مۇحتار ماعاۋين. ءبىزدىڭ عالەكەڭ

ال ون جاس - مۇلدە الشاق. جيىرما جاس… ءتىپتى شىعان. شيكى ەمەس، تولىمسىز ەمەس، ءبىراق عۇمىرلىق كەشۋ تۇرعىسىنان العاندا، تىم تومەندە جاتىر. كەيدە وسى بالالاردىڭ، وزىڭە تەتە بولماسا دا، ءبىرشاما، ەگدە دەپ ايتپايىن، ۇلكەن بەلەسكە جەتكەنىن ەستىگەن، بىلگەن كەزىڭدە كادىمگىدەي اڭتارىلىپ قالاسىڭ. وسى رەتتە بەلگىلى قالامگەر، رەجيسسەر، پروديۋسەر ءھام قوعام قايراتكەرى عالىم دوسكەن باۋىرىمنىڭ الپىس جاسى توسىن حابار بولىپ كورىندى. ارينە، ءسۇيىنىشتى جاڭالىق. الپىس دەگەن… الپىس قوي، ياعني بار جاعىنان تولىسقان، اقساقال تۇعىرىنا اياق باسىپ، ۇلت رۋحانياتىنداعى بەلگىلى تۇلعا رەتىندە ءبىرجولا تانىلعان اسقارالى بيىك.

سونىمەن قاتار، جاڭا، بۇرىنعىدان دا ەڭسەلى مەرەي مەن كەڭ ورىسكە بەت قويعان ەرەكشە قاقپا. ءوزىمنىڭ الپىستان كەيىنگى تىرشىلىگىم مەن جازۋىمدى ايتىپ وتىرمىن. بۇگىن سەكسەنگە كەلسەم، ارالىقتاعى جيىرما جىل - بۇعان دەيىنگى بار عۇمىرعا پارا-پار سياقتى.

ءيا. مەن - سەكسەن. عالەكەڭ الپىستىڭ ەسىگىنەن ەندى عانا سىعالاپ تۇر. شىنىندا دا بالاقان ەمەس پە. بالاقان، ءارى قايراتى قابىنداپ تۇرعان ساقا جىگىت. الاشتىڭ ازاماتى.

بۇدان قىرىق… قىرىق ءۇش جىل بۇرىنعى شىن بالا كەزى كوز الدىمدا. قازاقتىڭ اباي اتىنداعى پەداگوگتىق ينستيتۋتىنداعى قابىلداۋ ەمتيحانى. مەن وسىنىڭ الدىندا عانا ۇستازدىق جۇمىسقا اۋىسقام. جوعارعى باسشىلارىمىز بىردەن-اق دۇربەلەڭ ناۋقانعا جەگىپتى. العاش جانە سوڭعى رەت. ءپان كوميسسياسىنىڭ ءتوراعاسى - جازۋشى، پروفەسسور نىعمەت عابدۋللين ەدى. مەيلىنشە تازا كىسى. ءارى جوعارعى وقۋ ورىندارىندا كەيىنگى بىلىقتىڭ ءورىس الا قويماعان كەزى. فيلولوگيا فاكۋلتەتىنىڭ قازاق بولىمىنە ەلۋ ورىن بولىنگەن، ال ۇمىتكەر بالالاردىڭ ۇزىن سانى ءۇش ءجۇزدىڭ ۇستىندە. قاتاڭ ىرىكتەۋ بولدى. جانە مەيلىنشە ءادىل دەر ەدىم. وسى قازپيگە ىلگەرىندى-كەيىن تۇسكەن بالالاردىڭ ىشىنەن رەسپۋبليكاعا تانىمال اقىن، جازۋشى دا، عىلىم دوقتورى، ادەبيەتشى قايراتكەر دە شىقتى.

