حالىق قاھارمانى پوليتسيا كاپيتانى عازيز بايتاسوۆقا ەسكەرتكىش ورناتىلدى - فوتو

تاراز. قازاقپارات - تارازدا باۋىرجان مومىش ۇلى اتىنداعى «جەڭىس» ساياباعىنا عازيز بايتاسوۆتىڭ ەسكەرتكىشى قويىلدى، دەپ حابارلايدى قازاقپارات.

ساياباقتاعى ەسكەرتكىشتىڭ سالتاناتتى اشىلۋى شاراسىنا جامبىل وبلىسىنىڭ اكىمى بەردىبەك ساپاربايەۆ، ق ر ىشكى ىستەر ءمينيسترىنىڭ ورىنباسارى ارىستانعاني زاپپاروۆ، جامبىل وبلىستىق ءماسليحاتىنىڭ حاتشىسى ماحمەتعالي سارىبەكوۆ جانە عازيز بايتاسوۆتىڭ وتباسى قاتىستى.

قازا تاپقان پوليتسيا كاپيتانى عازيز بايتاسوۆ وسىدان تۋرا 50 جىل بۇرىن 3-ساۋىردە ومىرگە كەلگەن. ىشكى ىستەر ءمينيسترىنىڭ ورىنباسارى ارىستانعاني زاپپاروۆ بۇگىنگى قۋانىشتى وقيعا - بەيبىت كۇندە ازاماتتاردىڭ تىنىشتىعى مەن قاۋىپسىزدىگى ءۇشىن ءوز ءومىرىن قيعان ادامدارعا قۇرمەت بولاتانىن ايتتى.

ونىڭ ايتۋىنشا، تاۋەلسىزدىك جىلدارى قىزمەتتىك بورىشىن ورىنداۋ كەزىندە 800-گە جۋىق پوليتسيا قىزمەتكەرى قازا تاپقان. ق ر ىشكى ىستەر مينيسترلىگىنىڭ باستاماسىمەن جىل سايىن ولاردىڭ ەرلىكتەرىنە ارنالعان «قازىرگى زامان قاھارمانى» رەسپۋبليكالىق اكسياسى وتكىزىلەدى. وبلىستىق پوليتسيا دەپارتامەنتىنىڭ باسشىى جانات سۇلەيمەنوۆ عازيز بايتاسوۆتىڭ ەرلىگى قازاقستان پوليتسياسىنىڭ بارلىق قىزمەتكەرلەرىنە ۇلگى بولاتىنىن جەتكىزدى.

ول تۋرالى ەستەلىك ۇرپاقتان ۇرپاققا جەتە بەرمەك.

ەسكە سالساق، تارازدا 2011 -جىلى 12-قاراشادا لاڭكەستەردىڭ قىلمىسى سالدارىنان 7 ادام قازا تاپقان، ونىڭ 5 ەۋى پوليتسيا قىزمەتكەرى، 2 ەۋى ازاماتتىق تۇلعا. پوليتسيا كاپيتانى عازيز بايتاسوۆ سول اتىس كەزىندە ادامداردى قۇتقارۋ ءۇشىن گراناتاسى بار لاڭكەستىڭ جولىن كەستى، ءسويتىپ قازا تاپتى. ق ر تۇڭعىش پرەزيدەنتى، ەلباسى نۇرسۇلتان نازاربايەۆتىڭ جارلىعىمەن وعان قايتىس بولعاننان كەيىن حالىق قاھارمانى اتاعى بەرىلدى.

ەسكە سالا كەتسەك، ناۋرىز ايىندا وسىنداي سالتاناتتى جاعدايدا ەسكەرتكىشتىڭ ىرگەتاسى قالانعان بولاتىن.