زاۋىتبەك تۇرىسبەكوۆ قانداستار قالاشىعىنان جەر الۋدىڭ ءتارتىبىن ءتۇسىندىردى

نۇر-سۇلتان. قازاقپارات - دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ اقمولا وبلىسىنىڭ ارشالى اۋدانىندا ۇيىم باستاماسىمەن قولعا الىنعان «تۇرعىن ءۇي جانە جۇمىس» جوباسىنا قاتىسۋشىلارمەن كەزدەستى.

بۇل تۋرالى قازاقپارات اتالمىش قاۋىمداستىقتىڭ باسپا ءسوز قىزمەتىنە سىلتەمە جاساپ حابارلايدى. «كەزدەسۋ بارىسىندا زاۋىتبەك تۇرىسبەكوۆ جينالعان قانداستارعا دۇنيەجۇزى قازاقتارى قاۋىمداستىعىنىڭ ءتوراعاسى ەلباسى نۇرسۇلتان نازاربايەۆتىڭ V قۇرىلتايدا بەرگەن تاپسىرمالارىن ىسكە اسىرۋ بارىسى تۋرالى ەگجەي- تەگجەيلى حاباردار ەتتى. اتاپ ايتقاندا، ول ەلباسىنىڭ شەتەلدەگى قازاقتاردى تاريحي وتانىنا قايتارۋ، قازاقستاندىقتاردىڭ الەۋمەتتىك قورعالماعان ساناتتارىنىڭ تۇرعىن ءۇي پروبلەمالارىن شەشۋ جانە جاڭا جۇمىس ورىندارىن قۇرۋ تۋرالى تاپسىرمالارى قالاي ىسە اسىپ جاتقانىن باياندادى»، - دەپ ءمالىم ەتتى باسپا ءسوز قىزمەتىندەگىلەر.

دۇنيەجۇزى قازاقتارى قاۋىمداستىعى 3 جىلدىڭ ىشىندە اقمولا جانە تۇركىستان وبلىستارىندا باسپاناعا مۇقتاج جەرگىلىكتى تۇرعىندار مەن قانداستارعا ارناپ «اسار» ادىسىمەن كوتتەدج قالاشىقتارىن سالۋعا كىرىسكەن بولاتىن.

«جوبانىڭ بىرەگەيلىگى جەر ساتىپ الۋعا جانە ۇيلەر سالۋعا مەملەكەتتىك سالىمدار تالاپ ەتىلمەيتىندىگىندە. ويتكەنى جەر ساتىپ الىنىپ قويىلعان، ۇيلەردى جەر يەلەرىنىڭ وزدەرى اسار ءادىسى بويىنشا سالادى. بۇل جوعارى ساپالى تۇرعىن ءۇيدىڭ وزىندىك قۇنىن ايتارلىقتاي تومەندەتەدى. جىلىجايلار، مال بورداقىلاۋ ورتالىعى جانە كوتەرمە ساۋدا بازارىنىڭ قۇرىلىسى بويىنشا ۇسىنىستار اۋديتوريانىڭ جاعىمدى پىكىرىنە يە بولدى. ويتكەنى مۇنىڭ ءبارى اگروقالاشىق قۇرىلىسىنا قاتىسۋشىلار مەن ولاردىڭ وتباسىلارىن جۇمىسپەن قامتۋعا باعىتتالعان»، - دەيدى قاۋىمداستىق ماماندارى.

قاۋىمداستىق ءتوراعاسىنىڭ ورىنباسارى ەكى وڭىردەگى ىلكى جوبا ءساتتى ىسكە اسسا، كەزەكتە پاۆلودار، جامبىل، اقتوبە، اتىراۋ، شىعىس قازاقستان، باتىس قازاقستان، قاراعاندى، قوستاناي، سولتۇستىك قازاقستان وبلىستارى تۇرعانىن دا ايتتى.

بۇگىندە پيلوتتىق جوبا ايماقتارىندا گەودەزيالىق زەرتتەۋلەر نەگىزىندە جەر تەلىمدەرىنىڭ شەكارالارى انىقتالىپ، جولدار مەن باسقا دا ينجەنەرلىك جەلى وتەتىن تۇستار ناقتىلانعان. ال كوتتەدجدەر قۇرىلىسى 15-مامىردا باستالعان بولاتىن. جوسپار بويىنشا، الداعى كۇزدە اگروقالاشىقتاعى العاشقى ۇيلەر بوي كوتەرىپ ۇلگەرۋى ءتيىس. اقمولا وبلىسىنىڭ ارشالى اۋدانىندا 196 گەكتار جەر ساتىپ الىنعان. مۇندا 1282 كوتتەدج سالۋ كوزدەلىپ وتىر.

«جەردىڭ يەلەرى نەگىزىنەن وزبەكستاننان كەلگەن جانە ەلدىڭ سولتۇستىك ايماقتارىندا قالۋعا، تۇرۋعا جانە جۇمىس ىستەۋگە نيەت بىلدىرگەن قانداستار»، - دەيدى جوبا اۆتورلارى.

ەسكە سالساق، دۇنيەجۇزى قازاقتارى قاۋىمداستىعىنىڭ باستاماسىمەن اقمولا وبلىسى، ارشالى اۋدانىنداعى قانداستارعا ارنالعان اگروقالاشىق قۇرىلىسى وتكەن اپتادا باستالدى.