سودان، ەمتيحانشى ۇستازداردىڭ اۋەلگى شاعىن وتىرىسىندا نىقاڭ ايتىپ ەدى. «جاقسى بالالارعا اباي بولايىق؛ وسى ءۇش ءجۇز ابيتۋريەنت ىشىندە جالعىز مەداليست بار ەكەن، قاتەدەن كەتپەسىن»، - دەپ، قۇلاققاعىس قىلدى. ارينە، توپىر ىشىندە جاڭساق جاعدايلار دا ۇشىراسىپ قالۋى ىقتيمال. نىقاڭ بۇل مەداليستى سەنىمدى، ءارى جاقىن كىسىسى ماعان تاپسىرار دەپ ويلاپ ەدىم، سول جەردە جانە كەيىن دە ارناپ ەشتەڭە ايتپادى. اۋەلگى سىن - جازبا شىعارما. جانە جازىپ بىتكەن سوڭ، بارلىق جۇمىس رەكتورات تاراپىنان بۇركەمە شيفرعا تۇسەدى. ەندى جەتى-سەگىز مۇعالىم، وڭاشا بولمەدە، جاپپاي تەكسەرىپ جاتىرمىز. كوبىنە ءۇنسىز. اقىرى ءبىر مەزەتتە نىقاڭنىڭ كوڭىلدى داۋىسى شىقتى: «وي، جارايسىڭ! ەر ەكەن ءوزى دە!..» اڭتارىلىپ قالىپ ەدىك. «ماناعى جالعىز مەداليسىمىز، - دەدى. - مىنە، ادال بەسى. ءتۇستى وقۋعا!» - دەگەن ءماز بولىپ. مەنىڭ كەزىمدە ورتا مەكتەپتى التىن، نەمەسە كۇمىس مەدالعا بىتىرگەن بالا رەسپۋبليكادان ماسكەۋگە دەيىنگى كەز كەلگەن جوعارعى وقۋ ورنىنا سىناقسىز قابىلداناتىن. كەيىن جاپپاي ەمتيحانعا كەسىلدى. ال بۇل تۇستا نەگىزى، ءبىر ساباعىنا ۇزدىك باعا السا جەتىپ جاتىر. ءسويتىپ، ءبىزدىڭ جالعىز مەداليسىمىز قاتاڭ تالقىدان مۇدىرمەي ءوتتى. نىقاڭ كەشە ءوزى بايقاپ، بەلگىلەپ قالدى ما، بىزگە ءوز قولىنان ساناپ تاپسىرار كوپ جۇمىستىڭ ىشىنەن قاپىسىز تانىپتى. ءوزى قاراپ، ناتيجەسىن دە ءوزى شىعاردى. جالعىز مەداليسىمىزدىڭ ادەبيەت شىعارماسىنا مەيلىنشە ريزا بولىپ ەدى. ارتىنشا، شيفرلاردى تاراتىپ، تيەسىلى تىزىمگە قوندىرعان كەزدە ءبارىمىز دە انىعىن بىلدىك - ۇزدىك شىققان بالانىڭ ەسىمى عالىم دوسكەنوۆ ەكەن!

ستۋدەنت عالىمنىڭ جالعاس زاماندا ەجەلگى ادەبيەت جانە ⅩⅨ عاسىر بويىنشا مەنەن ءدارىس العانىن، سودان سوڭ نىعمەت ءعابدۋلليننىڭ، سەرىك قيرابايەۆتىڭ، تاعى باسقا دا ۇستازداردىڭ الدىنان وتكەنىن، جاي عانا ۇزدىك ەمەس، ازات وي، تەرەڭ پايىمدى، ەركىن ءارى ەركە ستۋدەنت بولعانىن تاراتىپ ايتپاي-اق قويايىن. ينستيتۋتتان سوڭ بىردەن-اق قاتارىنان وزا شىقتى.

