كوروناۆيرۋس: سايلاۋ كەزىندە ازاماتتار قالاي قورعالادى

بۇگىندە ەلىمىزدىڭ باستى ساياسي دوداسىنا جولداما العان 5 پارتيا، اتاپ ايتقاندا «اۋىل» حالىقتىق- دەموكراتيالىق پاتريوتتىق پارتياسى»، «Nur Otan» پارتياسى»، «ADAL» ساياسي پارتياسى»، «اق جول» قازاقستاننىڭ دەموكراتيالىق پارتياسى»، «قازاقستاننىڭ حالىق پارتياسى» كانديداتتارى ەلىمىزدىڭ تۇكپىر- تۇكپىرىن ارالاپ، سايلاۋشىلاردى ءوز جاقتارىنا شىعارۋعا تىرىسىپ باعۋدا.

بۇل ورايدا سايلاۋشىلارمەن قاتار ەلىمىزدىڭ دەنساۋلىق ساقتاۋ سالاسى ماماندارىن الەممەن قاتار قازاق جۇرتشىلىعىن دا ءارى- ءسارى كۇيگە تۇسىرگەن كوروناۆيرۋس ينفەكسياسىنا قاتىستى احۋال دا الاڭداتىپ وتىرعانى بەلگىلى.

ويتكەنى، بۇل پاندەميا اۋا ارقىلى ادامنان ادامعا تەز جۇعادى.

ال داۋىس بەرۋ كۇنىندە قالاعان كانديداتى ارقىلى كوڭىلىنەن شىعاتىن پارتياعا داۋىس بەرۋگە اسىعاتىن جۇرتشىلىقتىڭ قاراسى سايلاۋ ۋچاسكەسىندە قالىڭ بولارى ايتپاسا دا بەلگىلى جايت.

مىنە وسىعان بايلانىستى ەلىمىزدىڭ دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتار دارىگەرى ەرلان قياسوۆ قازاقستان رەسپۋبليكاسى پارلامەنتىنىڭ ءماجىلىسى جانە ءماسليحاتتار دەپۋتاتتارىنىڭ سايلاۋىندا سايلاۋ الدى ۇگىتتى جۇرگىزۋ كەزىندە COVID-19 كوروناۆيرۋس ينفەكسياسىنىڭ تارالۋىنىڭ الدىن الۋ، سانيتاريالىق- ەپيدەميولوگيالىق قاۋىپسىزدىكتى جانە ازاماتتاردىڭ دەنساۋلىعىن قورعاۋدى قامتاماسىز ەتۋ ماقساتىندا ارنايى قاۋلى شىعارىپ وتىر.

بۇل رەتتە وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ باس مەملەكەتتىك سانيتار دارىگەرلەرى وبلىستاردىڭ، رەسپۋبليكالىق ماڭىزى بار قالالاردىڭ جانە رەسپۋبليكا استاناسىنىڭ اۋماقتىق سايلاۋ كوميسسيالارىمەن بىرلەسىپ، وڭىرلەردەگى سانيتاريالىق- ەپيدەميولوگيالىق جاعدايدى ەسكەرە وتىرىپ، سايلاۋ پروتسەسىنىڭ سانيتاريالىق قاۋىپسىزدىگىن قامتاماسىز ەتۋى ءتيىس.

اتالعان قاۋلىعا سايكەس، سايلاۋ پروتسەسىنىڭ بارلىق قاتىسۋشىلارى:

ءبىر رەت قولدانىلاتىن مەديتسينالىق نەمەسە قورعانىش ماسكالارىن، قولعاپتاردى كيۋ رەجيمىن مىندەتتى تۇردە ساقتاۋى؛

قولدى دەزينفەكسيالاۋ ءۇشىن انتيسەپتيكالىق قۇرالداردى پايدالانۋى؛

ادامدار اراسىندا ءبىر- بىرىنەن كەمىندە 1,5-2 مەتر الەۋمەتتىك قاشىقتىقتى ساقتاۋى؛

قول الىسۋدى نەمەسە تىكەلەي بايلانىستىڭ باسقا دا تۇرلەرىن بولدىرماۋى قاجەت. سايلاۋ الدى ۇگىت ءىس- شارالارىن تەلەديدار، راديو، باسپا باسىلىمدارىن، ينتەرنەت- رەسۋرستاردى پايدالانا وتىرىپ، ونلاين رەجيمدە وتكىزۋ ۇسىنىلادى. سايلاۋ ناۋقانى ءۇشىن ارنايى دايىندالعان تەگىن باسپا ماتەريالدارىن، ونىڭ ىشىندە يلليۋستراتسيالىق ماتەريالداردى، سونداي-اق بەلگىشەلەردى، جالاۋلاردى، جالاۋشالاردى تاراتۋدى ءبىر رەت قولدانىلاتىن قولعاپتاردى جانە قورعانىش ماسكالارىن پايدالانا وتىرىپ جۇزەگە اسىرۋ كەرەك.

