قازاقستاندىقتارعا رەسەيگە بەلارۋس ارقىلى ۇشىپ كەلۋگە رۇقسات ەتىلدى

نۇر- سۇلتان. قازاقپارات - قازاقستاندىقتارعا بەلارۋس ارقىلى قانداي دا ءبىر قوسىمشا شارتتارسىز رەسەيگە ۇشىپ كەلۋگە رۇقسات بەرىلدى. بۇل تۋرالى قازاقستاننىڭ رەسەيدەگى ەلشىلىگىنىڭ سايتىندا ايتىلعان، دەپ حابارلايدى قازاقپارات.

مۇنداي ءتارتىپ رەسەي فەدەراتسياسى ۇكىمەتىنىڭ 18-مامىرداعى №1291-ر وكىمىنىڭ 2.12-تارماعىندا قاراستىرىلعان (قۇجاتقا سىلتەمە).

«بۇعان دەيىن ق ر ازاماتتارى بەلارۋستا تۇرۋعا ىقتيارحاتى بولعان جاعدايدا عانا رەسەيگە ۇشىپ كەلە الاتىن. قازىرگى ۋاقىتتا قازاقستان ازاماتتارى رەسەيمەن تۇراقتى اۋە قاتىناسىن قالپىنا كەلتىرگەن بارلىق ەلدەردەن ەشقانداي كەدەرگىسىز ۇشىپ كەلە الادى»، - دەلىنگەن ەلشىلىك سايتىندا.

رەسەي كەلەسى ەلدەرمەن تۇراقتى اۆيارەيستەردى ورىندايدى: قازاقستان، بەلارۋس، تۇركيا، شۆەيتساريا، مىسىر، مالديۆ ارالدارى، بىرىككەن اراب امىرلىكتەرى، قىرعىزستان، كورەي رەسپۋبليكاسى، كۋبا، سەربيا، جاپونيا، سەيشەل ارالدارى، ەفيوپيا، ۆەتنام، ءۇندىستان، كاتار، فينليانديا، ازەربايجان، ارمەنيا، گرەتسيا، سينگاپۋر، ۆەنەسۋەلا، گەرمانيا، سيريا، تاجىكستان، وزبەكستان، شري- لانكا. ايتا كەتەيىك، رەسەيگە كىرۋ كەزىندە شەتەلدىك ازاماتتاردان شەكارادان وتكەنگە دەيىن كەمىندە 72 ساعات بۇرىن تاپسىرىلعان پ ت ر تەستىنىڭ تەرىس ناتيجەسى بار انىقتاما تالاپ ەتىلەدى.

سونداي- اق رەسەي بۇعان دەيىن قازاقستاندىقتارعا رف ازاماتتىعى بار تۋىستارىنا قۇرلىق ارقىلى كەلۋگە رۇقسات بەرگەن بولاتىن.