مەملەكەت باسشىسى ءومىرزاق شوكەيەۆكە تۇركىستان وبلىسىنىڭ جوسپارىن قايتا جاڭارتۋدى تاپسىردى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ تۇركىستان وبلىسىنىڭ اكىمى ءومىرزاق شوكەيەۆتى قابىلدادى، دەپ حابارلايدى اقوردا.

قازاقستان پرەزيدەنتىنە تۇركىستان وبلىسىنىڭ الەۋمەتتىك- ەكونوميكالىق دامۋى، حالىقتىڭ ءال- اۋقاتىن جاقسارتۋعا قاتىستى قابىلدانعان شارالار، وڭىردەگى كوروناۆيرۋس ىندەتىنە قارسى اتقارىلىپ جاتقان جۇمىستار جايىندا باياندالدى.

قاسىم-جومارت توقايەۆقا ءومىرزاق شوكەيەۆ وبلىستا كوۆيد-مەنەدجمەنت بويىنشا جۇيەلى جۇمىس جاسالعانىن، سانيتارلىق- ەپيدەميالىق ءتارتىپتىڭ قاتاڭ ساقتالعانىن، حالىققا ەكپە ەگۋ ءىسىنىڭ قارقىندى ءجۇرىپ جاتقانىن ايتتى.

جالپى تۇركىستان وبلىسى بويىنشا 1 ميلليون ادامعا ەكپە ەگىلۋى كەرەك بولسا، بۇگىندە 200 مىڭ ادامعا ۆاكتسينا سالىنعان. ايماقتاعى جۇقپالى اۋرۋلار اۋرۋحانالارىنداعى توسەك- ورىندار مەن ءدارى- دارمەك قورى جەتكىلىكتى، قاجەتتى قۇرالدارمەن جابدىقتالعان. ءوڭىر باسشىسىنىڭ ايتۋىنشا، ءقازىر وبلىس «جاسىل ايماقتا»، سوعان سايكەس كەيبىر شەكتەۋلەر الىنىپ جاتىر.

بيىل تۇركىستان وبلىسىنىڭ قۇرىلعانىنا 3 جىل تولادى. مەملەكەت باسشىسىنا وسى ارالىقتا اتقارىلعان جۇمىستار مەن وڭىردەگى وزگەرىستەر تۋرالى ايتىلدى. ءومىرزاق شوكەيەۆ وبلىستىڭ جالپى ىشكى ءونىمى 41 پايىزعا وسكەنىن، ينۆەستيسيا 2,4 ەسە ارتقانىن، قۇرىلىس سالاسىندا ءىرى جوبالار ىسكە اسقانىن، اۋىل شارۋاشىلىعى، شاعىن جانە ورتا بيزنەس بويىنشا وڭ كورسەتكىش بار ەكەنىن اتاپ ءوتتى.

وبلىس اكىمى تۇركىستان قالاسىندا قولعا الىنعان جۇمىستار جونىندە بولەك باياندادى. قالادا 250 دەن استام جوبا جۇزەگە اسىرىلعان. تۇركىستانعا 445 ميلليارد تەڭگە ينۆەستيتسيا تارتىلعان. سونىمەن قاتار ءومىرزاق شوكەيەۆ الداعى ۋاقىتتا اتقارىلاتىن جوبالار تۋرالى دا مالىمەت بەردى. مەملەكەت باسشىسى ۇكىمەتپەن بىرلەسىپ تۇركىستان وبلىسىن دامىتۋدىڭ 2018-2024 -جىلدارعا ارنالعان كەشەندى جوسپارىن قايتا جاڭارتۋدى تاپسىردى.