نۇر-سۇلتاندا پ ت ر-تەستىلەر مەن اسا قاجەتتى اپپاراتتار ساتىپ الىنادى

نۇر-سۇلتان. قازاقپارات - نۇر-سۇلتاندا پ ت ر-تەستىلەر، وكپەنى جاساندى جەلدەتۋ جانە كومپيۋتەرلىك توموگرافيا اپپاراتتارى قوسىمشا ساتىپ الىنادى، دەپ حابارلايدى قازاقپارات.

«بۇگىن ەلوردا اكىمى التاي كولگىنوۆ ق ر دەنساۋلىق ساقتاۋ ءمينيسترىنىڭ مىندەتىن اتقارۋشى ءلاززات اقتايەۆامەن، جاۋاپتى حاتشى بوتاگوز جاقسەلەكوۆامەن، ۆيتسە-مينيستر ليۋدميلا بيۋرابەكوۆامەن، سونداي-اق زەرتحانالاردىڭ، «س ك- فارماتسيا» كومپانياسىنىڭ وكىلدەرىمەن، سانيتارلىق دارىگەرلەرمەن ونلاين- كەڭەس وتكىزدى. اكىمدىك پەن دەنساۋلىق ساقتاۋ مينيسترلىگى جول كارتاسىن بەكىتتى»، - دەلىنگەن ەلوردا اكىمدىگىنىڭ Instagram-داعى پاراقشاسىندا.

ءمالىم ەتىلگەندەي، ينفەكسيانى جۇقتىرعاندارعا ۋاقتىلى كومەك كورسەتۋ ءۇشىن قالا اۋرۋحانالارىندا قوسىمشا 720 ورىن دايىندالدى. اسكەري گوسپيتال جانە وزگە دە مەديتسينالىق مەكەمەلەر ستاتسيونار رەتىندە جاساقتالادى. 112 مىڭنان استام جەكە قورعانۋ قۇرالدارى ساتىپ الىندى. سونىمەن بىرگە وسى ايدا ستاتسيونارلارعا وكپەنى جاساندى جەلدەتەتىن 30 اپپارات جەتكىزىلەتىن بولادى. كەيىن قوسىمشا تاعى 200 اپپارات ساتىپ الىنادى.

«سونىمەن قاتار پ ت ر- تەستىلەۋ بويىنشا موبيلدى توپ قۇرىلادى. دەنساۋلىق ساقتاۋ باسقارماسى پتر- تەستىلەردى جيناۋ جانە وڭدەۋ بويىنشا زەرتحانالاردا جۇمىس ىستەۋ ءۇشىن مەديتسينالىق قىزمەتكەرلەردى وقىتادى. ەلوردا اكىمى التاي كولگىنوۆ كوروناۆيرۋسقا قارسى كۇرەستە قولدانىلاتىن مەديتسينالىق پرەپاراتتار مەن جابدىقتاردىڭ قورىن دەر كەزىندە تولىقتىرۋ قاجەتتىگىن اتاپ ءوتتى»، - دەلىنگەن اقپاراتتا.