شارۋالارعا ءتيىمدى اۆتوماتتاندىرىلعان جاڭا جۇيە ەنگىزىلدى

جۇيە ازىرگە اقمولا جانە الماتى وبلىستارىنىڭ كاسىپكەرلەرى ءۇشىن تەستتىك رەجيمدە ىسكە قوسىلدى. الداعى ۋاقىتتا بۇل مەحانيزمدى باسقا وبلىستارعا دا ەنگىزۋ جوسپارلانىپ وتىر.

مەملەكەت باسشىسى قاسىم-جومارت توقايەۆ بيىل 1-قىركۇيەكتەگى «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى حالىققا جولداۋىندا «ءتيىمدى شاعىن جانە ورتا بيزنەس - قالا مەن اۋىلدى دامىتۋدىڭ بەرىك نەگىزى. شاعىن، اسىرەسە، ميكروبيزنەس ەلىمىزدىڭ الەۋمەتتىك- ەكونوميكالىق جانە ساياسي ومىرىندە ماڭىزدى ءرول اتقارادى»، - دەپ اتاپ وتكەن بولاتىن.

شاعىن كاسىپكەرلىكپەن اينالىساتىن اۋىلدىقتاردى مەملەكەت تاراپىنان قولداۋدىڭ ورنى بولەك. اسىرەسە، كاسىپ باستايمىن دەگەن ازاماتتاردىڭ شاعىن نەسيەگە جىلدام قول جەتكىزۋىن قامتاماسىز ەتۋ وتە ماڭىزدى.

«قازاگرو» حولدينگىنىڭ ەنشىلەس كومپانياسى - اۋىل شارۋاشىلىعىن قارجىلاي قولداۋ قورى ونلاين- نەسيەلەۋ جۇمىسىن باستادى. «ەڭبەك» باعدارلاماسى اياسىندا مال شارۋاشىلىعىن دامىتۋعا (4 ميلليون تەڭگەگە دەيىن) نەسيە العىسى كەلەتىن كاسىپكەرلەر ۇيىنەن نەمەسە كەڭسەدەن نەسيەگە ونلاين ءوتىنىم بەرە الادى. ايتا كەتۋ كەرەك، كاسىپكەر بەرگەن ءوتىنىمىنىڭ ماقۇلدانعانىن نەمەسە ماقۇلدانباعانىن الدىن- الا بىلە الادى.

بۇرىن 10-13 قۇجات جيناۋ تالاپ ەتىلگەن بولسا، قازىر تەك ءوتىنىم بەرۋشىنىڭ جەكە كۋالىگى، ەلەكتروندى سيفرلىق قولتاڭباسى جانە كەپىلدىككە قوياتىن مۇلىگىنىڭ قۇجاتى عانا قاجەت. بۇگىنگى تاڭدا جاڭا جۇيە ارقىلى 65 شارۋانىڭ ءوتىنىمى ماقۇلدانىپ ۇلگەردى. الماتى وبلىسىنىڭ جامبىل اۋدانىنا قاراستى قاينازار اۋىلىندا تۇراتىن اناپيا ايمۇحان نەسيەگە ونلاين- ءوتىنىم بەرگەن العشقى شارۋالاردىڭ ءبىرى. قوي شارۋاشىلىعىن دامىتۋعا ءۇشىنشى رەت نەسيە العالى وتىرعان فەرمەر اۆتوماتتاندىرۋ جۇيەسىنىڭ ارتىقشىلىعى جونىندە ايتىپ بەردى.

«اۋىل شارۋاشىلىعىن قارجىلاي قولداۋ قورىنان وسىعان دەيىن ەكى رەت نەسيە الىپ، قوي شارۋاشىلىعىن باستاعان ەدىم. ءۇشىنشى رەت تاعى نەسيە العالى وتىرمىن. بۇرىن نەسيە الۋعا 10-13 قۇجات جينايتىن ەدىك. قالاعا ءجيى باراتىنبىز، حالىققا قىزمەت كورسەتۋ ورتالىعىنىڭ كەزەگىنە تۇرىپ قانشا ۋاقىت كەتىرەتىنبىز. جالپى قۇجات جيناۋعا ەكى اپتادان ءبىر ايعا دەيىن ۋاقىتىمىز كەتەتىن. جول شىعىنىمىز تاعى بار. قازىر ەلەكتروندى سيفرلى قولتاڭبام، جەكە كۋالىگىم جانە كەپىلدىككە قوياتىن مۇلىگىمنىڭ قۇجاتى عانا كەرەك. ۇيدە وتىرىپ-اق، الدىن الا ءوتىنىم بەرۋگە مۇمكىندىك جاساعان ەكەن. قۋانىپ وتىرمىن. جاڭا عانا 4 ميلليون تەڭگە نەسيە الۋ ءۇشىن ونلاين ءوتىنىم بەرگەن ەدىم، مىنە ءوتىنىمىڭىز ماقۇلداندى دەگەن حابارلاما كەلدى. ارى قاراي نەسيە الۋىما ەشتەڭە بوگەت بولمايدى. شارۋالار ءۇشىن وسىنداي مۇمكىندىك جاساۋعا ىقپال ەتكەن پرەزيدەنتىمىزگە، ماماندارعا كوپ راحمەت!» - دەيدى اناپيا ايمۇحان.

ايمۇحاننىڭ قوراسىندا قازىر 150 باس ساۋلىق قوي مەن 60 قا جۋىق توقتىسى بار. ەندى 4 ميلليون تەڭگە نەسيەگە تاعى قوي مەن جەم- ءشوپ ساتىپ الماق. 36 جاستاعى شارۋانىڭ 3 بالاسى بار. ۇلدارىن دا وسى شارۋاشىلىققا باۋلىعىسى كەلەدى.

