ۆاكسيناتسيا: الماتىلىقتارعا مەديتسينالىق اقپارات جۇيەسى ارقىلى شاقىرتۋ جىبەرىلىپ جاتىر
«باستاپقىدا ءبىز مەديتسينا قىزمەتكەرلەرىن، مەكتەپ، ينتەرنات مۇعالىمدەرىن، الەۋمەتتىك مەكەمەلەر جانە پوليتسيا قىزمەتكەرلەرىنە ۆاكسينا سالدىق. ولارعا ەكپە سالۋ اياقتالىپ كەلەدى. 2-ساۋىردەن باستاپ سوزىلمالى اۋرۋى بار ديسپانسەرلىك توپتاعى پاتسيەنتتەردى ۆاكسينالاۋعا كىرىستىك»، - دەدى گالينا روگاتوۆسكايا.
ەپيدەميولوگ دارىگەر ولاردىڭ وتاندىق ۆاكسينانىڭ 2200 دوزاسىن العانىن جانە ونىمەن ءساتتى جۇمىس ىستەپ جاتقانىن ايتتى.
«ۆاكسينانى كۆينكي ءىسىنۋى بار، جۇكتى جانە بالا ەمىزەتىن ايەلدەرگە جاساماعان ءجون. سونىمەن قاتار، ۆاكسيناتسياعا 18 جاسقا دەيىنگى بالالار جىبەرىلمەيدى. كوروناۆيرۋسقا قارسى ۆاكسينانى 63 جاستان اسقان ادامدارعا جاساۋعا رۇقسات ەتىلەدى»، - دەيدى دارىگەر.
ونىڭ ايتۋىنشا، ۆاكسينا ءار ادامعا ءارقالاي اسەر ەتۋى مۇمكىن.
«ۆاكسينا سالعاننان كەيىن ءۇش كۇن ىشىندە كەرى اسەرى بولۋى مۇمكىن جانە ولاردى اسقىنۋ دەپ اتاۋعا كەلمەيدى. بۇل - قالتىراۋ، دەنەنىڭ سىرقىراۋى، دەنە تەمپەراتۋراسىنىڭ ازداپ كوتەرىلۋى. ءبىزدىڭ دەرەكتەرىمىز بويىنشا، ەكپە سالدىرعانداردىڭ %25-30 دا وسى بەلگىلەر بايقالىپ وتىر. قالعاندار شاعىمدانعان جوق. اۋىر بەلگىلەرى دە تىركەلگەن جوق»، - دەدى ول.
سونىمەن قاتار، ول تۇرعىندارعا مەديتسينالىق اقپاراتتىق جۇيە ارقىلى شاقىرتۋ جىبەرىلگەنىن اتاپ ءوتتى.
«حالىققا ەكپە جۇرگىزۋ 2 ساۋىردە باستالدى، وعان دەيىن سوزىلمالى اۋرۋى بار ناۋقاستارعا مەديتسينالىق اقپاراتتىق جۇيە ارقىلى شاقىرۋ جىبەرىلگەن بولاتىن. ەكى كۇندە 1300 ادام ەگىلدى. ۆاكسينا سالدىرعاندار قاتارىندا شەتەلدىك ازاماتتار دا بار»، - دەپ تۇيىندەدى دارىگەر.
اۆتور: الما مۇقانوۆا
