كوروناۆيرۋستىڭ بالالارعا قاۋىپتى جاڭا ءتۇرى شىقتى – دەنساۋلىق ساقتاۋ ءمينيسترى جاۋاپ بەردى

الماتى. قازاقپارات - مەسسەندجەرلەردە بەلگىسىز ايەل قازاقستاندىقتاردى كوروناۆيرۋستىڭ ءۇشىنشى تولقىنى تۋرالى ەسكەرتكەن اۋديو جازباسى تارادى.

دەنساۋلىق ساقتاۋ مينيسترلىگى بۇل حابارلاماعا قاتىستى تۇسىنىك بەردى، - دەپ حابارلايدى Tengrinews.kz ءتىلشىسى.

بەلگىسىز ايەلدىڭ ايتۋىنشا، تامىزدا كوروناۆيرۋستىڭ ءۇشىنشى تولقىنى بولادى، ول بالالارعا قاۋىپ توندىرەدى.

«الماتى جانە الماتى وبلىسىندا بالالاردىڭ وكپەسىنىڭ اۋرۋ دەرەگى كوبەيىپ كەتتى. دارىگەرلەر مۇنى كوروناۆيرۋستىڭ ءۇشىنشى تولقىنىمەن بايلانىستىرىپ وتىر. سوندىقتان بارلىق جاس اناعا ەسكەرتكىم كەلەدى. بالالارىڭىزدى قورعاڭىزدار. ولارعا بالمۇزداق جانە سۋىق سۋ بەرمەڭىزدەر. سۋىق جەرگە بارماڭىزدار. مەن سىزدەرگە ەسكەرتەمىن!

بالالاردىڭ وكپەسى اۋىرادى، ءىشى وتەدى. وڭتۇستىكتە كوپتەگەن بالا ءولىپ جاتىر. ۆيرۋس اۋادا ءجۇر. سوندىقتان اۋىلداستار، ءىشتىڭ اۋىرعانىن باساتىن ءدارى مەن انتيبيوتيك ساتىپ الىڭىزدار»، - دەيدى ول.

تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى بۇل اقپاراتقا قاتىستى تۇسىنىك بەردى.

«بۇل اقپارات شىندىققا جاناسپايدى. سونداي-اق، مالىمەتتى كىم تاراتقانىن انىقتاۋ ءۇشىن اقپارات تۇركىستان وبلىسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە، ىشكى ىستەر ورگاندارىنا جىبەرىلدى.

سىزدەردەن الەۋمەتتىك جەلىدەگى جالعان اقپاراتقا سەنبەۋلەرىڭىزدى ءوتىنىپ سۇرايمىز. تەك رەسمي دەرەككوزدەرىنە سەنىڭىزدەر. جالعان اقپارات تاراتقاندار ق ر قىلمىستىق كودەكسىنىڭ 274-بابى بويىنشا جاۋاپقا تارتىلاتىنىن ەسكەرتەمىز»، - دەيدى كوميتەت قىزمەتكەرلەرى.