ۇلتتىق تەستىلەۋ ورتالىعىنىڭ ديرەكتورى ۇ ب ت الدىندا اتا-انالاردان كەشىرىم سۇرادى
بۇل تۋرالى ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ ءمالىم ەتتى، دەپ حابارلايدى قازاقپارات ءتىلشىسى.
«كارانتيندى ساقتاۋعا بايلانىستى ەلىمىزدە ادامداردىڭ جاپپاي جينالاۋىنا تىيىم سالىنعانىن اتاپ وتكىم كەلەدى. بۇل ەرەجەلەردى ەلەۋمەۋ - تۇلەكتەرىمىز ءۇشىن قوسىمشا تاۋەكەلدەر ەكەنىن ءتۇسىنۋ كەرەك. سوندىقتان، مەن الدىن الا بارلىق اتا-انالاردان كەشىرىم سۇراپ، ولاردى تۇسىنىستىك تانىتۋىنا شاقىرامىن. ويتكەنى، ولارعا ۇلتتىق ءبىرىڭعاي تەستىلەۋ وتكىزۋ پۋنكتىندە بولۋعا رۇقسات ەتىلمەيدى. عيمارات اۋماعىن قۇقىق قورعاۋ ورگاندارىنىڭ قىزمەتكەرلەرى قورشايدى. ءبىراق، ءاربىر اتا- انا تەستىلەۋدى تاپسىرۋ پروتسەسىن ونلاين كورە الادى. بۇل ءۇشىن ءاربىر اۋديتوريانىڭ ونلاين كورسەتىلىمى قامتاماسىز ەتىلەدى»، - دەدى د. سماعۇلوۆ ورتالىق كومۋنيكاتسيالار قىزمەتىندە.
وسى ورايدا ول ونلاين كورسەتىلىم سىلتەمەلەرى مەن رەسۋرستار ۇلتتىق تەستىلەۋ ورتالىعىنىڭ سايتىندى ءارى الەۋمەتتىك جەلىلەردە جاريالاناتىنىن ايتتى. بۇدان بۇرىن حابارلانعانداي، ديدار سماعۇلوۆ بيىلعى ۇ ب ت- نى وتكىزۋ ءتارتىبى جايىندى تۇسىنىك بەردى. كارانتيندىك شەكتەۋلەرگە بايلانىستى ەلدىڭ بارلىق ايماقتارىنداعى ۇ ب ت وتكىزۋ ورىندارىندا كۇشەيتىلگەن مەديتسينالىق- سانيتارلىق شارالار ەنگىزىلەدى.
عيماراتقا كىرگىزۋ كەزىندە تەستىلەنۋشىلەردىڭ اراسىنداعى ەكى مەترلىك اراقاشىقتىقتى قاتاڭ ساقتاۋ ارقىلى ماسكالى رەجيم جۇزەگە اسىرىلادى. ءار تەستىلەنۋشى 5 باقىلاۋ كەزەڭىنەن وتەتىن بولادى، ونىڭ ىشىندە سىرتقى كيىمدى دەزينفەكسيالىق ەرىتىندىلەرمەن زالالسىزداندىراتىن ارنايى ءدالىز ارقىلى ءوتۋ ەسكەرىلگەن بيىل ۇلتتىق ءبىرىڭعاي تەستىلەۋ 20-ماۋسىم مەن 5-شىلدە ارالىعىندا وتەدى.
