ساۋلە قيسىقوۆا: كوروناۆيرۋسقا بايلانىستى قاۋىپ ويدان شىعارىلعان دەپ ايتۋعا بولمايدى

نۇر-سۇلتان. قازاقپارات - كوروناۆيرۋس پاندەمياسىنىڭ قاتەرىنە بەي- جاي قاراۋعا بولمايدى.

بۇل تۋرالى نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ءمالىم ەتتى، دەپ حابارلايدى قازاقپارات ءتىلشىسى.

«قالا تۇرعىندارىنان ءالى دە ساقتانۋ كەرەكتىگىن تالاپ ەتەمىز. «كوروناۆيرۋس پاندەمياسى ءبىتتى جانە وعان بايلانىستى قاۋىپ-قاتەر ويدان شىعارىلعان» دەپ ايتۋعا بولمايدى. ينفەكسيا قاۋپىنىڭ نەگىزگى فاكتورى - ادامداردىڭ كوپ جينالۋى، ءتۇرلى شارالارعا قاتىسۋ، ماسكا تاعۋ رەجيمى مەن الەۋمەتتىك قاشىقتىق ساقتاماۋ، جەكە گيگيەنا تالاپتارىن ورىنداماۋ»، - دەدى س. قيسىقوۆا ورتالىق كوممۋنيكاتسيالار قىزمەتىندە.

ونىڭ سوزىنە قاراعاندا، قالانىڭ مەديتسينالىق ۇيىمدارى قاجەت كومەك كورسەتۋگە تولىق دايىن. «ءبىز بارلىق ۇسىنىستار مەن بەرىلگەن كەڭەستەردى ورىنداۋدى سۇرايمىز. بۇل بارشا تۇرعىندار ءۇشىن قاجەت»، - دەدى باسقارما باسشىسى.

بۇدان بۇرىن حابارلانعانداي، ەلوردادا ۆيرۋس جۇقتىرعان جالپى 2620 ادام انىقتالدى. ونىڭ ىشىندە 270 ى بالا. 1829 ناۋقاس نەمەسە 70 پايىزى جازىلىپ شىقتى. وكىنىشكە قاراي، تولىق كولەمدە جۇرگىزىلگەن مەديتسينالىق كومەككە قاراماستان، 14 ادام قايتىس بولدى.