بۇل كەزدە مەن ەركىن شىعارماشىلىق جۇمىسقا كوشكەم، ودان ءارى - باسپا مەن جۋرنال توڭىرەگى. عالىم گازەتتە، ونەر مەن مادەنيەت سالاسىندا ءارقيلى قىزمەتتە ءجۇردى، اقىرى «قازاقستان پيونەرى» گازەتىنىڭ باس رەداكتورى بولىپ تاعايىندالدى. سوۆەتتىڭ ىرگەسى شايقالا باستاعان كەز، ايتكەنمەن تۇعىرى بەرىك تۇر. وسى الماعايىپ كەزەڭدە پيونەر گازەتىنىڭ اتىن «ۇلان» دەپ جاڭارتتى جانە قازاقتىڭ جاس ۇلانىنا ۇلگى، ونەگە بەرەر تىڭ مازمۇنعا كوشىردى.

بۇدان سوڭ، جاڭا زامان تابالدىرىعىندا اكادەميانىڭ ادەبيەت ينستيتۋتىنا اۋىستى، ەندى عىلىم جولىن قۋار دەپ ويلاپ ەدىم، سويتسەم، بۇگىنگى كۇن ءۇشىن ۇتىمدىراق باسقا ءبىر سالاعا بەيىمدەلە باستاپتى. سونادان بەرى مەنىمەن قاتىناسىن ۇزبەگەن، كەيدە سالەمدەسىپ، كەيدە قاجەتتى اقپار، ازعانا كەڭەسپەن كەلىپ تۇراتىن. ءبىر كۇنى ناقتى ۇسىنىس اكەلدى. قاسقا جولدى قاسىم حان تۋرالى شاعىن مەتراجدى، دەرەكتى كينو تۇسىرسەم دەيدى.

«ءسىز سەناريىن جازىپ بەرسەڭىز، مىنا «قازاق تاريحىنىڭ الىپپەسىندەگى» باردى كەڭەيتىپ». مەن ءۇشىن مۇلدە بوتەن جانر. ايتكەنمەن، قاجەتتىلىككە بالاپ، ءارى عالىمنىڭ كوڭىلىن قيماي، كەلىستىم. ەندى قالاماقىسىن وڭدايمىن دەگەن. ياعني، وسى تارشىلىق كەزەڭدە مەنى جارىلقاماق، ءارى قازاققا كەرەكتى، كوزبەن كورىپ، كوڭىلمەن ۇعاتىن ۇلگىلى فيلم شىعارماق. اقىرى، جوعارعى باسشىلارى ريزاشىلىق بەرمەي، بۇل باستاما اياقسىز قالدى. عالىم وكىنگەن شىعار، ال مەن ارقام كەڭىپ، ەندى كولدەنەڭگە ايالداماي بۇرناعى جۇمىستاردى ودان ارى جالعاستىرعان ەدىم.

بۇدان سوڭعى كەزەڭدە عالىمنىڭ تاۋەلسىزدىككە جاڭا جەتكەن الاش جۇرتى ءۇشىن ۇلاعاتتى، ءارى ۇلگىلى، ۇلكەن قوعامدىق قىزمەتى باستالعان. عايىپتان دەپ ايتايىن، «قازاقستان» تەلە-راديو كورپوراتسياسىنىڭ ءتوراعاسى بولىپ تاعايىندالدى. ياعني، قۇزىرلى مينيستر. ياعني، بارشا قازاقتىڭ كوزبەن كورىپ، قۇلاقپەن ەستيتىن رۋحاني، ادەبي، ساياسي الەۋمەتتىك اۋەزىنىڭ تۇتقاسىن ۇستاپ، باعىت-باعدارىن ايقىندايتىن ەڭ ۇلكەن تورە!

