پاۆلودارلىق اقىن ابايدىڭ ولەڭىنە ءان جازدى
پاۆلودار وبلىسى باياناۋىل اۋدانىندا تۇراتىن جۋرناليست، اقىن، ارداگەر ۇستاز زەكەباي سولتانباي اباي قۇنانبايەۆتىڭ «عاشىقتىق ءتىلى - ءتىلسىز ءتىلسىز ءتىل» ولەڭىنە ءان جازدى، دەپ حابارلايدى حابار24.kz.
جاڭا تۋىندىنىڭ تۇساۋكەسەرى بۇقار جىراۋ اتىنداعى وبلىستىق مۋزەيدە ءوتتى. «ەكى جاستىڭ ءبىر- بىرىنە دەگەن سۇيىسپەنشىلىگى، عاشىقتىق سەزىمى سيپاتتالعان عاجايىپ ءاننىڭ باعاسىن تىڭدارمان قاۋىم الداعى ۋاقىتتاردا بەرە جاتار» - دەيدى شارانى ۇىمداستىرۋشىلار.
ونى وبلىسقا تانىمال جاس ءانشى باۋىربەك بەكتەمىروۆ ورىندادى. «بۇگىن مىنە، مەنىڭ ءان قورجىنىما اباي قۇنانبايەۆتىڭ سوزىنە جازىلعان «عاشىقتىق ءتىلى - ءتىلسىز ءتىلسىز ءتىل» ءانى ەنىپ وتىر. بۇگىن مىنە تۇساۋى كەسىلىپ جاتىر. وسى ءاننىڭ ويى، ماعىناسى وتە تەرەڭدە. بۇل انگە ءان جازعان ءوزىمىزدىڭ جەرلەسىمىز، پاۆلودار وبلىسىنا تانىمال قازىرگى تاڭدا 89 جاسقا كەلىپ وتىرعان زەكەباي سولتانباي ۇلى»، - دەيدى ەستاي اتىنداعى قالالىق مادەنيەت سارايىنىڭ ءارتيسى باۋىربەك بەكتەمىروۆ.
ايتا كەتۋ كەرەك، پاندەمياعا بايلانىستى ناۋرىز ايىنان باستاپ بۇكىل مادەنيەت سالاسى تولىق ونلاين - رەجيمگە كوشتى. سوعان قاراماستان الەۋمەتتىك جەلىلەر ارقىلى 50 گە تارتا مادەني شارا ءوتتى. قالانىڭ ىرگەسىندە تۇرعان پاۆلودار اۋىلىندا ۇلى اقىننىڭ ەسىمىمەن اتالاتىن كوشە جوندەلىپ، 175 اعاش وتىرعىزىلعان.
ال تامىز ايىندا اباي قۇنانايەۆتىڭ ەسكەرتكىشى بوي كوتەرەدى. وبلىستىق بۇقار جىراۋ مۋزەيى دارا تۇلعانىڭ تاعىلىمدى سوزدەرىن ناسيحاتتايتىن اكسياعا باستاما بولدى.
«ءار سالا، ءار قالا تۇرعىنى بەلسەنە قاتىسىپ، اباي جىلىن اتاپ وتۋدە. مىسالى، مەملەكەتتىك ورگاندارعا كەلەتىن بولساق، مەملەكەتتىك مەكەمەلەردەن باسقا ءبىزدىڭ ترامۆاي باسقارماسى ترامۆاي بەزەندىرىپ، قالا كوشەلەرىندە ارنايى بيلبوردتار ورناتىلدى. كوشەلەر اباتتاندىرىلىپ جاتىر. اعاشتار وتىرعىزىلىپ جاتىر وسى مەرەيتويعا وراي اندەر شىعارىلىپ جاتىر. ەڭ ۇلكەن شارانىڭ ءبىرى ول اباي قۇنانباي ۇلىنىڭ تۇلعاسىنا پاۆلودار قالاسىندا ەسكەرتكىش ورناتۋ»، - دەدى قالالىق مادەنيەت جانە تىلدەردى دامىتۋ ءبولىمىنىڭ باسشىسى سامال بەگالينوۆا.
