ۇلتارالىق الاۋىزدىق تۋدىراتىن ۆيدەو اۆتورى قازاق تىلىندە كەشىرىم سۇرادى

قاراعاندى. قازاقپارات - الەۋمەتتىك جەلىلەردە قازاق ۇلتى تاراپىنا بالاعات سوزدەر ايتىپ، ۆيدەو جازعان وزگە ۇلت وكىلى ۇستالدى.

ول ءوز كىناسىن مويىنداپ، بارشا قازاق جۇرتىنان كەشىرىم سۇرادى، دەپ حابارلايدى قازاقپارات ءتىلشىسى.

الەۋمەتتىك جەلىلەردە جەزقازعان قالاسىنىڭ ءتۇرعىنى ۇلتارالىق الاۋىزدىق تۋدىراتىن ۆيدەو جازعانى تۋرالى مالىمەت تاراعان بولاتىن. Facebook-پايدالانۋشىلارىنىڭ ءبىرى اتالمىش ۆيدەونى ءوز پاراقشاسىندا ورنالاستىرعان. پوست استىنا پىكىر قالدىرعاندار ونى جاۋاپكەرشىلىككە تارتۋدى سۇراعان. ءوز كەزەگىندە پوليتسيا قىزمەتكەرلەرى دەرەك بويىنشا مالىمەت بەردى.

«26 -ءساۋىر كۇنى پوليتسيا قىزمەتكەرلەرى الەۋمەتتىك جەلىلەرگە مونيتورينگ جاساۋ بارىسىندا، ق ر قىلمىستىق كودەكسىنىڭ 174-بابىندا كورسەتىلگەن «ۇلتتىق الاۋىزدىقتى قوزدىرۋ» بەلگىلەرى بار بەلگىسىز ازاماتتىڭ بەينەۇندەۋىن انىقتادى»، - دەدى قاراعاندى وبلىسى پوليتسيا دەپارتامەنتىنىڭ باسپا ءسوز قىزمەتىنەن.

پوليتسيا قىزمەتكەرلەرى بەينەجازبانىڭ اۆتورى جەزقازعان قالاسىنىڭ 27 جاستاعى تۇرعىنىن انىقتاپ، ۇستاعانىن حابارلادى. ول بارشا قازاق جۇرتىنان جاساعان ارەكەتى ءۇشىن كەشىرىم سۇراپ، ۆيدەو جازدى. «سالاماتسىزدار ما!» دەپ قازاق تىلىندە امانداسقان تۇرعىن، بۇل ارەكەتكە ويلانباستان بارعانىن ايتىپ، شىن جۇرەكتەن كەشىرىم سۇرايتىنىن جەتكىزدى.

«مەنىڭ قازاق دوستارىم بار، ءبىز ءبىر- ءبىرىمىزدى قۇرمەتتەيمىز، ارامىزدا تۇسىنىسپەۋشىلىك جوق»، - دەگەن ول، «كەشىرىم سۇرايمىن!»، - دەپ ءسوزىن تاعى دا قازاق تىلىندە اياقتادى.

ايتا كەتەيىك، قازىرگى تاڭدا اتالعان فاكتى بويىنشا سوتقا دەيىنگى تەرگەۋ جۇرگىزىلىپ، ءتيىستى ساراپتامالار تاعايىندالدى.

اۆتور: اگاتا مۋحامەدجانوۆا