كيىممەن ۇيىقتاۋعا بولا ما؟

نۇر-سۇلتان. قازاقپارات - كەيدە شارشاپ كەلىپ كيىممەن ۇيىقتاي سالاتىن ادەتىمىز بار. ءبىراق كوبىمىز شەشىنىپ ۇيىقتايمىز.

ارنايى ءىش كيىممەن - پيجاما، كويلەك نە جەيدەمىن جاتاتىندار دا كوپ. سونىمەن بۇلاردىڭ قايسىسى دۇرىس؟ جالاڭاش جاتقان با الدە كيىممەن ۇيىقتاعان دۇرىس پا؟

بۇل سۇراقتىڭ جاۋابى ⅩⅩ عاسىردىڭ اياعىندا-اق تابىلعان. ميكروبيولوگ دجەيسون تەترو كيىم مەن توسەك باكتەريالارىن، ميكروبتارىن زەرتتەپ ارنايى The Germ Files اتتى كىتاپ جازعان. مۇندا كۇنى بويى جۇرگەن كيىممەن توسەككە جاتپاۋ كەرەگىن ايتادى.

«ويتكەنى كۇنى بويى كيىمدە جۇرگەن باكتەريالار كوبەيىپ، قاپتاپ كەتەدى. ەگەر ادام كيىمدى شەشپەي سول بەتى ۇيىقتاي سالسا، باكتەريا مەن ميكروب ودان ءارى كوبەيىپ، كيىم مەن دەنەدە جاعىمسىز ءيىس پايدا بولادى»، - دەپ تۇسىندىرەدى ول.

تاڭەرتەڭ تۇرىپ، جۋىپ، دۋشقا ءتۇسىپ تازالانىپ الامىن دەسەڭىز دە پايدا از.

«ويتكەنى كيىمدە كوبەيگەن باكتەريا جاتقان توسەگىڭىزگە «ءسىڭىپ قالادى» دا، توسەك-ورىندى دا، كيىمدى دە ءجيى جۋۋعا تۋرا كەلەدى. ال پيجاما مەن ءىش كيىم سالىستىرمالى تۇردە تازا جۇرۋىڭىزگە كومەكتەسەدى»، - دەپ جازادى اۆتور.

ال بۇعان جاۋاپسىز قاراعان ادامدا قايىزعاق، بەزەۋ، تىتىركەنۋ، تەرى اۋرۋلارى پايدا بولۋى مۇمكىن. تەرى مەن دەنەدە تىرشىلىك ەتەتىن Staphylococcus aureus (ستافيللوكوك) جانە پروپيون قىشقىلدى باكتەريالار (Propionibacterium) كوبەيسە، دەنەنى ءتۇرلى قابىنۋ مەن جارا باسۋى مۇمكىن.

اعىلشىن تىلىندە مەديتسينادا ادامنىڭ دەنەسىنە نەمقۇرايلى قاراپ، تازالانباي، جۋىنباي جۇرۋىنەن پايدا بولاتىن تەرى اۋرۋلارىن ارنايى تۇردە اتايتىن «Dermatitis neglecta» ۇعىمى قالىپتاسقان.

سومنولوگ مايكل برەۋستىڭ ايتۋىنشا، ارنايى كيىممەن نە جالاڭاش ۇيىقتاعان ادامنىڭ ۇيقىسى سەرگەك بولادى.

«ال كوشەگە كيەتىن كيىممەن جاتقان ادامنىڭ دەنە تەمپەراتۋراسى بۇزىلىپ، ۇيقىسى دۇرىس بولمايدى»، - دەيدى ول.

ال امستەردام ۋنيۆەرسيتەتىنىڭ زەرتتەۋىندە ۇيىقتاعان كەزدە دەنە ىستىقتاپ، قىزباسا، ادام تەرەڭ ۇيقىعا كەتەتىنى ايتىلعان.

massaget.kz