قازاقستاندا سالىنىپ جاتقان كوروناۆيرۋسقا قارسى ۆاكسينالاردىڭ باعاسى قانشا

نۇر-سۇلتان. قازاقپارات - سەناتتىڭ جالپى وتىرىسىندا دەنساۋلىق ساقتاۋ ءمينيسترى الەكسەي سوي شەتەلدىك ۆاكسينانى جەتكىزۋ مەن وتاندىق فارماتسيەۆتيكالىق زاۋاتتارعا قاتىستى تۇسىنىك بەردى، دەپ حابارلايدى قازاقپارات ءتىلشىسى.

پالاتانىڭ جالپى وتىرىسىندا شەتەلدەن جەتكىزىلگەن ك ۆ ي- عا قارسى ۆاكسينا قىمباتتاۋ ەكەنى ايتىلدى. وسى ورايدا شەتەلدىك ۆاكسينانى ساتىپ الۋ وتاندىق ۆاكسينا وندىرىسىنە كەرى اسەر ەتۋى تاۋەكەلىنە قاتىستى سۇراق قويىلدى.

سەناتتا كەلتىرىلگەن مالىمەتكە قاراعاندا، ەكى كومپونەتتەن تۇراتىن Hayat-vax ۆاكسيناسى 62,2 دوللار، «سپۋتنيك» - 26 دوللار، وتاندىق QazVac ۆاكسيناسى 9,4 دوللار سوماسىندا تۇرادى. ءوز كەزەگىندە مينيستر ا. سوي ۆاكسينا بويىنشا بەلگىلەنگەن قۇن ءوندىرۋشىنىڭ ءوزى قويعان باعامەن بەلگىلەنگەنىن اتاپ ءوتتى.

«بىزگە قىسقا مەرزىمدە قازاقستان نارىعىندا ۆاكسينانىڭ قولجەتىمدىگىن قامتاماسىز ەتۋ جانە ادامدارعا تاڭداۋ جاساۋعا مۇمكىندىك بەرۋ وتە ماڭىزدى. وندىرۋشىلەرمەن كەلىسسوزدەر بارىسىندا ۆاكسينا جەتكىزۋدە تاپشىلىق بار ەكەنىن بىلەسىزدەر، ياعني ءار ءوندىرۋشى ءتيىستى ليميت قويعان. ءبىزدىڭ ماقسات - قىسقا مەرزىمدە قازاقستان حالقىن ۆاكسينامەن بارىنشا قامتاماسىز ەتۋ. سوندىقتان بۇل جۇمىستار جۇرگىزىلىپ جاتىر جانە بۇل ۆاكسينالار ەلىمىزدە يممۋنداۋ باعدارلاماسىمەن قامتىلعان»، - دەدى مينيستر.

سونىمەن قاتار ول پرەپاراتتار شىعاراتىن ءوندىرىس الاڭدارى جۇمىسىنا توقتالدى.

«قازىرگى كەزدە وندىرىستىك قۋاتتار ۆاكسينا شىعارۋعا قايتا باعدارلاندى. بۇل وندىرىستىك الاڭدار سونىمەن قاتار ونكولوگيالىق ءارى باسقا دا اۋرۋلاردى ەمدەۋگە ارنالعان بيولوگيالىق پرەپاراتتاردى شىعارادى. سوندىقتان زاۋىتتاردىڭ جابىلۋى پروبلەماسى بولمايدى. بارلىق زاۋىتتار كوپفۋنكسيالى جانە پرەپاراتتاردىڭ كەڭەيتىلگەن تىزبەگىن وندىرەدى»، - دەدى ا. سوي.

«ۆاكسينالاۋدىڭ ءوزى ءبىر رەتتىك اكسيا ەمەس، ەكپە جاساۋ تۇراقتى جۇرگىزىلەدى. بىزدە 20-دان استام ۆاكسينا جىل سايىنعى ەكپە كۇنتىزبەسىنە ەنگىزىلگەن. سوندىقتان قازاقستاندا وتاندىق فارماتسيەۆتيكالىق يندۋستريانى دامىتۋعا اۋقىمدى الەۋەت بار»، - دەدى مينيستر.