قىرعىزستان پرەزيدەنتى قازاقستانمەن ەكىجاقتى ىنتىماقتاستىقتى جوعارى باعالادى
م. تىلەۋبەردى قازاقستان پرەزيدەنتى قاسىم- جومارت توقايەۆتىڭ اتىنان قىرعىزستان حالقىنا گۇلدەنۋ مەن اماندىق تىلەگەن جىلى لەبىزدەرىن جەتكىزدى.
سونىمەن بىرگە، ول مەملەكەت باسشىسىنىڭ قىرعىز رەسپۋبليكاسىمەن ءوزارا ءتيىمدى ىنتىماقتاستىقتىڭ تۇراقتى دامۋىنا تەرەڭ مۇددەلى ەكەنىن اتاپ ءوتتى. مينيستر قازاقستان مەن قىرعىزستان تاريحي باۋىرلاستىق بايلانىستارمەن بايلانعانىن، بۇل ءبىزدىڭ ەلدەرىمىز اراسىنداعى جان- جاقتى جانە كوپ قىرلى ىنتىماقتاستىقتىڭ ايعاعى ەكەنىن اتاپ ءوتتى. سونىمەن قاتار، پرەزيدەنت س. جاپاروۆتىڭ جاقىندا نۇر-سۇلتان قالاسىنا جاساعان مەملەكەتتىك ساپارى ەكىجاقتى قارىم- قاتىناستارعا قۋاتتى سەرپىن بەرگەنىن ايتىپ كەتتى.
«قازاقستان ساۋدا- ەكونوميكالىق جانە ينۆەستيتسيالىق ءوزارا ءىس- قيمىلدى ارتتىرۋعا مۇددەلى. بۇل ءۇشىن ءبىزدىڭ ەلدەرىمىزدىڭ قاجەتتى الەۋەتى بار»، - دەدى م. تىلەۋبەردى. ءوز كەزەگىندە قىرعىزستان پرەزيدەنتى ەكىجاقتى ءوزارا ءىس- قيمىلدىڭ قازىرگى جاعدايىن جوعارى باعالاپ، بارلىق قازاقستاندىق باستامالار مەن ينۆەستيتسيالىق جوبالارعا جەكە قولداۋ كورسەتەتىنىن ايتتى.
«ءبىز قازاقستانمەن، جاقىن كورشىمىزبەن جانە دوستاس رەسپۋبليكامەن قارىم- قاتىناسىمىزدى وتە جوعارى باعالايمىز. ءبىز قىرعىز- قازاق جەمىستى ىنتىماقتاستىعىن ودان ءارى كەڭەيتۋگە جانە تەرەڭدەتۋگە دايىنبىز»، - دەپ تولىقتىردى س. جاپاروۆ.
كەزدەسۋ بارىسىندا وڭىرلىك جانە حالىقارالىق كۇن تارتىبىندەگى ماسەلەلەر، سونداي- اق جاقىن اراداعى جوعارى جانە اسا جوعارى دەڭگەيدەگى كەزدەسۋلەردىڭ كەستەسى تالقىلاندى. تاراپتار قازاق- قىرعىز ساياسي ءوزارا ءىس- قيمىلىنىڭ اۋقىمىن كەڭەيتۋگە جانە قازىرگى ساياسي بايلانىستاردى نىعايتۋعا ەرەكشە ءمان بەرۋ قاجەتتىگىن اتاپ ءوتتى.
ساپار سوڭىندا قازاقستاندىق دەلەگاتسيا ۇلى قازاق اقىنى جانە ويشىلىنىڭ 175 جىلدىعىن مەرەكەلەۋ اياسىندا اشىلعان بىشكەكتەگى اباي اتىنداعى قىرعىز- قازاق مادەنيەت ورتالىعىندا بولدى. ورتالىقتىڭ قىزمەتى تانىمال اقىننىڭ شىعارماشىلىعىن دارىپتەۋگە جانە قىرعىزستان مەن قازاقستان اراسىنداعى مادەنيەتارالىق بايلانىستار مەن گۋمانيتارلىق ىنتىماقتاستىقتى نىعايتۋعا باعىتتالعان.
