تۇركىستان مەن الماتى وبلىستارى ەلورداداعى جارمەڭكەلەر ماۋسىمىن اشتى

«جىل سايىنعى كۇزگى جارمەڭكەلەر ماۋسىمى باستالدى. ءبىز ءار وبلىستاعى ارىپتەستەرىمىزبەن ءتيىستى كەلىسىم جاسادىق. بۇگىن كەلىپ وتىرعان ەكى ءوڭىر 800 تونناعا جۋىق اۋىل شارۋاشىلىعى ءونىمىن جەتكىزدى، ونىڭ بارلىعى ەلىمىزدە وندىرىلگەن. ەڭ باستىسى، بۇل جەردە باعانىڭ قولجەتىمدىگىن بايقاۋعا بولادى. سۇرانىس وتە جوعارى، وسىنداي جارمەڭكە ءار اپتا سايىن بولادى. ءقازىر ەتكە سۇرانىس كوپ ەكەنىن كوردىك، سونى الداعى اپتادا ەسكەرەتىن بولامىز»، - دەيدى نۇر- سۇلتان قالاسىنىڭ اكىمى التاي كولگىنوۆ.

اكىم قالا تۇرعىندارىن سانيتارلىق نورمالاردى بۇزباۋعا شاقىردى. جارمەڭكەدە تۇركىستان وبلىسى شارۋالارى 447,2 توننا اۋىل شارۋاشىلىعى ءونىمىن 15-20 پايىز تومەن باعامەن ۇسىنۋدا. اتاپ ايتقاندا، 34 جۇك كولىگىنە تيەلگەن 267,7 توننا كوكونىس، باقشا، كارتوپ، 29,5 توننا جەمىس- جيدەك، 72 توننا ەت جانە ەت ونىمدەرى، 47,5 توننا ءسۇت ونىمدەرى، 10 توننا بالىق، 6 توننا بال، 14,5 توننا جەمىس شىرىنى مەن كونسەرۆى ونىمدەرى قامتىلعان.

ءوز كەزەگىندە الماتى وبلىسى اكىمىنىڭ ورىنباسارى سەرىك تۇرداليەۆ اكىمدىك جارمەڭكەگە ارناپ وڭىردەن ونىمدەردى جەتكىزۋگە قولداۋ جاساعانىن اتاپ ءوتتى.

«قالىپتاسقان ءداستۇر بويىنشا الماتى وبلىسىنان اۋىل شارۋاشىلىعى ونىمەرىن ەلوردامىزعا جەتكىزدىك. وسى ورايدا بارلىق اۋدان- قالالار تاۋارلارىن الىپ كەلدى. نۇر- سۇلتان قالاسىنىڭ تۇرعىندارى ءبىزدىڭ ءونىمدى جاقسى بىلەدى ءارى كۇتەدى. بىزدە ەڭ تاڭداۋلى الما تۇرلەرى، بالىق پەن ەت ونىمدەرى بار. قالا تۇرعىندارى تاراپىنان ءبىزدىڭ تاۋارلارعا سۇرانىس جوعارى ەكەنىن بايقاپ تۇرمىز. باعانىڭ ءوزى 15 پايىز شاماسىندا ارزان»، - دەيدى وبلىس اكىمىنىڭ ورىنباسارى.

ەلورداداعى جارمەڭكەدە تۇركىستان وبلىسىنىڭ شارۋا قوجالىقتارى ءوز ونىمدەرىن دەلدالسىز وتكىزىپ جاتىر. بۇل تۋرالى تۇركىستان وبلىسى اۋىل شارۋاشىلىعى باسقارماسىنىڭ باسشىسى نۇربەك بادىراقوۆ ءمالىم ەتتى.

نۇربەك بادىراقوۆتىڭ سوزىنە قاراعاندا، وسى جارمەڭكەگە تۇركىستان وبلىسىنان جەكە قوسالقى شارۋاشىلىقتار جانە جىلىنا ەكى- ءۇش ءونىم الۋ جوباسىنا ەنگەن شارۋا قوجالىقتار 447 توننا ءونىمىن ۇسىنىپ وتىر. تۇركىستان وبلىسى اكىمدىگى نەگىزگى ونىمدەر بويىنشا ەلورداداعى باعاعا دا تالداۋ جاساعان. سايكەسىنشە، وڭىردەن جەتكىزىلگەن ءونىمنىڭ باعاسىن تومەندەتىپ ساۋدالاۋدا.

«جارمەڭگە جەتكىزىلگەن ونىمدەر نارىقتاعى باعادان 20 پايىز ارزانعا وتكىزىلۋدە. جەكە قوسالقى شارۋاشىلىقتار ءوز ونىمدەرىن ساتۋدا كەدەرگىلەرگە تاپ بولادى. وسى ورايدا كوپ دەلدالدار تابىسىن پايدالانىپ جاتىر. سوندىقتان بۇگىنگى جارمەڭكەدە تۇركىستان وبلىسىنان 73 شارۋا قوجالىعى ءوز ءونىمىن تىكەلەي ەلوردا تۇرعىندارىنا ءوز باعاسىمەن ساۋدالاۋدا»، - دەيدى باسقارما باسشىسى.

اۆتور: رۋسلان عابباسوۆ