ايماعامبەتوۆ مۇعالىمدەرگە جالاقى تولەۋدەگى كەمشىلىك جايىندا: مينيسترلىك دەڭگەيىندە كوتەرەتىن ماسەلە ەمەس ەدى
نۇر-سۇلتان. قازاقپارات - مۇعالىمدەردىڭ ەڭبەكاقىسىن تولەۋگە قاتىستى ماسەلەنى وڭىرلەر دەر ۋاقىتىندا شەشۋى ءتيىس.
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«وكىنىشكە قاراي، وسىنداي وپەراتسيالىق ماسەلەلەرمەن اينالىسۋعا تۋرا كەلىپ وتىر. ارينە، بۇل وسى دەڭگەيدە كوتەرەتىن ماسەلە ەمەس. مينيسترلىك ەڭ باستىسى ستراتەگيالىق ماسەلەلەرمەن، ءبىلىم سالاسىنداعى ساياساتتى ىسكە اسىرۋ ماسەلەلەرىمەن اينالىسۋى كەرەك جانە ءبىزدىڭ تىكەلەي قىزمەتىمىز دە سول. ناقتى مۇنى (مۇعالىمدەرگە ۋاقىتى ەڭبەكاقى مەن ەڭبەك دەمالىس اقىسىن تولەۋ) جۇزەگە اسىراتىن - جەرگىلىكتى اتقارۋشى ورگاندار. ول ءۇشىن ءبىلىم باسقارمالارى، ءبىلىم بولىمدەرى، مەكتەپ باسشىلارى بار. وسىنداي دەڭگەيدە ەڭبەكاقى ماسەلەسىن تالداۋ، «ەڭبەكاقى كەي جەردە تولەنبەدى» دەگەن ماسەلەنىڭ ءوزىن كوتەرۋ - ارينە، ىڭعايسىز جايت. بۇل دەڭگەيدە كوتەرەتىن ماسەلە ەمەس ەدى. ءبىراق، بىزگە وتە كوپ ساۋال ءتۇسىپ جاتقاننان كەيىن ونى كوتەرىپ، ناقتى تاپسىرما بەرىپ، تەكسەرۋ جۇرگىزۋگە ءماجبۇر بولدىق»، - دەدى مينيستر ۆەدموستۆونىڭ اپپارات جينالىسى بارىسىندا.
وسىعان وراي ول ءتيىستى شارالار قابىلدانعانىن باسا ايتتى.
«الايدا كەلەسى جولى بۇل ماسەلەنى مۇنداي دەڭگەيگە كوتەرەتىندەي ورشىتۋگە بولمايدى. ءوز دەڭگەيلەرىڭىزدە شەشۋلەرىڭىز كەرەك. ءتيىستى شارالار قولدانىلسىن. كوميتەت ارى قاراي دا بۇل جۇمىستى جۇرگىزىپ، اياعىنا دەيىن جەتكىزەدى. ويتكەنى، بۇل - ارىپتەستەرىمىزدىڭ كونستيتۋتسيالىق قۇقىعى. سوندىقتان بۇل ماسەلەنى سوڭىنا دەيىن جەتكىزەتىن بولامىز»، - دەدى اسحات ايماعامبەتوۆ.
ايتا كەتەيىك، جينالىس بارىسىندا ق ر ب ع م ءبىلىم جانە عىلىم سالاسىنداعى باقىلاۋ كوميتەتىنىڭ ءتورايىمى گۇلزات كوبەنوۆابىرقاتار وڭىردە مۇعالىمدەرگە ەڭبەكاقى مەن ەڭبەك دەمالىسى اقىسىن تولەۋدە كەمشىلىكتەر بار ەكەنىن ايتقان بولاتىن.
اۆتور: مارلان جيەمباي
