ديماشتىڭ ءانىن بەرگەننەن كەيىن لاتۆيا راديوسىن بۇكىل الەم تىڭداي باستاعان
«PIK100FM» راديوسى 22 جىل بويى جۇمىس ىستەپ كەلە جاتقان لاتۆياداعى ءىرى راديوستانسيالاردىڭ ءبىرى. راديوتولقىنىندا 8- ماۋسىمنان باستاپ ديماشتىڭ ورىنداۋىنداعى يگور كرۋتوي مەن ميحايل گۋسەريەۆ جازعان «ليۋبوۆ ۋستاۆشيح لەبەدەي» ءانى، ال 15-ماۋسىمنان يگور كرۋتوي مەن لارا فابيان ارنايى جازعان «Your Love» كومپوزيتسياسى بەرىلە باستادى. ەكى ءان دە كۇنىنە ەكى رەت قويىلادى. كەيىن راديوستانسيانىڭ پلەيليستىندە ساقتالىپ، ءاردايىم بەرىلىپ تۇرماق.
لاتۆيا حالقىنىڭ قازاقستاندىق ءانشىنىڭ ونەرىنە دەگەن قىزىعۋشىلىق ونىڭ وسى ەلدە وتكەن جەكە كونسەرتىنەن كەيىن تۋىنداعان. بۇدان كەيىن، جانكۇيەرلەر قازاقستاننىڭ تاريحىمەن، مادەنيەتىمەن تانىسا باستاعان. ءتىپتى، قازاق ءتىلىن ۇيرەنۋدى قولعا العاندار بار. وسىنداي قىزىعۋشىلىقتى بايقاعان لاتۆيالىق «Dimash Latvia Dears» فان-كلۋبى قازاقستاندىق ورىنداۋشىنىڭ شىعارماشىلىعىن ءوز ەلدەرىندە ودان ءارى تانىتا ءتۇسۋ ارماندارىن ورىنداي باستادى.
«PIK100FM» راديوسى ديرەكتورىنىڭ دا ءانشىنىڭ جانكۇيەرى ەكەنىن بىلگەن فاناتتار ديماشتىڭ ءبىر ءانىن راديوعا قوسۋدى ۇسىنعان. كەلىسىمگە قول جەتكىزىلگەن سوڭ، العاشقى ءان رەتىندە يگور كرۋتوي مەن ميحايل گۋسەريەۆ جازعان «ليۋبوۆ ۋستاۆشيح لەبەدەي» تۋىندىسى تاڭداپ الىنعان.
«ءان ەفيردەن وتكەن سوڭ، لاتۆيالىق راديوستانسيانى بۇكىل الەم تىڭداي باستادى. ديماشتىڭ ونەرىن باعالاۋشىلار راديوعا جىلى لەبىزدەرىن ءجيى جولدايتىن بولدى»، - دەلىنگەن سايتتاعى اقپاراتتا.
ەندى، لاتۆيالىق تىڭدارمان د. قۇدايبەرگەننىڭ قازاق تىلىندە ورىنداعان ءانىن راديو ەفيرىنەن تىڭداۋدى تاعاتسىزدانا كۇتىپ ءجۇر. فاناتتار لاتۆيانىڭ وزگە دە راديوستانسيالارىمەن سەرىكتەستىك ورناتۋدى جوسپارلاپ وتىر. وسى باعىتتاعى جۇمىستاردى باستاپ تا كەتكەن.
«Dimash Latvia Dears» فان-كلۋبى سۇيىكتى انشىلەرى ءۇشىن باسقا دا توسىن سىيلار ازىرلەپ جاتقان كورىنەدى. بۇعان دەيىن ديماشتىڭ اندەرى يسپانيا راديوسىنان بەرىلە باستاعانىن جازعان بولاتىنبىز. جالپى قازاقستاندىق ءانشىنىڭ جانكۇيەرلەرى الەمنىڭ تۇكپىر-تۇكپىرىندە بەلسەندىلىك تانىتىپ كەلەدى.
جاقىندا عانا ونىڭ 5 ەلدەگى فاناتتارى «دايديداۋ» ءانىن ورىنداپ، ۆيدەو جاريالادى. وعان دەيىن، د. قۇدايبەرگەننىڭ 24 -مامىرداعى تۋعان كۇنىنە وراي، قىتايلىق فاناتتار ءشول دالاعا 3 مىڭ اعاش وتىرعىزدى.
ال ەستونيانىڭ تاللين قالاسىنداعى تاريحي ساياباقتا ونىڭ قۇرمەتىنە كوشەت وتىرعىزىلىپ، جانىنا ەستەلىك بەلگى قويىلدى. كەيىن ءانشى Instagram-پاراقشاسىندا جانكۇيەرلەرىمەن قاۋىشىپ، ولاردىڭ سۇراقتارىنا جاۋاپ بەردى. جاقىندا ديماشتىڭ قازاق تىلىندەگى تۇڭعىش البومى جارىققا شىعادى.
