ءۇي العىم كەلەدى: ەلدە قانداي قولجەتىمدى باعدارلامالار بار؟

نۇر-سۇلتان. قازاقپارات - جەكە باسپاناسى بولعانىن ارماندامايتىن جان جوق بولار. ءۇي العىمىز كەلەدى، ءبىراق جولىن بىلمەيتىنىمىز كوپ. ەلىمىزدە تۇرعىن ءۇي نارىعىن قولداۋعا ارنالعان ءتۇرلى باعدارلاما بار. سونىڭ ىشىندە سىزگە ەڭ ءتيىمدى التى باعدارلامانى ۇسىنامىز.

7-20-25

بۇل باعدارلامامەن پاتەر الۋ ءۇشىن العاشقى جارناعا ءۇي باعاسىنىڭ %20 جارنا رەتىندە سالۋ كەرەك. جىلدىق مولشەرلەمەسى نەمەسە نەسيە پايىزى - %7. نەسيەنى 25 جىلعا دەيىن الۋعا بولادى.

وسى باعدارلامامەن ءۇي الۋ ءۇشىن ەڭ تومەنگى ەڭبەكاقى 106 مىڭ تەڭگەدەن كەم بولماۋى ءتيىس. نۇر-سۇلتان، الماتى، اقتاۋ، اتىراۋ، شىمكەنت قالاسىنان 25 ميلليون تەڭگەگە دەيىنگى، قاراعاندىدان 20 ميلليون تەڭگە، باسقا وڭىرلەردەن 15 ميلليون تەڭگەگە دەيىنگى پاتەرلەرى الۋعا بولادى.

تاعى ءبىر شارتى - تەك جاڭادان سالىنعان ۇيلەردى الۋعا رۇقسات.

نۇرلى جەر (5-20-25)

بۇرىنعى «نۇرلى جەر» باعدارلاماسىنىڭ قازىرگى اتاۋى - 5-20-25. تەك جاڭا سالىنعان ۇيلەردى ساتىپ الۋعا ارنالعان. العاشقى جارنا - %20. پايىزى - %5.

الماتى قالاسىنداعى ۇيلەردىڭ شارشى مەترى 240 مىڭ تەڭگەدەن بەرىلسە، نۇر-سۇلتان قالاسىندا - 220 مىڭ تەڭگەدەن، شىمكەنتتە - 200 مىڭ تەڭگەدەن، اقتوبە مەن اتىراۋ، اقتاۋ، تۇركىستان جانە قاراعاندى وبلىستارىندا - 180 مىڭ تەڭگەدەن، باسقا وڭىردە - 120 مىڭ تەڭگەدەن بەرىلەدى.

«نۇرلى جەر» باعدارلاماسىمەن جەر ۇيلەر دە بەرىلەدى. ونىڭ ءاربىر شارشى مەترى 120 مىڭ تەڭگەدەن ساتىلادى.

شاڭىراق (5-10-20)

بۇل باعدارلاما اكىمدىكتە ءۇي كەزەگىندە تۇرعان ازاماتتارعا ارنالعان. تەك جاڭا سالىنعان ۇيلەرگە عانا بەرىلەدى.

يپوتەكا ۋاقىتى - 25 جىلعا دەيىن. العاشقى جارنا - %10. باعا شەكتەۋى ءارتۇرلى. ماسەلەن، جەكە تۇرعىن ءۇي كومپانياسى تۇرعىزعان ۇيلەردىڭ باعاسى 15-18 ميلليون تەڭگە. اكىمدىك تاپسىرىسىمەن سالىنعان ءۇيدىڭ شارشى مەترىنىڭ باعاسى 160-240 مىڭ تەڭگەنىڭ ارالىعىندا.

ءبىر جانۇيانىڭ تابىسى ءاربىر مۇشەسىنە بولگەندە 106 مىڭ تەڭگەدەن كەم بولماعانى ءجون.

باقىتتى وتباسى (2-10-20)

بۇل - كوپبالالى، از قامتىلعان، مۇگەدەك بالاسى بار جانۇيالارعا ارنالعان باعدارلاما. مولشەرلەمەسى - %2. نەسيە مەرزىمى 20 جىلعا دەيىن.

ءۇيدىڭ باعاسى 10-20 ميلليون تەڭگەنىڭ اراسىندا. جاڭا سالىنعان دا، ەكىنشى نارىقتاعى پاتەردى دە الۋعا بولادى. جانۇيانىڭ تابىسى ءاربىر مۇشەسىنە شاققاندا 68 مىڭ تەڭگەدەن كەم بولماۋى ءتيىس.

باسپانا حيت

بۇل مەملەكەتتىك باعدارلاما ەمەس. «باسپانا» ۇيىمىنىڭ جەكە باعدارلاماسى. ءبىرىنشى جانە ەكىنشى نارىقتاعى ۇيلەردى ساتىپ الۋعا بولادى.

ءۇيدىڭ باعاسى - 15-35 ميلليون تەڭگە ارالىعىندا. زايم ۋاقىتى - 15 جىل. العاشقى جارنا - %20. سىياقى مولشەرى بازالىق مولشەرلەمەگە بايلانىستى.

وردا

بۇل دا جەكەمەنشىك باعدارلاما. «قازاقستانا تۇرعىن ءۇي كومپانياسى» ۇسىنعان. ءۇيدى بانك- سەرىكتەستەر ارقىلى بەرەدى. العاشقى جارنا - %30. سىياقى مولشەرلەمەسى - %12. زايم ۋاقىتى - 20 جىلعا دەيىن.

الماتى جانە نۇر-سۇلتان قالاسىنان ءۇي العىسى كەلگەندەرگە 1-65 ميلليون تەڭگە، باسقا وڭىرگە 1-40 ميلليون تەڭگە ارالىعىندا نەسيە بەرىلەدى.

massaget.kz