ويتكەنى، مال ءوسىرۋ اتاكاسىبىمىز جانە تابىستى كوبەيتىپ، تۇرمىستى جاقسارتۋعا بولادى، دەيدى ول. قوراسى مەن جايىلىمىن كەڭەيتۋ ءۇشىن جەرگىلىكتى اكىمدىككە ءوتىنىش تە جازىپ قويىپتى. اۋىلى الىپ شاھاردىڭ ىرگەسىندە بولعاندىقتان، قويدىڭ ەتىن ساتۋدان قيىندىق تۋىندامايتىنىنا بەك سەنىمدى. اۋىل شارۋاشىلىعىن قارجىلاي قولداۋ قورىنىڭ الماتى فيليالىنداعى وزىنە ءوزى قىزمەت كورسەتۋ ايماعىنان ونلاين ءوتىنىم بەرۋگە بولادى. تالعار اۋدانىنىڭ تۇرعىنى رۇستەم اسيموۆتىڭ ونلاين- ءوتىنىمى از عانا ۋاقىتتىڭ ىشىندە ماقۇلداندى.

ەندى ول الداعى 5 جۇمىس كۇنىنىڭ ىشىندە نەسيەسىنە قول جەتكىزەدى.

«مەن تالعار اۋدانىنان كەلدىم. وسى اۋىل شارۋاشىلىعىن قارجىلاي قولداۋ قورىنان بۇرىن ءبىر رەت نەسيە العانمىن. ول نەسيەنى جاۋىپ تاستاپ، مىنە ەكىنشى رەت تاعى نەسيە الۋعا ونلاين- ءوتىنىم بەرىپ وتىرمىن. الدىڭعى نەسيەنى الاردا كوپ قۇجات جيناعانمىن. وسى جول ءبارى وڭاي، تەك ەلەكتروندى سيفرلىق قولتاڭبا بولسا كومپيۋتەردە وتىرىپ- اق كوپ جۇمىستى تىندىرۋعا بولادى ەكەن. ماماندار كەڭەس بەرىپ، كومەكتەستى. نەگىزى ەشقانداي قيىندىعى جوق ەكەن»، - دەيدى نەسيەگە ءىرى قارا مال ساتىپ الۋدى جوسپارلاپ وتىرعان كاسىپكەر.

مال شارۋاشىلىعىمەن اينالىسقىسى كەلگەن كاسىپكەر «ەڭبەك» باعدارلاماسىنىڭ تالاپتارىنا سايكەس بولۋى شارت. ەگەر كاسىپتى ەندى باستاپ جاتقان بولسا، بيزنەس نەگىزدەرىن وقىعانى تۋرالى سەرتيفيكاتى مەن جۇمىسپەن قامتۋ ورتالىعىنان العان جولداماسى بولۋى كەرەك.

«ەگەر ءسىز اقمولا نەمەسە الماتى وبلىسىنىڭ تۇرعىنى بولساڭىز جانە مال شارۋاشىلىعىن دامىتۋعا قارجى العىڭىز كەلسە، www.online.fagri.kz پورتالىنا كىرىڭىز جانە كەلىسىمگە قول قويىڭىز. «جاڭا ءوتىنىم جاساۋ» باتىرماسىن باسىپ، ءوتىنىمدى جەكە كابينەت ارقىلى جىبەرىڭىز. جۇيە مەملەكەتتىك دەرەكقوردان اقپارات سۇراتۋ ارقىلى ازاماتتىڭ نەسيە الۋ مۇمكىندىگى مەن سەنىمدىلىگىن تەكسەرەدى. وڭ ناتيجە بولعان جاعدايدا «جالعاستىرۋ» باتىرماسى ىسكە قوسىلادى.

«كەپىلدىكتى قامتاماسىز ەتۋ» بولىمىندە كەپىلگە قويۋدى جوسپارلاعان مۇلىككە قاتىستى دەرەكتەردى ەنگىزىڭىز، جۇيە مۇلىكتىڭ نارىقتىق قۇنىن ەسەپتەيدى. ۇسىنىلعان كەپىلدىك مۇلكى جەتكىلىكتى بولعان جاعدايدا جۇيە كەپىلدىكتى قامتاماسىز ەتۋ جونىندەگى قۇجاتتارمەن وبلىستىق فيليالعا جۇگىنۋ مۇمكىندىگى تۋرالى حابارلامانى كورسەتەدى»، - دەيدى «اۋىل شارۋاشىلىعىن قارجىلاي قولداۋ قورى» ا ق نەسيەلەۋ دەپارتامەنتى ديرەكتورىنىڭ ورىنباسارى ارمات بايزاقوۆ. قۇجاتتاردى نەسيە مەنەدجەرىنە تاپسىرعاننان كەيىن ءسىز ءوزىڭىزدىڭ جەكە كابينەتىڭىزدەن ءوتىنىمىڭىز بويىنشا جۇرگىزىلىپ جاتقان جۇمىستىڭ قاي دەڭگەيدە ەكەنىن باقىلاي الاسىز.

ۋاكىلەتتى ورگان وڭ شەشىم شىعارعان جاعدايدا نەسيە شارتىن جاساسۋ ءۇشىن اۋىل شارۋاشىلىعىن قارجىلاي قولداۋ قورىنىڭ وبلىستىق فيليالىنا بارۋىڭىز كەرەك. ءوتىنىمدى الدىن الا ماقۇلداۋ شەشىمى 10-15 مينۋت ارالىعىندا قابىلدانادى. ال، ءوتىنىمدى ودان ءارى قاراۋ مەرزىمى 15 كۇننەن 5 جۇمىس كۇنىنە دەيىن قاسقاردى.

اۆتور: قانات مامەتقازى ۇلى