كوروناۆيرۋستى تۇماۋدان قالاي اجىراتۋعا بولادى؟

نۇر-سۇلتان. قازاقپارات - بۇگىن ورتالىق كوممۋنيكاتسيالار قىزمەتىندە وتكەن ونلاين بريفينگىدە جۇقپالى اۋرۋلار بويىنشا جەتەكشى مامان، پروفەسسور، مەديتسينا عىلىمدارىنىڭ دوكتورى ديناگۇل باەشەۆا كوروناۆيرۋس ينفەكسياسىن باسقا اۋرۋدان قالاي اجىراتۋعا بولاتىنىن ءتۇسىندىردى.

ديناگۇل باەشەۆانىڭ ايتۋىنشا، كوروناۆيرۋستىڭ اعزاداعى ينكۋباتسيالىق كەزەڭى جالپى العاندا 14 كۇنگە سوزىلۋى مۇمكىن. الايدا اۋرۋ بەلگىلەرى ءار ادامنىڭ يممۋنيتەتىنە بايلانىستى 4 شى، 5 شى نەمەسە 14-كۇنى پايدا بولۋى مۇمكىن.

اۋرۋ بەلگىلەرى پايدا بولعاندا، ينفەكسيانىڭ العاشقى كەزەڭى باستالادى. بۇل ۋاقىتتا اۋرۋ اعزاعا تاراي باستايدى. العاشقى كەزەڭ بەس كۇنگە دەيىن سوزىلۋى مۇمكىن.

«كوروناۆيرۋستىڭ كلينيكالىق كورىنىسى جەدەل راسپيراتورلى- ۆيرۋستىق ينفەكسيامەن ۇقساس كەلەدى. دەنە قىزۋى كوتەرىلەدى، جوتەل پايدا بولادى، بۋىن سىرقىرايدى، باس اۋىرادى. دەگەنمەن كوروناۆيرۋستىڭ وزىنە ءتان قوسالقى كلينيكالىق كورىنىستەرى بار. كوروناۆيرۋس ينفەكسياسىن جۇقتىرعان ادامنىڭ مۇرنى ءيىس سەزبەي قالادى، اۋىزعا تاماق ءدامى كەلمەيدى. سونىمەن قاتار كوروناۆيرۋستىڭ باسقا دا كلينيكالىق كورىنىستەرى بار. جوتەل بولسا دا، دەنە قىزۋى كوتەرىلمەۋى مۇمكىن»، - دەيدى جەتەكشى ينفەكسيونيست دارىگەر.

سونىمەن قاتار كوروناۆيرۋستى اللەرگيامەن شاتاستىرىپ جاتقاندار دا بار. كوروناۆيرۋس كەزىندە مۇرىن ءبىتىپ، السىزدىك، دەنە قىزۋى پايدا بولادى. بۇل - تەك جۇقپالى اۋرۋلارعا ءتان بەلگىلەرى.

«اللەرگيا كەزىندە مۇرىن ءبىتىپ، تىنىس الۋ قيىنداۋى مۇمكىن. ءبىراق ادام جالپى العاندا ءوزىن جاقسى سەزىنەدى»، - دەدى د. باەشوۆا. ونىڭ ۇستىنە ادەتتە ادام وزىندە قاي كەزەڭدە اللەرگيا پايدا بولاتىنىن بىلەدى.

دەي تۇرعانمەن ينكۋباتسيالىق كەزەڭنەن كەيىن كوروناۆيرۋستىڭ ەشقانداي كلينيكالىق كورىنىسى پايدا بولماۋى مۇمكىن.

«سيمپتومسىز نەمەسە جەڭىل تۇرمەن اۋىراتىنداردا ۆيرۋس سيمپتومدارى بولماۋى مۇمكىن. ءبىراق كوروناۆيرۋسكە انىقتايتىن پ ت ر ولاردىڭ بويىندا ۆيرۋس بار ەكەنىن كورسەتەدى. قازىرگى كەزدە كوروناۆيرۋس انىقتالعانداردىڭ 80 پايىزىندا اۋرۋ جەڭىل تۇردە جانە سيمپتومسىز وتەدى. ولاردىڭ ون بەس پايىزىندا اۋرۋ ورتاشا، بەس پايىزىندا اۋىر دارەجەدە وتەدى»، - دەدى د. باەشوۆا.