«سايلاۋ الدى كوپشىلىك ءىس- شارالارىن جانە ءۇي- جاي ىشىندە سايلاۋشىلارمەن جەكە كەزدەسۋلەردى وتكىزۋ كەزىندە: الەۋمەتتىك قاشىقتىقتى مۇلتىكسىز ساقتاۋ ءۇشىن جەتكىلىكتى كەڭ ءۇي- جايلاردى پايدالانۋدى؛

ءىس- شاراعا قاتىسۋشىلاردىڭ تەمپەراتۋراسىن ءۇي- جايعا كىرەبەرىستە بايلانىسسىز باقىلاۋدى؛ ءۇي- جايعا كىرەبەرىستە جانە ءۇي- جاي ىشىندە قولدى دەزينفەكتسيالاۋعا ارنالعان قۇرالداردى پايدالانۋدى؛ جۋۋ قۇرالدارىن قولدانا وتىرىپ، ءۇي- جايدى جانە بارلىق جۇمىس بەتتەرىنە ىلعالدى جيناۋ جۇرگىزۋدى، دەزينفەكتسيالاۋدى؛

جاساندى جەلدەتۋ جۇيەسى بولماعان جاعدايدا ءۇي- جايعا تۇراقتى جەلدەتۋ جۇرگىزۋدى؛

عيماراتتىڭ تەحنيكالىق مۇمكىندىكتەرى بولعان كەزدە ءۇي- جايعا بولەك كىرەتىن جانە شىعاتىن جولداردى؛ ك ۆ ي- دىڭ پروفيلاكتيكاسى شارالارىن ساقتاۋ تۋرالى اقپاراتتىق ماتەريالداردى ورنالاستىرۋدى؛ ءۇي- جايعا كىرەبەرىستە جانە ءۇي- جاي ىشىندە قاشىقتىق بەلگىلەرىن ورناتۋدى؛ قاتىسۋشىلاردى الەۋمەتتىك قاشىقتىقتى ساقتاي وتىرىپ وتىرعىزۋدى قامتاماسىز ەتۋ قاجەت»، - دەلىنگەن قاۋلىدا.

ايتا كەتەيىك، ەلىمىزدىڭ ورتالىق سايلاۋ كوميسسياسى بارلىق 5 پارتيادان 312 كانديداتتى تىركەدى. ونىڭ ىشىندە: «اۋىل» حالىقتىق- دەموكراتيالىق پاتريوتتىق پارتياسىنان 19؛

«Nur Otan» پارتياسىنان 126؛

«ADAL» ساياسي پارتياسىنان 16؛

قازاقستاننىڭ «اق جول» دەموكراتيالىق پارتياسىنان 38 جانە «قازاقستاننىڭ حالىق پارتياسىنان» 113 ادام. پارتيالىق تىزىمدەر بويىنشا پارلامەنت ءماجىلىسى سايلاۋىندا داۋىس بەرۋدى وتكىزۋ كەزىندەگى جەرەبە قورىتىندىسى بويىنشا سايلاۋ بيۋللەتەنىندەگى ساياسي پارتيالاردىڭ اتاۋلارى مىناداي تارتىپپەن ورنالاستىرىلاتىن بولادى:

1. «قازاقستان حالىق پارتياسى» قوعامدىق بىرلەستىگى.

2. «Nur Otan» پارتياسى» قوعامدىق بىرلەستىگى.

3. «اۋىل» حالىقتىق- دەموكراتيالىق پاتريوتتىق پارتياسى» قوعامدىق بىرلەستىگى.

4. «اق جول» قازاقستاننىڭ دەموكراتيالىق پارتياسى» قوعامدىق بىرلەستىگى.

5. «ADAL» ساياسي پارتياسى» قوعامدىق بىرلەستىگى. سونىمەن قاتار 2020 -جىلعى 1 -جەلتوقسانداعى جاعداي بويىنشا سايلاۋشى ازاماتتاردىڭ ءبىرىڭعاي ەلەكتروندىق تىزىلىمىنە سايكەس قازاقستان رەسپۋبليكاسىنداعى سايلاۋشىلاردىڭ جالپى سانىنىڭ ءبىر پايىزى رەزەرۆىن قوسا، دايىندالۋعا جانە سايلاۋ ۋچاسكەلەرىنە جەتكىزىلۋگە ءتيىس سايلاۋ بيۋللەتەندەرىنىڭ سانى پارتيالىق تىزىمدەر بويىنشا سايلاناتىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋ بويىنشا 12038433 (ون ەكى ميلليون وتىز سەگىز مىڭ ءتورت ءجۇز وتىز ءۇش) دانانى قۇرايتىن بولىپ بەلگىلەندى.

اۆتور: مارلان جيەمباي