تەگىن ونلاين شاحمات مەكتەبى اشىلدى

الماتى. قازاقپارات - قازاقستانداعى يۋنيسەف ادال نيەت ەلشىسى، شاحماتتان بىرنەشە دۇركىن الەم چەمپيونى، گروسسمەيستەر دينارا سادۋاكاسوۆا ونلاين شاحمات اكادەمياسىن اشتى.

«دينارا سادۋاقاسوۆانىڭ ونلاين شاحمات اكادەمياسى» الاڭىندا چەمپيوننىڭ وزىنەن بەينەساباقتار، تاپسىرمالار، تەستىلەر تابۋعا بولادى. كوروناۆيرۋس پاندەمياسىنا بايلانىستى تۋىنداعان جاعدايعا وراي كۋرستارعا قاتىسۋ تەگىن. سونىمەن قاتار كۋرستارعا تەگىن قاتىسۋ مۇمكىندىگى شەكتەۋلى ادامدارعا تۇراقتى نەگىزدە قولجەتىمدى بولادى.

«بارىنە ارنالعان شاحمات» - تۇرعىن ءۇي قۇرىلىس جيناق بانكىمەن بىرلەسىپ جۇزەگە اسىرىلىپ جاتقان جوبا. ءبىزدىڭ ماقساتىمىز - شاحمات ويىنىنا دەگەن قىزىعۋشىلىقتى ارتتىرۋ جانە ەلىمىزدىڭ شالعاي وڭىرلەرىندە شاحماتتى ۇيرەنگىسى كەلەتىن ادامدارعا مۇمكىندىك بەرۋ. الەم قارقىندى تۇردە دامىپ جاتىر، ءقازىر زياتكەرلىك قاسيەتتەر مەن ويلاۋ جىلدامدىعى ماڭىزدى. شاحمات - بۇل داعدىلاردى دامىتاتىن تاماشا قۇرال. الاڭدا مەنىڭ قاتىسۋىممەن ۆيدەو- ساباقتار، 5000-گە جۋىق تاپسىرما بار، - دەدى اكادەميانى قالاۋشى دينارا ساۋاكاسوۆا.

كۋرستارعا تۇرعىلىقتى جەرىنە قاراماستان بالالار دا، ەرەسەكتەر دە قاتىسا الادى. ولار شاحمات ويىنشىسىنىڭ دايىندىق دەڭگەيىنە بايلانىستى قالىپتاستىرىلعان. ءار كۋرس تانىمدىق ۆيدەو- ساباقتار مەن بەكىتۋگە ارنالعان (جەڭىل دەڭگەيدەن كۇردەلىگە دەيىن) 200 تاپسىرمانى قامتيتىن 20-25 بلوكتان تۇرادى. كۋرستى ءساتتى اياقتاعان سوڭ قاتىسۋشىلارعا ەلەكتروندى سەرتيفيكات بەرىلەدى. «ءبىز كوماندامىزبەن بارلىق دەڭگەيگە ارناپ 10 ساعاتتان استام شاحمات ساباقتارىن جازدىق. الاڭدا سونداي- اق تانىمال شاحمات ويىنشىلارىنىڭ دارىستەرى مەن سەمينارلارى جاريالاناتىن بولادى. ادامداردىڭ شاحماتقا دەگەن قىزىعۋشىلىعى ارتىپ، ۇيرەنۋ مۇمكىندىگى بولعانىن قالايمىز»، - دەدى شاحمات اكادەمياسىنىڭ ديرەكتورى اينۇر وتەشيەۆا.

www.24.kz