16:58, 15 - ماۋسىم 2020 | GMT +5
قازاقستان قورعانىس ءمينيسترى ءوزىن-ءوزى وقشاۋلاۋ رەجيمىنە كوشتى
نۇر-سۇلتان. قازاقپارات - ماسكەۋدە وتەتىن ەكىنشى دۇنيەجۇزىلىك سوعىستاعى جەڭىستىڭ 75 جىلدىعىنا ارنالعان ءىس- شارالارعا قاتىسۋىنا بايلانىستى قورعانىس ۆەدومستۆوسىنىڭ باسشىسى گەنەرەل-لەيتەنانت نۇرلان ەرمەكبايەۆ 11-ماۋسىمنان باستاپ ءوزىن-ءوزى وقشاۋلاۋ رەجيمىنە كوشتى، دەپ حابارلايدى اتالعان ۆەدومستۆونىڭ باسپا ءسوز قىزمەتى.
مەرەكەلىك ءىس-شارالارعا قازاقستان قورعانىس ءمينيسترى ءوزىنىڭ رەسەيلىك ارىپتەسى ارميا گەنەرالى سەرگەي شويگۋدىڭ شاقىرۋىمەن بارادى. ءوزىن-ءوزى وقشاۋلاۋ بويىنشا شارالار شەت ەلدەرگە بارۋ ءتارتىبىن، دارىگەرلەردىڭ ۇسىنىستارىن، سونداي-اق سانيتارلىق-ەپيدەميولوگيالىق جاعدايدىڭ جاي-كۇيىن ەسكەرە وتىرىپ قابىلداندى. قورعانىس ءمينيسترى جۇمىس ورنىندا.
بۇل رەتتە ونىڭ قاراماعىنداعىلارمەن تىكەلەي بايلانىسى جوق. قورعانىس مينيسترلىگى مەن قارۋلى كۇشتەر قىزمەتىنە باسشىلىق ەتۋ تەلەفون جانە بەينەكونفەرەنسبايلانىسى ارقىلى جۇزەگە اسىرىلادى. ءوزىن-ءوزى وقشاۋلاۋ كەزەڭىندە قورعانىس مينيسترىمەن قاجەتتى دياگنوستيكالىق ءىس-شارالار جۇرگىزىلەدى. ءوزىن-ءوزى وقشاۋلاۋ رەجيمىنىڭ اياقتالۋ كۇنى تۋرالى شەشىم اعىمداعى جاعدايدى ەسكەرە وتىرىپ، ماسكەۋدەن ورالعاننان كەيىن قابىلدانادى.
