اتىراۋدان ەلورداعا باعىت العان ۇشاق قۇستارعا سوعىلىپ، اۋەجايعا قايتا قوندى
نۇر-سۇلتان. قازاقپارات - اتىراۋدان نۇر-سۇلتانعا ۇشىپ شىققان ۇشاق توپتاسىپ ۇشقان قۇستارمەن بەتپە-بەت كەلىپ، كوماندير اۋە كەمەسىن كەرى قايتارۋ تۋرالى شەشىم قابىلدادى، دەپ حابارلايدى قازاقپارات ءتىلشىسى.
«اتىراۋ-نۇر-سۇلتان رەيسىن ورىنداۋ كەزىندە كوككە كوتەرىلىپ بارا جاتقان اۋە كەمەسى توپتاسىپ ۇشقان قۇستارعا سوعىلعان (بولجام بويىنشا ۇيرەكتەر مەن قازدار). اۋە كەمەسىنىڭ كومانديرى يۆان كارپوۆيچ شتاتتى رەجيمدە ۇشاقتى ۇشىپ شىققان پورتقا قايتارۋ تۋرالى شەشىم قابىلدادى. ۇشاق شتاتتى رەجيمدە اۋەجايعا كەلىپ قوندى»، - دەدى SCAT اۋە كومپانياسى قازاقپارات تىلشىسىنە.
وسىلايشا كەشە كەشكە ساعات 22:05 تە ۇشىپ شىققان ۇشاق 22:17 دە قايتا قونعان.
ۇشاقتا 115 ادام بولعان. اۋە كەمەسىنىڭ كومانديرى 10 جىلدان بەرى جۇمىس ىستەپ كەلە جاتقان تاجىريبەلى مامان. اۋەجايعا قايتىپ ورالعان جولاۋشىلاردىڭ كەيبىرى بيلەتىن باسقا كۇنگە اۋىستىرسا، باسقالارىنا بيلەتتىڭ اقشاسى قايتارىلدى.
«اۋە كەمەسىنىڭ كومانديرى يۆان كارپوۆيچتىڭ كاسىبي مامان بولۋىنىڭ جانە ەكيپاجدىڭ ۇيلەسىمدى جۇمىسىنىڭ ارقاسىندا قۇستارمەن سوقتىعىسقان ۇشاق شتاتتى رەجيمدە اۋەجايعا قايتا قوندىرىلدى»، - دەلىنگەن كومپانيا تاراتقان حابارلامادا.