عالىم دوسكەن وسى ءبىر، اسا كۇردەلى، ابىرويلى، ءارى قيعىلىق سالادا بەس جىلدان استام جەمىستى قىزمەت اتقاردى. قازاق حالقىنىڭ رۋحاني ءورىسىن كەڭەيتىپ، جاڭا ءبىر ارناعا بۇرعان، تازا ۇلتتىق تۇرعىداعى حابارلار مەن قويىلىمدار. بۇل رەتتە جالپى جۇرت ەنتەلەي قاراعان، كوپتىڭ كوزىن اشقان دەمەيىك، كوڭىلىن دەلبەپ، كوكجيەگىن كەڭەيتكەن، جاڭا ءبىر سانا مەن توسىن ويلارعا جەتەلەگەن «شىننىڭ ءجۇزى» سۇحباتتار سەرياسىن، «مەزگىل» ساياسي ساراپتاماسىن، «كۇلتوبە» ساياسي-ينتەللەكتۋالدىق كلۋبىن، كۇنى بۇگىنگە دەيىن ۇمىتىلماعان، باسقا دا ادەبي، مادەني حابار مەن جوبالاردىڭ اتىن اتاۋدىڭ ءوزى جەتكىلىكتى بولسا كەرەك.

قايتالاپ ايتايىق، «قازاقستان» تەلە-راديو كورپوراتسياسىنىڭ عالىم دوسكەن باسقارعان كەزدەگى سان سالالى، باي مازمۇندى قويىلىمدارى شىن مانىسىندەگى تاۋەلسىزدىك كەزەڭىندە ۇلتتىق اۋەز قانداي بولۋى كەرەكتىگىن ايعاقتاعان ەدى. الايدا، سول قالپىندا زاڭدى جالعاسىن تاپپاي، ورتا جولدان كەسىلدى. ءبىز ءسوز جۇزىندە بولعانىمەن، ءىس جۇزىندە تولىق ازاتتىققا جەتپەپپىز، ىرگەدە بۇرناعى يمپەريالىق وكتەم پيعىلمەن ءار ىسىڭە ارالاسىپ وتىرعان الپاۋىت كورشىڭ بار، ىشتە باياعى قۇلدىق سانادان قۇتىلماعان، تەك ءوزىنىڭ ءبىر كۇندىك تىنىشتىعى مەن باراقاتىن عانا ويلايتىن قورعانشاق وكىمەتىڭ بار. ايتسە دە، وسى 2001-2006-جىلدار ارالىعى، قايتكەندە دە ءبىرشاما ۇزاق، ءورىستى، كەڭىستى زاماندا ەركىن ويلى، ءارى باتىل مينيستر قالىپتاعان ۇلتتىق تۇرعىداعى جازبالار مۇلدە جويىلىپ كەتپەگەن شىعار، ۋاقىت وزا كەلە ەفيرگە قايتادان جول اشىپ، جۇرتشىلىق الدىنا تارتىلىپ جاتسا، ءالى دە قانشاما يگىلىككە ۇيىتقى بولار ەدى دەپ ويلايمىن. قايتكەندە، ءىز- ءتۇسسىز، اۋاعا ءسىڭىپ جوعالعان جوق، كەيىنگى قاۋىمنىڭ كوڭىلىن اشتى، وي-ساناسىنا قوزعاۋ سالدى، ياعني، قازاق رۋحانياتىنداعى قاجەتتى قىزمەتىن اتقارىپ كەتتى.

عالىم دوسكەن وسىنشاما ۇلاعاتتى قىزمەتى ءۇشىن وكىمەتىمىزدەن العىس المادى، كەرىسىنشە، قۋدالانعان، ءتىپتى، ازات باسىنا قاتەر تونگەن كەزى بار. بۇگىنگى اتاۋسىز تيىم زامانىندا تاراتىپ ايتپاي-اق قويالىق. جۇرتشىلىق كوكەيىنەن ورىن الدى، حالقىنا ۇمىتىلماس قىزمەت جاسادى - بۇدان ارتىق نە كەرەك.

