قازاقستاندا كوروناۆيرۋسقا قارسى تاعى ءبىر ۆاكسينا كلينيكالىق سىناققا دايىن
بۇل تۋرالى بيولوگيالىق قاۋىپسىزدىك ماسەلەلەرى عىلىمي- زەرتتەۋ ينستيتۋتى باس ديرەكتورىنىڭ ورىنباسارى ەرعالي ءابدىرايىموۆ ايتتى، دەپ حابارلايدى قازاقپارات ءتىلشىسى.
دەنساۋلىق ساقتاۋ ءمينيسترى ونلاين ءدارىس بارىسىندا ول QazVac ۆاكسيناسىنان باسقا تاعى 5 ۆاكسينانىڭ ازىرلەنىپ جاتقانىن ايتتى.
«كوروناۆيرۋسقا قارسى ول ۆاكسينادان (QazVac) بولەك ءتۇرلى پلاتفورمالاردا تاعى 5 ۆاكسينا ازىرلەپ جاتىرمىز. ولاردىڭ ىشىندە ەكىنشى سۋببىرەگەي ۆاكسينا دا بار. ول دايىن بولدى جانە جانۋارلارعا كلينيكاعا دەيىن زەرتتەۋدەن ءوتتى. تاياۋ ۋاقىتتا دەنساۋلىق ساقتاۋ مينيسترلىگىنەن كلينيكالىق زەرتتەۋدىڭ ءبىرىنشى ساتىسىنان رۇقسات الامىز دەپ كۇتىپ وتىرمىز»، - دەدى ەرعالي ءابدىرايىموۆ.
سونىمەن قاتار ديرەكتوردىڭ ورىنباسارى QazVac ۆاكسيناسىنا قاتىستى پىكىرىن دە ءبىلدىردى.
«قازاقستاندىق ۆاكسينا - بۇل وتاندىق ازىرلەمە. بيولوگيالىق قاۋىپسىزدىك ماسەلەلەرى عىلىمي- زەرتتەۋ ينستيتۋتى 60 -جىلدان استام ۋاقىت بويى جۇمىس ىستەپ تۇرعانىن بىلەسىزدەر. وسى ۋاقىتتىڭ ىشىندە ءتۇرلى 70-كە جۋىق پرەپارات ازىرلەندى. ولاردىڭ 60 پايىزدان استامى قولدانىسقا ءىس جۇزىندە ەنگىزىلىپ وتىر. ەلىمىزدە العاش كوروناۆيرۋس جاعدايى تىركەلگەندە پرەزيدەنت وتاندىق ۆاكسينا ازىرلەۋگە تاپسىرما بەرگەن بولاتىن. ءبىز سول تاپسىرمانى ورىنداۋعا كىرىستىك. قازىر ۆاكسينانى جەدەل شىعارىپ جاتىرمىز. العاشقى توپتاماسى جىبەرىلدى، ەكىنشىسى دە دايىن بولىپ قالدى.
«س ق فارماتسيامەن» اراداعى كەلىسىمشارتقا سايكەس، جىلدىڭ سوڭىنا دەيىن ۆاكسينالاردى بىزگە بەلگىلەپ بەرگەن حابتارعا جەتكىزىپ وتىرامىز»، - دەدى ول.
اۆتور: مارلان جيەمباي
