قىتايدا اباي شىعارمالارىنىڭ اۋدارماشىلارىنا Ⅱدارەجەلى «دوستىق» وردەنى تابىستالدى
اباي قۇنانباي ۇلىنىڭ مۇراسىن ناسيحاتتاۋعا سىڭىرگەن ەڭبەكتەرى ءۇشىن اتالعان تۇلعالاردى مەملەكەتتىك ماراپاتپەن ناگرادتاۋ تۋرالى جارلىققا قازاقستان پرەزيدەنتى قاسىم- جومارت توقايەۆ 2020 -جىلعى 4 -تامىزدا قول قويعان بولاتىن. 1928 -جىلى دۇنيەگە كەلگەن حا حۋانجان (ادەبيەتتەگى لاقاپ اتى - قاباي) اباي شىعارماشىلىعىن زەرتتەۋگە ءومىرىن ارناعان العاشقى شەتەلدىك ادەبيەتتانۋشىلاردىڭ ءبىرى بولىپ تابىلادى. 1958 ج. حا حۋانجاننىڭ «اباي قۇنانباي ۇلى. ءۇش ولەڭ» اتتى تۇڭعىش اۋدارمالار جيناعى جارىق كوردى. سول جىلى ق ح ر ش ۇ ا ر- دا شىعاتىن «تيان- شان» جۋرنالى «قازاقستاننىڭ ۇلى اقىنى - اباي قۇنانباي ۇلى» اتتى ونىڭ اباي تۋرالى العاشقى عىلىمي ماقالاسىن جاريالادى. ونىڭ «اباي ولەڭدەرى» جانە «قارا سوزدەر» اتتى قىتاي تىلىندەگى اۋدارمالارىن شىنجاڭ باسپاسى 1982 جانە 1984 جج . باسىپ شىعاردى. ءۇش جىلدان كەيىن بەيجىڭدە قابايدىڭ «اباي جانە ونىڭ پوەزياسى» اتتى ماقالالار جيناعى، ال 1994 ج. ول قۇراستىرعان «اباي شىعارمالارىنىڭ تولىق جيناعى» قىتاي تىلىندە جارىق كوردى.
حا حۋانجاننىڭ ەڭ ەلەۋلى ەڭبەكتەرىنىڭ ءبىرى - مۇحتار اۋەزوۆتىڭ الەمگە ايگىلى «اباي جولى» رومان- ەپوپەياسىنىڭ اۋدارماسى. بۇل جۇمىسقا ول 14 جىل جۇمساعان بولاتىن. اكبار ءماجيت ۇلى - قىتاي تىلىندە جازاتىن ق ح ر- دىڭ از ۇلتتار وكىلدەرىنىڭ كورنەكتى جازۋشىلارىنىڭ ءبىرى. 1982 ج. باستاپ قىتاي جازۋشىلار وداعىنىڭ مۇشەسى بولىپ تابىلادى، كەزىندە ق ح ر حالىقتىق- ساياسي كونسۋلتاتيۆتىك كەڭەسىنىڭ دەپۋتاتى بولعان، ق ح ر مەملەكەتتىك سىيلىعىنىڭ ءۇش مارتە يەگەرى، وننان استام كىتاپتىڭ، ونىڭ ىشىندە اباي شىعارمالارى اۋدارمالارىنىڭ اۆتورى. 2020 -جىلى قىركۇيەكتە اكبار ماجيت ۇلىنىڭ «اباي قۇنانباي ۇلىنىڭ شىعارمالارى قىتاي تىلىندە» اتتى 2 تومدىق جيناعى جارىق كوردى. اكبار ءماجيت ۇلىنىڭ اۋدارمالارى مەن ىزدەنىستەرىنىڭ ارقاسىندا بۇگىن قىتاي وقىرماندارى اباي قۇنانباي ۇلىنىڭ اقىندىق جانە فيلوسوفيالىق مۇراسىمەن قاتار قازاق ادەبيەتىنىڭ باسقا دا كورنەكتى كلاسسيكتەرىنىڭ شىعارمالارىمەن جاقىن تانىسۋعا مۇمكىنشىلىك الۋدا.