وسى سوڭعى، ۇلكەن مانسابىندا جۇرگەندە عالىمنىڭ مەنىمەن كۇندەلىكتى حابارلاسۋعا مۇرشاسى كەلە بەرمەيتىن. كورپوراتسيانىڭ جانە ءبىر ۇلكەن باستىعى تۇرسىنجان شاپاي ارقىلى عانا جالعاسىپ تۇردىق. ءوزى باستىق بولعان ادام باسقانىڭ باسشىلىعىنا قول سۇعىپ، اقىل بەرۋگە ءتيىس ەمەس، ايتكەنمەن جالپى ريزاشىلىق ۇستىنە كەيبىر كەزدە، كەيبىر جاۋاپتى حابارعا قاتىستى كەڭەس قوسار ەدىم، ونىڭ ىشىندە، ءبىر جولى جۋرناليست ەتيكاسىنا قاتىستى رەنىش ايتقانىم بار. اقىرى، عالىم سىرعاناپ، پراگاعا كەلگەن كەزىندە اعالى-ءىنىلى قاتىناسىمىز بۇرىنعىدان دا جاقىن، جاڭا ءبىر قالىپقا كوشكەن ەدى.

مەن عالىم دوسكەننىڭ ۇزاق جىلدارعى قالامگەرلىك جۇمىسىن، سەناريست، رەجيسسەر، پروديۋسەرلىك قىزمەتىن تىزبەلەپ ايتايىن. الايدا، تەلە-راديو كورپوراتسياسىنان سوڭعى «ەل» پروديۋسەرلىك ورتالىعىنىڭ جەتەكشىسى رەتىندە اتقارعان ءونىمدى جۇمىستارىن اتاماي كەتۋ مۇمكىن ەمەس. ونىڭ ىشىندە مەن قالىپتاعان «شىڭعىسحان» ەپوپەياسىنىڭ ءتورت تومىن بىرىنەن سوڭ ءبىرىن، بوگەلىسسىز، سول قالپىندا باستىرىپ شىعارعانى ءوز الدىنا ءبىر تاۋاريح. ودان دا زورى - ۇلتتىق رۋحانيات تارابىنداعى ۇزدىك ۇلگى - «قازاقتىڭ ءداستۇرلى 1000 ءانى» مەن «قازاقتىڭ ءداستۇرلى 1000 كۇيى» اتالاتىن، انتولوگيالىق اۋەزدى جيناقتار.

ۇلتىمىزدىڭ عاجايىپ اندەرى مەن كۇيلەرىن ⅩⅩ عاسىردىڭ 20-30-جىلدارىندا العاش رەت جيناقتاپ، نوتاعا ءتۇسىرىپ، ۇمىتپاستىق دارەجەگە جەتكىزگەن - ىزگى، كەمەڭگەر الەكساندر زاتايەۆيچ بولعانى بەلگىلى. بۇدان سوڭ بۇل سالادا اتاۋلى، جۇيەلى جۇمىس جۇرگىزىلگەن جوق. قازاقتىڭ ماڭگىلىك اۋەزى ءار تاراپتا، بىتىراپ، شاشىراپ جاتتى. مىنە، وسى ءبىر يگىلىكتى، ساۋاپتى، ءارى اسا قاجەتتى شارۋانى عالىم دوسكەن ءوزىنىڭ تىكەلەي مىندەتىنە بالاپتى. سىرت قاراعاندا، وپ-وڭاي سياقتى. ءار كەزدەگى گرامما-جازبالاردى تەرىپ الىڭىز دا، جيناقتاپ باستىرىڭىز. انىعى - مۇلدە كەرىسىنشە شىعىپتى. ەڭ تانىمال دەگەن ءان مەن كۇيدىڭ بىرنەشە نۇقساسى، ءارقيلى ورىندالۋى بار. ونىڭ ۇستىنە، بۇرناعى، سوڭعى جازبالاردىڭ كوبىنىڭ ساقتالۋ ساپاسى تومەن. بۇل دا بەرىدەگى قيىندىقتار. انىعى - ەجەلگى ءان مەن كۇيدىڭ كوبى ۇمىتىلعان، تاڭباعا تۇسپەگەن. اۋەلدە عالامات اشارشىلىق بولدى، وعان جالعاس سوۆەتتىك رەپرەسسيا، الەمدىك سوعىس. بۇدان كەيىن دە وڭىپ كەتكەنىمىز شامالى…

