دارىگەر تەر ءيىسى ارقىلى قانداي اۋرۋلاردى انىقتاۋعا بولاتىنىن ايتتى
نۇر - سۇلتان. قازاقپارات - دارىگەر- وتولارينگولوگ زلاتا پوراديكوۆا تەردىڭ ءيىسى ارقىلى قانداي اۋرۋلاردى انىقتاۋعا بولاتىنىن ايتتى.
ماماننىڭ ايتۋىنشا، تەردىڭ ءيىسى مەن ونىڭ ءبولىنۋ قارقىنى گورمونداردىڭ، اس قورىتۋ جۇيەسى جانە اعزاداعى باسقا ورگانداردىڭ قالاي جۇمىس ىستەيتىنىن كورسەتەدى.
«تەرلەۋ - ادامنىڭ تەرمورەتتەلۋىنىڭ ماڭىزدى مەحانيزمى. سونىمەن قاتار، ول ەموتسيالار مەن سترەسستەرگە جاۋاپ قىزمەتىن اتقارادى. تەرلەۋدى جۇيكە جۇيەسى، قالقانشا بەزىنىڭ گورموندارى، گيپوتالامۋس، جىنىس بەزدەرى رەتتەيدى. ءسىز سەنبەيتىن شىعارسىز، الايدا ساۋ ادام تەرلەگەن كۇننىڭ وزىندە ودان ءيىس شىقپايدى.
ءار ادامنىڭ وزىنە ءتان ءيىسى بولادى. ول فەروموندارمەن جانە اعزاداعى تەرى باكتەريالارىنىڭ ەرەكشە قۇرامىنا بايلانىستى. ال جاعىمسىز ءيىس ولاردىڭ شامادان تىس جۇمىس ىستەۋىنەن پايدا بولادى. ەگەر ءسىز دەنەڭىزدى كۇتپەسەڭىز، بۇل جاعىمسىز ءيىستى بارلىعى سەزەتىن بولادى»، - دەيدى دارىگەر.
ونىڭ پىكىرىنشە، تەردىڭ ءيىسىنىڭ وزگەرۋى دەنساۋلىقتا پروبلەما بار ەكەنىن كورسەتەدى.
«سىزدەن مىناداي ءيىس شىقسا، وندا دەنساۋلىعىڭىزعا ءمان بەرىڭىز:
اتسەتوننىڭ ءيىسى - قانت ديابەتى؛
جاعىمسىز ءيىس (شىرىگەن جۇمىرتقا، كۇكىرتسۋتەك) - اسقازان، ىشەك اۋرۋلارى؛
اشى ءيىس (سىركە) - د ۆيتامينىنىڭ جەتىسپەۋشىلىگى، تۋبەركۋلەز؛
اممياكتىڭ ءيىسى (مىسىقتىڭ ءيىسى) - بۇيرەك پاتولوگياسى، اسقازاندا حەليكوباكتەر ءپيلوريدىڭ بولۋى.
بالىق نەمەسە حلوردىڭ ءيىسى - باۋىردىڭ اۋرۋى.
تىشقاننىڭ ءيىسى - فەنيلكەتونۋريا، اعزاداعى زات الماسۋدىڭ بۇزىلۋى؛
سارىسۋدىڭ ءيىسى - پوداگرا»، - دەيدى زلاتا پارۋچيكوۆا.
سونىمەن قاتار، ول تەردىڭ قالاي بولىنەتىنىنە دە نازار اۋدارۋعا شاقىردى.
«شامادان تىس تەرلەۋ نەمەسە گيپەرگيدروز جوعارى قىسىم، گيپەرتيرەوز، مەنوپاۋزا سيندرومى كەزىندە بايقالادى. گيپەرگيدروزعا نيكوتين، كوفەين، الكوگول، سترەسس ىقپال ەتەدى»، - دەيدى ول.
زلاتا پارۋچيكوۆا تەر ءيىسىنىڭ وزگەرۋى جانە ءجيى ءبولىنۋى جىنىستىق جەتىلۋ نەمەسە جۇكتىلىكپەن، ادامنىڭ قالاي تاماقتاناتىنىمەن دە بايلانىستى ەكەنىن ايتادى.
«دامدەۋىشتەر، اشى بۇرىش، كارري، سارىمساق، پياز، قىشا، جەلكەك، بۇرشاق، بريۋسسەل ورامجاپىراعى (كاپۋستا)، بروككولي تەرگە جاعىمسىز ءيىس بەرەدى.
سينتەتيكالىق كيىم كيگەن كەزدە ادامنىڭ تەرىسى دەمالمايدى، تەر بۋلانبايدى. بۇل اعزادا باكتەريالاردىڭ كوبەيۋىنە ىقپال ەتىپ، جاعىمسىز ءيىس شىعۋى مۇمكىن.
سونىمەن قاتار، انتيدەپرەسسانتتار، انتيگيستاميندەر، انتيبيوتيكتەر، گيپوتەنزيۆتى ءدارى- دارمەكتەر تەر ءيىسىن وزگەرتەدى.
جاعىمسىز ادەتتەر، مىسالى الكوگولدى شامادان تىس تۇتىنۋ، بۇل تەردىڭ قۇرامىن وگەرتەدى. ونىڭ سالدارى دا بولۋى ىقتيمال»، - دەيدى دارىگەر.
