كوروناۆيرۋسپەن اۋىرعان ادامنىڭ دەنساۋلىعى قانشا ۋاقىتتا قالپىنا كەلەدى - مامان جاۋابى
ماماننىڭ ايتۋىنشا، Covid-19 اۋرۋىمەن اۋىرعان پاتسيەنتتەردىڭ دەنساۋلىعىنىڭ جاعدايى ءارتۇرلى، اۋرۋشاڭدىقتى كوتەرە الۋىنا بايلانىستى.
«اۋرۋدان ايىققان ادامنىڭ دەنساۋلىعى ءبىر ايدان ءبىر جىلعا دەيىنگى ارالىقتا قالپىنا كەلەدى. وكپەسى زاقىمدانعان پاتسيەنتتەردە پنيەۆموفيبريوز تۋىنداۋى مۇمكىن، ياعني رەنتگەنگە تۇسكەن كەزدە ول تىگىس سەكىلدى كورىنەدى. كوروناۆيرۋسپەن اۋىرعان پاتسيەنتتەردىڭ كەيبىرەۋىندە جالپى السىزدىك، تەز شارشاپ قالۋ، اشۋلانشاقتىق، كوڭىل كۇيىنىڭ ءجيى وزگەرۋى، ۇيقىسىنىڭ بۇزۋىلۋى، دەپرەسسيا مازاسىن الادى، مۇنداي كەزدە ەمدەۋ شاراسىن جۇرگىزىپ ورگانيزمدى بەكىتۋ قاجەت. اۋىر وتكەن كوۆيد پنيەۆمونياسىنان كەيىنگى پاتسيەنتتەردى ءبىز، كورسەتكىشتەرى بويىنشا، وكپەنىڭ جەلدەتۋىن جاقسارتۋ، مازاسىزدىق پەن دەپرەسسيانىڭ الدىن الۋ، ءومىر ءسۇرۋىن جاقسارتۋ ماقساتىندا وڭالتۋ ورتالىقتارىنا جىبەرەمىز»، - دەيدى دارىگەر.
وڭالتۋدىڭ ۇزاقتىلىعى 14 كۇنگە دەيىن سوزىلادى. ول جەردە رەابيليتولوگ دارىگەرلەردىڭ باقىلاۋىندا بولادى. دەپرەسسيا بەلگىسى انىقتالعان پاتسيەنتتەرمەن پسيحولوگتار جۇمىس ىستەيدى. سونداي- اق، فيزيوتەراپيەۆتىك ەمشارالار جۇرگىزىلىپ، كەۋدە كلەتكاسىنا ماسساج جاسالادى. وكپەسى %50-60 زاقىمدانعان پاتسيەنتتەردىڭ وكپە كلەتكاسى جارتى جىلدا قالپىنا كەلەدى.
«اۋىر وتكەن كوۆيد پنيەۆمونياسىنان كەيىنگى قالپىنا كەلۋ ءۇردىسى - وڭاي ءارى تەز وتەتىن ءۇردىس ەمەس. ءار ادامدا قالپىنا كەلۋ ۋاقىتى ءارتۇرلى بولادى، ول ادام اعزاسىنا جانە سوزىلمالى اۋرۋعا بايلانىستى»، - دەيدى ول.
مامان كوروناۆيرۋس ينفەكتسياسىمەن اۋىرعان ادامدارعا بەلسەندى قوزعالۋعا، تىنىس الۋ گيمناستيكاسىن جاساۋعا، تازا اۋادا ءجيى سەرۋەندەۋگە، اقۋىزى بار تاماقتاردى كوپ جەۋگە كەڭەس بەردى.