ەندى عالىم مەن ونىڭ كومەكشىلەرى اتا-قازاقتىڭ بۇرىنعى-سوڭعى بار اۋەزىن تۇگەندەمەك بولادى. ول ءۇشىن… قولدا بار قويمانى تۇبىنەن قوپارۋ عانا ەمەس، باسقا تاراپتى دا ءسۇزىپ شىعۋ قاجەت. ياعني، سوۆەت شەكاراسىنان تىس قالعان قازاقتار. مەن بىردە ايگىلى مىڭ ءاندى سانامالاي وتىرىپ تەكسەرسەم، سونىڭ ىشىندەگى حالىق اۋەندەرىن جيناقتاعان ءتورت ءجۇز نۇسقانىڭ تەڭ جارىمى - ارعى بەت، قىتاي قازاقتارىنان كەلگەن ەكەن. ەندى سالىستىرىپ قاراڭىز. مىنا جاقتا - قازاقستان، قالىڭ قازاق، ارعى جاقتا - وسى قازاقتىڭ الدەبىر بولشەگى عانا، الايدا، قوسقان ۇلەس - تەڭگە جاقىن. بۇل نە؟ ويلاپ تۇرساڭىز، مۇنداعى قازاق قيامەتتىڭ قىل كوپىرىنەن ءوتتى، بارىنان تۇگەلگە جۋىق ايىرىلدى. ارعى قازاقتىڭ دا جەتىسكەنى جوق، ايتكەنمەن، جاپپاي گەنوتسيدكە ۇشىرامادى. ناتيجەسىندە، ءوز ايماعىندا بارعا قوسا، بۇل جاقتاعى، جالپى قازاققا ءتان، ەجەلگى نۇسقالاردى تولىعىراق ساقتاپتى.

مىنە، وڭدى كوزقاراس، وسىنشاما ۇتىمدى، پاراساتتى ءھام تياناقتى جۇمىس ناتيجەسىندە اتا- قازاقتىڭ بار مۇراسى، ارعى جاق، بەرگى جاق دەمەي، بار ورتاعىمەن، ءبىر انتولوگيا قۇرامىنا ءتۇيىسىپ وتىر. ءان عانا ەمەس، كۇي اتاۋلى دا.

ارينە، ءوز كەزىندە ونداعان بىلگىر مامان اتقارعان قىرۋار جۇمىس. مادەنيەت مينيسترلىگى تارابىنان قولداۋ تاعى بار. الايدا، نەگىزگى ۇيىمداستىرۋشى، ەڭ باستىسى - باعىت بەرۋشى عالەكەڭ بولعانى انىق.

مەن وسى شاعىن لەبىزدى «عالەكەڭ» دەپ باستاسام، ەندى عالەكەڭ دەپ تۇيىندەگەلى وتىرمىن. مەنىڭ عالىم اتتى تاعى ءبىر باۋىرىم بار. عالىم بوقاش. كوپ بۇرىن الماتىدا جالعاستىق، ودان كەيىن پراگادا، مەنىڭ ەدىگە بالاممەن ارىپتەس قىزمەت اتقاردى. ەندى امەريكادا قاتارلاس تۇرىپ جاتىرمىز. كەيىنگى بۋىندا مەن تانىعان تەرەڭ جىگىتتەردىڭ ءبىرى. وسى ەكى عالىم قاباتتاسقان سوڭ، ۇلكەنىن ۇلىقتاپ، عالەكە دەيتىن بولدىم. مەن عانا ەمەس، ءبىزدىڭ ۇيدەگى جەڭگەسى جانە كىشى عالىمنىڭ ءوزى دە. ال ءبىزدىڭ بالالار مەن نەمەرەلەر عالەكەڭ اعا دەپ سويلەيدى. اناۋ ءبىر جىلى الماتىدا، تۇرسىنجان «عالىم» دەپ توتەلەپ وتىرعاندا، ءبىر ءتۇرلى سولەكەت كورىنەدى ەكەن، قولما-قول تۇزەتۋ جاسادىم، سەن دە عالەكەن دەپ ايت دەپ. قازاق ءراسىمى - مەنىڭ ەرەكشە قۇرمەتىم.