جەتەكشى ينفەكيونيست دارىگەردىڭ ايتۋىنشا، كوروناۆيرۋس انىقتالسا، ودان شوشىماۋ كەرەك. «كوروناۆيرۋس تۇماۋ ءتارىزدى تاراپ كەتتى. ودان قورىقپاۋ كەرەك. اۋرۋ انىقتالسا، باسقا ادامدارمەن قارىم- قاتىناستى توقتاتىپ، وقشاۋلانۋ كەرەك. ۇيدە باسقا ادامدار تۇراتىن بولسا، ناۋقاستىڭ بولەك بولمەسى بولۋى ءتيىس. ۇيدەگى بارلىق جەردى جۋىپ تازالاپ وتىرۋ كەرەك. اجەتحانا ورتاق بولسا، ونى ءجيى جەلدەتىپ وتىرۋ قاجەت»، - دەدى جەتەكشى ينفەكسيونيست.

د. باەشوۆا ۇيدەگى تەمپەراتۋرانى بەلگىلى ءبىر دەڭگەيدە ۇستاپ تۇرۋ ءۇشىن كونديتسيونەر قوسۋدىڭ قاجەتى جوق، ول اۋرۋدى ودان بەتەر اسقىندىرۋى مۇمكىن ەكەنىن ەسكەرتتى. «ودان دا ءۇيدى كۇنىنە ەكى رەت، وتىز مينۋتتان جەلدەتىپ وتىرعان ءجون».

جەتەكشى ينفەكسيونيست دارىگەر اۋرۋ بەلگىلەرى پايدا بولسا، ۇيدە وتىرىپ، جاقسى تاماقتانىپ، كۇش جيناۋ كەرەكتىگىن ايتادى. « ءۇش كۇن تەمپەراتۋرا بولۋى مۇمكىن. ول ءسىزدىڭ اعزاڭىز ۆيرۋسپەن كۇرەسىپ جاتىر دەگەن ءسوز. اۋرۋدى اسقىندىرىپ الماۋ ءۇشىن باسقا جاققا بارماي، ۇيدە وتىرىپ كۇش جيناۋ كەرەك».

د. باەشوۆا ەنتىكپە، شارشاۋ، دەنە قىزۋىنىڭ كوتەرىلۋى سياقتى اۋرۋ سيمپتومدارى پايدا بولسا، ەمحاناعا بارماي، جەدەل جاردەمگە حابارلاسۋ كەرەك دەيدى. نەمەسە ءوزىڭىز تىركەلگەن ەمحاناداعى دارىگەرگە حابارلاسىپ، كەڭەس سۇراعان ءجون.

ونلاين بريفينگىگە قاتىسقان باس سانيتار دارىگەر ايجان ەسماعامبەتوۆا ەلىمىزدە كوروناۆيرۋس 28856 ادامنان انىقتالعانىن، ونىڭ 18231 ادامدا اۋرۋ سيمپتوم بار، 10625 ادامدا سيمپتوم جوق ەكەنىن مالىمدەدى. سوڭعى اپتامەن سالىستىرعاندا اۋرۋ جۇقتىرعاندار سانى 1,4 ەسە وسكەن.

«اقمولا، تۇركىستان، قىزىلوردا، قوستاناي، جامبىل، پاۆلودار، سولتۇستىك قازاقستان، باتىس قازاقستان وبلىستارىندا اۋىرعاندار سانى ەكى ەسەدەن التى ەسەگە دەيىن ءوستى. الماتى، نۇر-سۇلتان، اتىراۋ، شىعىس قازاقستان، ماڭعىستاۋ وبلىسىندا 20-50 پايىزعا دەيىن ءوستى»، - دەيدى ا. ەسماعامبەتوۆا.

اۋرۋدىڭ ءورشۋىنىڭ نەگىزگى سەبەبى ادامدار ءبىر- بىرىمەن بايلانىستا بولعانىنان دەيدى باس سانيتار دارىگەر.

«سوڭعى اپتادا اۋرۋ جۇقتىرعانداردىڭ 37 پايىزى بايلانىستا بولعانداردىڭ اراسىنان، 38 پايىزى پروفيلاكتيكالىق تەكسەرۋ كەزىندە انىقتالدى. 25 پايىزى جەدەل راسپيتارلى-ۆيرۋستىق ينفەكسيامەن اۋىرىپ جاتقانداردىڭ اراسىنان انىقتالدى».

فوتو: almaty.tv