اسحات ايماعامبەتوۆ: «وقۋلىق - قوسىمشا قۇرال» دەگەنگە كەلىسپەيمىن
نۇر-سۇلتان. قازاقپارات - الداعى ۋاقىتتا باسىلىپ شىعاتىن مەكتەپ وقۋلىقتارى مۇلدەم جاڭا ساپادا بولادى.
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«وقۋلىقتار ماسەلەسى وتە ماڭىزدى. بۇل باياعىدان كەلە جاتقان، حالىقتىڭ كوكەيىندە جۇرگەن ەڭ باستى ماسەلەنىڭ ءبىرى. بىزدە كەيبىر ارىپتەستەرىمىز «وقۋلىق - قوسىمشا قۇرال» دەپ ايتادى. مەن ونىمەن كەلىسپەيتىندىگىمدى ءارقاشان دا ايتامىن. وقۋلىق بالا ءۇشىن ەڭ نەگىزگى قۇرالدىڭ ءبىرى. بالا وقۋلىققا سۇيەنىپ وقيدى. وقۋلىقتا بولعان اقپاراتتى بويىنا سىڭىرەدى. سوندىقتان وقۋلىققا ءبىز وتە ۇلكەن نازار اۋدارىپ جاتىرمىز. ءبىز وقۋلىقتىڭ جالپى دايىندالۋ پروتسەسىن وزگەرتتىك. جالپى، اۆتورلاردى الىپ، بۇل سولاردىڭ عانا پروبلەماسى دەسەك دۇرىس ەمەس. نە باسپالاردىڭ پروبلەماسى دەپ، باسپاعا اۋدارساق تا دۇرىس بولمايدى. قوعامدا سونداي وي قالىپتاسقان. ءبىز مينيسترلىك رەتىندە جاۋاپكەرشىلىكتى وزىمىزگە الۋىمىز كەرەك.
ويتكەنى، جالپى وسى ساياساتتى جۇرگىزىپ وتىرعان مينيسترلىك.
ارينە، بۇل جەردە باسپالاردىڭ، اۆتورلاردىڭ جىبەرگەن قاتەلىكتەر بار. ءبىراق، نەگىزىندە وسى ساياساتتى ءبىلىم جانە عىلىم مينيسترلىگى جۇرگىزىپ وتىر. سوندىقتان ءبىز وسى ساياساتتى كۇرت وزگەرتتىك»، - دەدى مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ب ا ق وكىلدەرىنىڭ ساۋالىنا وراي.
ونىڭ ايتىنشا، كىتاپ دايىنداۋ بارىسىندا ەڭ الدىمەن باعدارلامالاردىڭ دۇرىس بولۋىنا باسا ءمان بەرىلەدى. سودان كەيىن عانا ساراپتاما جاسالىپ بارىپ وقۋلىققا ەنگىزىلەتىن بولادى.
«ساراپتاماعا مۇعالىمدى 7 كۇنگە شاقىرىپ، قانشاما كىتاپقا ساراپتاما جاسا دەگەن كەزدە ونىڭ ەش تيىمدىلىگى بولمايدى. ويتكەنى، جاقسى ءمۇعالىم كىتاپقا ساراپتاما جاسايتىن جاقسى مامان دەگەن ءسوز ەمەس. وقۋلىق تانۋ دەگەن بولەك عىلىم. ونىڭ وزىندىك زاڭدىلىقتارى بار. جالپى بيىل ءبىز وقۋلىقتارعا قاتىستى جاڭا ەرەجە قابىلدادىق. ەندى بۇدان كەيىن شىعاتىن وقۋلىقتار باسقا ساپادا جارىق كورەدى»، - دەدى اسحات ايماعامبەتوۆ.
اۆتور: مارلان جيەمباي
