قوستانايلىقتار اتقا قونىپ، مەملەكەتتىك تۋ شەرۋىن ۇيىمداستىردى
قوستاناي. قازاقپارات - قوستاناي وبلىسىنىڭ جانگەلدين اۋدانىندا ءبىر توپ جاس اتقا ءمىنىپ، مەملەكەتتىك تۋ شەرۋىن ۇيىمداستىردى، دەپ حابارلايدى قازاقپارات ءتىلشىسى.
جانگەلدين اۋدانى ىشكى ساياسات باسقارماسىنىڭ مالىمەتىنشە، بۇل باستاما ق ر پرەزيدەنتى قاسىم- جومارت توقايەۆتىڭ مەملەكەتتىك تۋدى كەڭىنەن قولدانۋ تۋرالى ۇسىنىسىنان كەيىن تۋىنداعان. شەرۋ ۇيىمداستىرۋ يدەياسىن اۋدان جاستارى دا قولداپ، وزدەرىنىڭ ويلارىن ورتاعا سالعان.
«تۋدى ۇيلەردىڭ قابىرعاسىنا ءىلۋ تۋرالى دا ايتىلىپ جاتتى. ءبىراق اقىلداسا كەلە، تۋ ۇستاپ، اتقا قونۋدى دۇرىس دەپ تاپتىق. مەملەكەت باسشىسى ەلىمىزدىڭ مەملەكەتتىك رامىزدەرىن، اتاپ ايتقاندا، ق ر مەملەكەتتىك تۋىن كەڭىنەن قولدانۋ تۋرالى ۇسىنىسىن قولدايتىنىن جەتكىزدى. راسىمەن دە، رامىزدەر - باستى بايلىعىمىز. ول ەشقاشان دارەجەسىنەن تۇسپەۋى ءتيىس. تورعايلىق جاستاردىڭ دا كوزدەگەنى وسى بولدى. قازىرگىدەي قيىن ۋاقىتتا كوپ ادام جيناۋعا بولمايدى. دەگەنمەن ەل ەڭسەسىن كوتەرەتىن وسىنداي باستامالارعا جول اشىق»، - دەيدى شەرۋگە قاتىسۋشىلاردىڭ ءبىرى شىڭعىس تولەۋحان.
اتقا مىنگەن جىگىتتەر اۋىل تۇرعىندارى مەن قوناقتارىنىڭ نازارىن اۋداردى. ۇيىمداستىرۋشىلاردىڭ ايتۋىنشا، شەرۋدى ۇيىمداستىرۋ كەزىندە بارلىق سانيتارلىق تالاپتار ساقتالدى.
