋ جۇمىسى جۇرگىزىلىپ جاتقانىن ءمالىم ەتكەن ەدى.

«شارىن شاتقالى» قىزمەتكەرلەرى شارىن وزەنىنىڭ بويىن جاعالاي جەر بەتىندە ىزدەۋ- قۇتقارۋ جۇمىستارىن جۇرگىزۋ بارىسىندا 30 -مامىر تاڭعى ساعات 09:34-تە 11 جاستاعى قىز بالانى تاپتى. ول شارىن وزەنىنىڭ سول جاعالاۋىندا وقيعا ورنىنان 3-4 شاقىرىم جەردەن تابىلعان. شارىن شاتقالىندا سەلگە اققان قىز بالا قۇتقارىلعان ءسات بەينەلەنگەن ۆيدەو جاريالاندى. شارىن شاتقالىندا جوعالعان 11 جاسار قىز وقيعانىڭ قالاي بولعانىن ايتىپ بەردى. الماتى قالالىق ءبىلىم باسقارماسى شارىن شاتقالىنا ەكسكۋرسيا مەكتەپ اكىمشىلىگىمەن كەلىسىلمەگەنىن جەتكىزدى.