اقتوبەدە كوروناۆيرۋسپەن كۇرەستە كوز جۇمعان باس دارىگەردىڭ سۋرەتى ءۇي قابىرعاسىنا سالىندى
اقتوبەدە ينفەكسيالىق اۋرۋحانانىڭ باس دارىگەرى قاليحان قوزباعاروۆ شىلدە ايىندا كوز جۇمعان بولاتىن. ارىپتەستەرى ونى اقتىق ساپارعا شىعارىپ سالدى . پرەزيدەنت قاسىم-جومارت توقايەۆتىڭ جارلىعىمەن مارقۇم قاليحان قوزباعاروۆقا قازاقستاننىڭ ەڭبەك ەرى اتاعى بەرىلدى . ال تۋعان جەرى حرومتاۋ اۋدانىندا كوپقاباتتى ءۇيدىڭ قابىرعاسىنا سۋرەتى سالىندى.
«الەمدى ابىگەرگە سالعان ىندەتپەن كۇرەستە الدىڭعى شەپتە بولىپ، ماماندىعىنا دەگەن ادالدىعى مەن انتىنا بەرىك جەرلەسىمىز قاليحان ەسبوسىن ۇلىنا حرومتاۋلىقتار قۇرمەت كورسەتە ءبىلدى. «ەرىن ارداقتاعان ەل وزار» دەمەكشى، ەلدى دۇرلىكتىرگەن دەرتتى اۋىزدىقتاۋ جولىندا ايانباي ەڭبەك ەتكەن، ادامدىعى مەن ازاماتتىعىن اينالاسىنا كورسەتە بىلگەن قاليحان ەسبوسىن ۇلىنىڭ سۋرەتى قالا ورتالىعىنداعى كوپ قاباتتى ءۇيدىڭ قابىرعاسىنا سالىنىپ، اسىلدىڭ سىنىعى جەرلەستەرىنىڭ ساناسىندا ساقتالىپ، ەڭبەگى كوپكە ۇلگى بولىپ تۇراتىن بولدى»، - دەپ جازدى اۋدان اكىمدىگى الەۋمەتتىك پاراقشادا.
