مىندەتتى جانە ەرىكتى ۆاكسينانىڭ ارا جىگىن اجىراتا الماي جۇرگەندەر كوپ - سەناتور
بۇل تۋرالى ق ر پارلامەنتى سەناتىنىڭ جالپى وتىرىسىندا سەناتور دانا نۇرجىگىتوۆا ايتتى، دەپ حابارلايدى قازاقپارات ءتىلشىسى.
«بىرىنشىدەن، كودەكس اۋرۋدىڭ الدىن الۋ ەمەس ونىڭ سالدارىمەن كۇرەسكە كوبىرەك باعىتتالعان ءتارىزدى. مۇنى ايتۋىما سەبەپ - ازاماتتاردى سالاۋاتتى ءومىر سالتىن ۇستانۋعا ىنتالاندىراتىن باپتاردىڭ ازدىعى. مىسالى، ۋاقىتىلى دارىگەرگە قارالىپ، دەنساۋلىعىن كۇتەتىن ازاماتتارعا مىندەتتى الەۋمەتتىك ساقتاندىرۋ جۇيەسى اياسىندا ىنتالاندىرۋ بونۋستارىن ەنگىزۋگە بولار ەدى»، - دەدى سەناتور «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىن تالقىلاۋ بارىسىندا. ەكىنشىدەن، دانا نۇرجىگىتوۆا جالپى كودەكستى حالىققا ءتۇسىندىرۋ جۇمىستارى ءالسىز جۇرگىزىلگەندىكتەن قوعامدا ەكىۇشتى اڭگىمەلەر كوبەيگەنىنە باسا نازار اۋدارتتى.
«مىسالى، كودەكستە ازاماتتاردىڭ ەمدەلۋگە جانە باسقا دا مەديتسينالىق ارالاسۋلاردى جۇرگىزۋگە، حاباردار ەتىلگەن كەلىسىم بەرۋگە نەمەسە ولاردان باس تارتۋ قۇقىعى قاراستىرىلعان دەپ جازىلعان. ال بۇل نورما ازاماتتارىمىزدىڭ ەكپەدەن باس تارتۋ قۇقىعىن قانشالىقتى قامتاماسىز ەتە الادى؟ قوعامدا قىزۋ پىكىرتالاس تۋدىرعان دا كودەكستىڭ ءدال وسى تۇسى عوي. قازىرگە دەيىن مىندەتتى جانە ەرىكتى ۆاكسينانىڭ ارا جىگىن اجىراتا الماي جۇرگەندەر كوپ. ال بۇل ماسەلەنى حالىققا جەتكىزەتىن مەديتسينا سالاسىنىڭ سالماقتى ساراپشىلارى مەن بەتكە ۇستار مەديتسينا ماماندارى، عالىمدار، اسىرەسە، قازاق ءتىلدى ماماندار ءتۇسىندىرۋ جۇمىستارىنا بەلسەندى ارالاسىپ وتىرعان جوق دەپ ولايمىن. وسى ەنجارلىقتىڭ سالدارىنان كوپشىلىك مىندەتتى ۆاكسينانى ماجبۇرلەۋ دەپ ءتۇسىنىپ ءجۇر. سوندىقتان مەنىڭشە، ءبىز بۇگىن تالقىلاپ وتىرعان كودەكس جوباسىندا ەشقانداي ءماجبۇرلى تۇردە جۇرگىزىلەتىن ۆاكسيناتسيانىڭ بولمايتىندىعى تۋرالى ءتۇسىندىرۋ جۇمىستارىنا كوبىرەك كوڭىل ءبولۋ قاجەت دەپ ەسەپتەيمىن. جالپى ب ا ق-تا مەديتسينا قىزمەتكەرىنىڭ ۇلت دارىگەرى دارەجەسىندەگى مەدياتۇلعاسىنىڭ جوقتىعى وسىندايدا ءبىلىندى. قازاقستان مەديتسيناسىنىڭ كەلبەتىن قالىتاستىرۋ، دارىگەر مارتبەسىن كوتەرۋ وسى سالاداعى تۇلعاتانۋدان باستالۋى كەرەك. بىزدە حالىققا ءسوز ايتاتىن، حالىق دەنساۋلىعىنا ءومىرىن ارناعان، عىلىمنىڭ، ءبىلىمنىڭ، اعارتۋشىلىقتىڭ جولىندا جۇرگەن دارىگەر جوق دەگەنگە سەنبەيمىن»، - دەدى ول.
سەناتور ۇشىنشىدەن، جاۋاپكەرشىلىك ماسەلەسىنە نازار اۋدارتتى. «اتا-انا نە بالانىڭ زاڭدى وكىلى ەكپەدەن باس تارتۋىنا بولادى. ونداي قۇقىعى بار. ال ەرتەڭگى كۇنى سول ادامدار وزدەرى اۋرۋعا شالدىعىپ، اينالاسىنداعىلارعا جۇقتىرىپ نە بولماسا ادام ولىمىنە اكەلەتىن جاعداي تۋدىرسا، ولاردىڭ جاۋاپكەرشىلىگى قانداي؟ بۇل ماسەلەنى بولاشاقتا ەسكەرۋ قاجەت»، - دەدى دانا نۇرجىگىتوۆا.
