قازاقستان قارۋلى كۇشتەرىندە كوروناۆيرۋسقا قارسى ۆاكسينالاۋ ناۋرىزدا باستالادى
بۇل تۋرالى ق ر قورعانىس مينيسترلىگىنەن ءمالىم ەتتى، دەپ حابارلايدى قازاقپارات ءتىلشىسى. ۆەدومستۆو مالىمەتىنشە، قورعانىس ءمينيسترى نۇرلان ەرمەكبايەۆ اسكەردە كوروناۆيرۋس ينفەكسياسىنىڭ تارالۋىنا جول بەرمەۋ بويىنشا قابىلدانىپ جاتقان ءىس- شارالار جونىندە ورىنباسارى گەنەرال- مايور مۇحامەدجان تالاسوۆ پەن باس اسكەري- مەديتسينالىق باسقارماسىنىڭ باستىعى - مەديتسينا قىزمەتىنىڭ پولكوۆنيگى تيمۋر وشاقبايەۆتى تىڭدادى.
جالپى، قارۋلى كۇشتەردە كوروناۆيرۋس ينفەكسياسىن جۇقتىرعانداردىڭ سانى ەلدەگى ورتاشا كورسەتكىشتەن الدەقايدا تومەن. بۇل بارلىق جاۋىنگەرلىك دايارلىق پەن وقۋ- جاتتىعۋ ءىس- شارالارىن تولىق وتكىزۋگە، جاۋىنگەرلىك ازىرلىكتىڭ جاي- كۇيىن قاجەتتى دەڭگەيدە ۇستاپ تۇرۋعا مۇمكىندىك بەرەدى.
بۇدان بولەك، 2020 -جىلدىڭ كوكتەمى مەن جازىنداعى تاجىريبە بويىنشا قارۋلى كۇشتەر ەلىمىزدىڭ دەنساۋلىق ساقتاۋ قاجەتتىلىكتەرى ءۇشىن اسكەري- مەديتسينالىق مەكەمەلەردى ستاتسيونار، موبيلدى اسكەري- دالالىق گوسپيتال رەتىندە، سونداي- اق شالعاي وڭىرلەردە مەديتسينالىق كومەك كورسەتۋ ءۇشىن 24 دارىگەرلىك- مەيىربيكەلىك بريگادانى جۇمىلدىرۋعا دايىن.
«قازىرگى ۋاقىتتا ەكپە جۇمىستارىنا دايىندىق ءجۇرىپ جاتىر. ول قارۋلى كۇشتەردە بيىل ناۋرىز ايىندا باستالادى. ەكپە جۇرگىزۋدە جەكە قۇرامنىڭ باسىم ساناتتارى ايقىندالىپ، ونى الۋ كەزەكتىلىگى جوسپارلاندى. اسكەري قىزمەتشىلەر مەن ازاماتتىق قىزمەتكەرلەردىڭ پىكىرلەرىن الدىن- الا زەردەلەۋ كورسەتكەندەي، بارلىعى دەرلىك كوروناۆيرۋسقا قارسى ەكپەنىڭ قاجەتتىلىگىن قولدايدى»، - دەپ اتاپ وتەدى مينيسترلىكتەن.
وسى ورايدا قورعانىس ءمينيسترى گەنەرال- لەيتەنانت نۇرلان ەرمەكبايەۆ جاۋىنگەرلىك دايارلىق ءىس- شارالارىن قىسقارتۋعا، اسكەري دايارلىقتى تومەندەتۋگە جول بەرىلمەيتىنىن اتاپ ءوتتى. وسىعان بايلانىستى كوروناۆيرۋس ينفەكسياسىنىڭ تارالۋىنا قارسى الدىن الۋ ءىس- شارالارىن جەتىلدىرۋدى تاپسىردى. ءىس- شارالار ءتۇسىندىرۋ جۇمىستارىن جانە دەنساۋلىق جاعدايىنىڭ كۇندەلىكتى مونيتورينگىن، سونداي- اق جەكە قۇرامعا جوسپارلى ەكپەنى، پتر- تەستىلەۋدى، ال قاجەت بولعان جاعدايدا بىلىكتى مەديتسينالىق كومەك كورسەتۋدى قامتۋى ءتيىس. الدىن الۋ شارالارىن ۇيىمداستىرۋ ماسەلەلەرى بويىنشا دەنساۋلىق ساقتاۋ مينيسترلىگىنىڭ سانيتارلىق- ەپيدەميولوگيالىق باقىلاۋ كوميتەتىمەن، سونداي- اق جەرگىلىكتى اتقارۋشى ورگاندارىنىڭ ءتيىستى بولىمشەلەرىمەن ءوزارا تىعىز قارىم- قاتىناستا جۇرگىزۋ تاپسىرىلدى.
اۆتور: مارلان جيەمباي
