بۇگىن مەكتەپتەردە سوڭعى قوڭىراۋ سوعىلادى

نۇر- سۇلتان. قازاقپارات - بۇگىن ەلىمىزدەگى مەكتەپتەردىڭ بارىندە سوڭعى قوڭىراۋ سوعىلىپ، تۇلەكتەر ۇلكەن ومىرگە قانات قاعادى، دەپ حابارلايدى قازاقپارات ءتىلشىسى.

پاندەميا وسىمەن ەكىنشى جىل قاتارىنان مەكتەپتەردەگى سوڭعى قوڭىراۋ راسىمىنە وزگەرىس ەنگىزىپ وتىر. 2020-2021 وقۋ جىلىندا 3 ميلليون 400 مىڭ بالا مەكتەپتە ءبىلىم الدى. ونىڭ ىشىندە قورىتىندى اتتەستاتتاۋعا باراتىن 264800 دەن استام 9 سىنىپ تۇلەگى، 154400 دەن استام 11 سىنىپ تۇلەگى بار. ءبىلىم جانە عىلىم مينيسترلىگى بيىلعى سوڭعى قوڭىراۋ شارالارىن ءۇش ءتۇرلى فورماتتا وتكىزۋگە رۇقسات بەرىپ وتىر. مەكتەپكە دەيىنگى جانە ورتا ءبىلىم بەرۋ كوميتەتىنىڭ ءتوراعاسى مايرا مەلدەبەكوۆانىڭ ايتۋىنشا، ءداستۇرلى فورماتتاعى سوڭعى قوڭىراۋ نەگىزىنەن 9 جانە 11 سىنىپ تۇلەكتەرى ءۇشىن ۇيىمداستىرىلماق. ءبىراق وزگە سىنىپتارعا جاپپاي شەكتەۋ قويىلىپ وتىرعان جوق.

«ەرتەڭ - ەلىمىزدەگى مەكتەپتەردىڭ ءبارى ءۇشىن سوڭعى قوڭىراۋ كۇنى. ونى وتكىزۋ فورماتى بويىنشا ءبىلىم جانە عىلىم مينيسترلىگىنىڭ تاراپىنان مەتوديكالىق نۇسقاۋلىق جىبەرىلدى. ناقتىراق ايتساق، بىرنەشە فورمات ۇسىنىلدى. بىرىنشىدەن، اتتەستات الاتىن سىنىپتار ءۇشىن مەكتەپتەگى سوڭعى قوڭىراۋ ەكەنىن ەسكەرە وتىرىپ، 9-11 سىنىپتارعا ءداستۇرلى فورماتتا وتكىزۋدى ۇسىندىق. ەكىنشى فورمات بويىنشا ءار سىنىپ جەكە وتكىزە الادى. جەكە وقۋشىلاردى شاقىرىپ تا، سىنىپ ساعاتى رەتىندە دە وتكىزۋگە بولادى. ۇشىنشىدەن، وزدەرى ۇيرەنگەن ونلاين فورمات بويىنشا وتكىزە الادى»، - دەيدى مايرا مەلدەبايەۆا.

ەلدەگى ەپيدەميولوگيالىق احۋالعا بايلانىستى تۇلەكتەرگە اتتەستات تاپسىرۋ سالتاناتى ءار مەكتەپتىڭ اۋلاسىندا ءوتۋى ءتيىس. ياعني، بۇرىنعىداي ورتالىق الاڭداردا سالتاناتتى شارالار ۇيىمداستىرۋعا تىيىم سالىنىپ وتىر. ءبىلىم جانە عىلىم مينيسترلىگى اتتەستات تاپسىرۋ سالتاناتىنىڭ سوڭىن دۋماندى كەشكە ۇلاستىرۋعا دا جول بەرىلمەيتىنىن ەسكەرتتى.

«بىرىنشىدەن، بۇل ءىستى جەرگىلىكتى اتقارۋشى ورگاندار قاداعالاۋى كەرەك. ءبىلىم جانە عىلىم مينيسترلىگى تاراپىنان مەتوديكالىق نۇسقاۋ بەرىلدى. سالتاناتتى شارا تەك مەكتەپتىڭ اۋلاسىندا بولادى. ياعني، اتتەستات تاپسىرۋ ءراسىمى كەستە بويىنشا وتەدى. ودان ءارى قاراي جالعاستىرىپ، كەش ۇيىمداستىرۋعا مۇلدەم تىيىم سالىنعان. مۇعالىمدەر وقۋشىلار اتتەستات العانشا بايلانىستا بولادى. ءاربىر وقۋشى، ءاربىر اتا- انا، ءاربىر ءمۇعالىم قاۋىپسىزدىك ءۇشىن تىيىم سالىنىپ وتىرعانىن ءتۇسىنۋى كەرەك. سانتيتارلىق- ەپيدەميولوگيالىق احۋالعا بايلانىستى تۇسىنىستىكپەن قاراعانى ءجون»، - دەيدى مەكتەپكە دەيىنگى جانە ورتا ءبىلىم بەرۋ كوميتەتىنىڭ ءتوراعاسى مايرا مەلدەبەكوۆا.

ەڭ باستىسى، بۇگىن سوڭعى قوڭىراۋ سوعىلعانىمەن، وقۋ جىلى تولىق اياقتالمايدى. ءبىلىم جانە عىلىم مينيسترلىگى قاشىقتان وقىتۋدا كەتكەن ولقىلىقتاردىڭ ورنىن تولتىرۋ ءۇشىن 26-مامىر مەن 19 -ماۋسىم ارالىعىندا جازعى مەكتەپ جوباسىن ىسكە اسىرۋ تۋرالى شەشىم قابىلداعان بولاتىن. وعان وقۋشىلاردىڭ قاتىسۋىن اتا- انالاردىڭ ءوزى شەشەدى. ياعني، كىم دە كىم بالاسى وقۋ جىلىندا الۋى ءتيىس ءبىلىمدى تولىق مەڭگەرمەدى دەپ ەسەپتەسە، جازعى مەكتەپكە جازىلا الادى.

«بەسىنشى توقسان» وقۋشىلارىنا ءبىلىم الۋدىڭ بىرنەشە فورماتى ۇسىنىلماق.

«قوسىمشا ساباقتار اتا- انانىڭ قالاۋىمەن وتكىزىلەدى. ونىڭ فورماتى دا ءارتۇرلى بولادى. كەيبىر مەكتەپتەردە سىنىپتار ءداستۇرلى فورماتتا جۇمىس ىستەۋى مۇمكىن نەمەسە ءار وقۋشىمەن جەكە جۇمىس جۇرگىزىلۋى مۇمكىن. ياعني، فورمات وقۋشىنىڭ قانداي تاقىرىپتى يگەرمەگەنىنە بايلانىستى بولادى»، - دەدى مايرا مەلدەبەكوۆا.