بەرىك ءۋالي بوزجىراعا قاتىستى پرەزيدەنت تاپسىرماسىنا تۇسىنىك بەردى

«كەشە Facebook الەۋمەتتىك جەلىسىندە پرەزيدەنتتىڭ بوزجىرا قورىعى اۋماعىندا سالىناتىن قوناق ءۇيدىڭ قۇرىلىسىن قايتا قاراۋدى تاپسىرعانى جايىندا جازىپ ەدىك. اتالعان جازبا اقپارات قۇرالدارى مەن الەۋمەتتىك جەلىلەردە قىزۋ تالقىلانىپ، ءتۇرلى سۇراقتار قويىلىپ جاتىر. سوندىقتان وسى ماسەلەگە تاعى ءبىر مارتە ورالىپ، قوسىمشا تۇسىنىكتەمە بەرگەندى ءجون دەپ تاپتىق. ماڭعىستاۋ وبلىسىندا تۋريزمدى دامىتۋ - ۇكىمەتكە جۇكتەلگەن ماڭىزدى مىندەتتەردىڭ ءبىرى. بۇگىندە بۇل باعىتتا جۇمىستار باستالىپ كەتتى. بەس جۇلدىزدى قوناق ءۇي سالىنىپ، جايلى مەيمانحانالاردىڭ تۇتاس جەلىسىن قۇرۋ جوسپارلانىپ وتىر. مۇنداي جۇيەلى جۇمىستار ايماقتىڭ تۋريستىك تارتىمدىلىعىن ارتتىراتىنى ءسوزسىز. جاقىندا بوزجىرا تابيعي قورىعىنىڭ جانىنان قوناق ءۇي سالۋ جوباسى ۇسىنىلدى. وكىنىشكە قاراي، قازىرگى كەزدە قورىقتىڭ اينالاسىنداعى تۋريزم تابيعاتتى قورعاۋ شارالارىن ساقتاماي، بەيبەرەكەت دامىپ جاتىر. بۇل وسى ەرەكشە تابيعات قورىعىنا وراسان زيانىن تيگىزۋدە. پرەزيدەنت ەكولوگيالىق ءتۋريزمدى وركەنيەتتى جولمەن دامىتۋدى قولدايدى. ول ءۇشىن قاجەتتى ينفراقۇرىلىم، ەڭ الدىمەن، جايلى قوناقۇيلەر قاجەت. سوندىقتان مەملەكەت باسشىسى ۇكىمەتكە قوناقء ۇي سالۋ جوباسىن قايتا قاراۋدى تاپسىردى. ءبىراق، بۇل جوبا وسىمەن توقتايدى دەگەندى بىلدىرمەيدى»، - دەپ جازدى ب. ءۋاليfacebook-تە.

ونىڭ ايتۋىنشا، قوعامدىق كەڭەستەردىڭ، ەكولوگ ساراپشىلاردىڭ جانە مەملەكەتتىك ۆەدومستۆولاردىڭ وي-پىكىرلەرى ەسكەرىلە وتىرىپ، قوناق ءۇي سالۋعا ارنالعان باسقا ىڭعايلى جەر تاڭدالاتىن بولادى. ايتا كەتەيىك، الەۋمەتتىك جەلىدە بوزجىرادا قوناق ءۇيدىڭ قۇرىلىسى باستالعانى جونىندە ۆيدەو تاراپ، بۇل جاعداي حالىقتىڭ اشۋ-ىزاسىن تۋعىزعان ەدى. كەيىن بوزجىرادا قوناق ئۇي سالۋ جوباسىنا ەكولوگيا مينيسترلىگى مەن مادەنيەت ۆيتسە-ءمينيسترى پىكىر بىلدىرگەن بولاتىن.