قازاقستاندا وقۋشىلارعا مەكتەپ فورماسىن كيۋ مىندەتتەلمەيدى

نۇر- سۇلتان. قازاقپارات - قازاقستاندا الداعى وقۋ جىلىندا وقۋشىلارعا مەكتەپ فورماسىن كيۋ مىندەتتەلمەيتىن بولادى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.

«مەكتەپ فورماسى تۇسىنىگىنىڭ ءوزى، ونىڭ قاعيداتى مەن تالاپتارى ەشقايدا جوعالىپ كەتپەيدى. ءبىراق ءبىز بۇل بۇيرىققا ارنايى تارماق ەنگىزەمىز. ياعني ول تارماققا توتەنشە جاعداي، كارانتين، شەكتەۋ شارالارى مەن باسقا دا فورس- ماجور جاعدايلار جاتادى. ءدال وسىنداي جاعدايلاردا بالالارعا كلاسسيكالىق ىسكەرلىك كيىممەن كەلۋگە رۇقسات بەرەمىز»، - دەدى اسحات ايماعامبەتوۆ ءبىلىم جانە عىلىم مينيسترلىگىنىڭ ونلاين فورماتتاعى تىلشىلەرمەن كەزدەسۋىندە.

ونىڭ ايتۋىنشا ەگەر اتا- انالاردا قازىرگى ۋاقىتات مەكتەپ فورماسىن الۋعا جاعدايى بولماسا بالالارعا قاراپايىم كلاسسيكالىق كيىم الىپ بەرۋگە بولادى.

«مۇنداي شەشىمدى ءبىز قابىلدادىق. قازىرگى جاعدايدا بۇل شەشىمنىڭ ماڭىزى زور دەپ ەسەپتەيمىز. مۇنى كەڭەس سيپاتىندا ەمەس، ءبىلىم جانە عىلىم مينيسترلىگىنىڭ ادىلەت ورگاندارىندا تىركەگەن بۇيرىعى نەگىزىندە جۇرگىزىپ جاتىرمىز. شەشىمنىڭ نورماتيۆتى- قۇقىقتىق قۇجات رەتىندە سيپاتى بولۋى كەرەك»، - دەدى ول.

اسحات ايماعامبەتوۆ دەسە دە بۇل وزگەرىس ۋاقىتشا ەكەنىن ەسكەرتتى.

ەسكە سالا كەتسەك پرەزيدەنت قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا مەكتەپتەردىڭ الداعى جاڭا وقۋ جىلىنا دايىندىعىن پىسىقتاعان بولاتىن. «بۇل - اكىمدىكتەر مەن مينيسترلىكتىڭ جۇمىسىنىڭ ناتيجەسى. اكىمدىكتەر جاڭا وقۋ جىلىنا دەرەۋ دايىندالىپ، مەكتەپتەر مەن جەكەلەگەن مۇقتاج وتباسىلاردى قاجەتتى تەحنيكامەن جابدىقتاۋعا ءتيىس. 1- قىركۇيەكتە جاڭا وقۋ جىلى باستالادى. مينيسترلىكتىڭ بۇل وقيعاعا دايىندىعىنا كۇمانىم بار. بالالار قالاي وقيدى - مەكتەپتە نەمەسە قاشىقتا؟ مۇعالىمدەردىڭ جاڭا وقۋ جىلىنا دايىندىعى قانداي؟»، - دەپ سۇراق قويدى مەملەكەت باسشىسى.

اۆتور: ايان بەكەن ۇلى