باياعى ورالحان مارقۇم بوكەيەۆ مەنەن ءۇش جاس كىشى ەدى. كىشى بولسا دا كەۋدەسى بار عوي. بىردە دوس-جار داستارقان باسىندا: «مۇحا، ارامىز نەبارى ءۇش جاس، مەن سىزدەن قاشانعى كىشى بولا بەرەم»، - دەدى. سوندا ايتتىم: «توقسانعا كەلگەندە دە مەنى قۋىپ جەتە المايسىڭ، قاشاندا مەن - ۇلكەن، سەن - كىشى» دەپ. مويىنداپ قويعان. سول وراش مەنىڭ ەلۋىمە جەتپەي كەتتى. وبال، ۇلكەن وكىنىش. شىندىعىندا جاسى كىشىنىڭ الدىڭعى اعانى قۋىپ جەتۋى - ادەپكى جاعداي ەكەن. الدىمەن ەلۋگە كەل، ودان سوڭ الپىس، جەتپىس. وكشەلەپ وتىراسىڭ. اقىرى، ءتۇپتىڭ تۇبىندە، جۇزگە جەتىپ، وزىپ كەتۋىڭ دە مۇمكىن.

ەندى وسى عالەكەڭە الپىستىڭ ورىندە ايتار تىلەگىم:

سەن قايتكەندە باقىتتى ادامسىڭ. ەل- جۇرتىڭا ويداعىداي قىزمەت جاسادىڭ. ۇل مەن قىز - ءتورت پەرزەنت ءوسىردىڭ، ەندى نەمەرەلەردى قىزىقتىرىپ وتىرسىڭ. «اۋىرىپ تۇردىڭ، اۋناپ تۇردىڭ» دەگەندەي، قازىرگى دەنساۋلىعىڭ ءتىپا، ءتىپا، وتە جاقسى. مىنە، اسقارالى الپىسقا القىنباي جەتىپ وتىرسىڭ. الدا - جىگەرلى جەتپىس تۇر. ودان ءارى - سەكسەننىڭ سەڭگىرى. ياعني، مەنىڭ وكشەمدى باستىڭ دەگەن ءسوز. بۇل كەزدە اعاڭ دا توقساندى جەمىرىپ قالسا كەرەك. اشىلىپ ايتسام، وتكەن مەرەكەلى كۇنى وزىمە توقسان جەتى دەگەن مەجە قويدىم. وسى جاقىندا، دۇنيەگە جاڭا كەلگەن توقاي-تەمىر دەگەن نەمەرەمنىڭ ون سەگىز جاسىنا تەڭەپ، تاعى ءبىر جىل قوستىم. سەن ءوز تارابىڭنان جانە ءبىر جاس ۇستەمەلەپ، جامبىل اتامنىڭ شاپانىنا وران. ودان ارعىنى ءوزىڭ بىلەسىڭ. ءتاڭىرىنىڭ قالاۋى بويىنشا، جۇزدەن اسۋ دا قيىن ەمەس. ەڭ باستىسى - قاشاندا باسىڭ اۋىرماسىن، ەڭبەگىڭ توقىراماسىن، توڭىرەگىڭ تۇگەل، ەل-جۇرتىڭ امان بولسىن!

مۇحتار ماعاۋين،

massaget.kz